Read O Debleskro Drom - I Bibla an o Romano Rakepen 2021 Hesekijel 47 Bible Online

Hesekijel 47 - O Debleskro Drom - I Bibla an o Romano Rakepen 2021 bible

Hesekijel 47

¹Un ko mursh anas man palpale pash o wudar o Debleskro kherestar. Leskri glanstuni rig his koi rig, kai o kham pre djal. Kote dikom pani, hoi nashas tel o wudar win. Kau pani nashas i kotar tele ap koi glanstuni rig o kherestar pash koi rig, kai o kham pralstunes tardo hi. Palle djas lo kote, kai koi chatchepaskri tardo hi, dureder ap koi rig, kai o kham pre djal.

²Un job anas man win dran ko wudar, hoi kote hi, kai norden hi. Un anas man win trul i massuri pash ko wudar, hoi kote hi, kai o kham pre djal. Kote dikom, har nashas o pani tel o wudar win, ap koi rig, kai o kham pralstunes tardo hi.

³Un ko mursh djas dureder kote, kai o kham pre djal, un les his i dori an peskro wast. Un kolah ginas[86] lo 500 metarja tele, un mukas man an o pani dren te djal. O pani tchakras mire pire.

⁴Un job ginas gomme 500 metarja tele, un mukas man an o pani dren te djal. Un o pani djas mange bis pash i tchanga[87]. Un job ginas gomme 500 metarja tele, un mukas man an o pani dren te djal, un o pani djas mange tel o betch.

⁵Un job ginas gomme 500 metarja tele, un ko pani djas jaake dur tele, te nai djom gar dren. Ko pani his jaake dur tele, te hunte shwimrals jek wergel.

⁶Un job penas ap mande: Tu mensho, dikal tu kawa? Un job anas man palpale ap o panjeskri rig.

⁷Un har pale wom, dikom kote bud ruka ap kol dui rigja o panjestar.

⁸Un job penas ap mande: Kau pani nashell win an ko kotar them, hoi kote hi, kai o kham pre djal, un dureder tele an i tala, kai o Jordan nashell, bis te well lo an o Londo Baro Pani. Un ko baro pani well palle sasto.

⁹Kote kai ko lengsto pani nashell un well, kote hi djipen. Un kau pani krell, te well o Londo Baro Pani sasto, un bud bud matche djiwenn koi dren. Kai kau pani nashell, well halauter sasto un djiwell.

¹⁰Un pash leste hi matchengre tardo. An o tselo them mank En-Gedi un En-Eglajim tchiwenn le pengre matchengre gone win, te wenn le truk. Hako matcho, hoi dell, hi an leste, jaake bud har an o Mashkralstuno Baro Pani[88].

¹¹Kokres kote, kai o pani tardo hi, un gar nashell, atchell o pani londo, un lestar lenn le loon.

¹²Ap kol dui rigja o lengsto panjestar hi ruka tardo. Kolla hi o tselo bersh senelo, un hidjrenn hako tsiro rukengre. Hako tchon wenn newe rukengre bares. Ko lengsto pani, kolestar jon pani lenn, well win dran o Debleskro kheer. Lengre rukengre hi o chapaske. Un lengre patria krenn i nasselen sasto.

¹³Kawa penell o baro Dewel, maro rai: Kanna penau tuke, har baro kau them hi, un hawo kotar lestar lell hakeno kol deesh-te-dui tchawendar o Jakobestar. Denn hakeneste leskro kotar them, te atchell kowa leske hako tsireske! Kal deesh-te-dui kotja hi emliges baro. O kheer Josef lell dui kotja. Me dom man sowel, te dap kau them tumare phurende. Un jaake well lo tumenge, te atchell lo an tumare familje.

¹⁵Ap koi rig, kai norden hi, djal o them Israel fun o baro pani bis pash o foro Hetlon, un dureder bis pash i forja Hamat un Zedad,

¹⁶un dureder bis pash i forja Berota un Sibrajim, hoi kote tchiddo hi, kai o them trul Damaskus khetne well ko themeha trul Hamat. Fun kotar djal o them Israel dureder bis pash o foro Hazar-Enan, hoi pash o them tchiddo hi, hoi trul i berga Hauran hi.

¹⁷Jaake djal o them Israel ap i nordetikri rig fun o Mashkralstuno Baro Pani bis pash o foro Hazar-Enan. Ap koi nordetikri rig lestar hi kol forja Damaskus un Hamat tchiddo.

¹⁸Un koi rig o themestar Israel djal fun kotar, kai o kham pre djal, mashkral o foro Hauran un o foro Damaskus dureder langs o lengsto pani Jordan bis tele pash o Londo Baro Pani. O Jordan nashell mank o them Israel un o them Gilead. Pash o Londo Baro Pani djal o them Israel bis pash o foro Tamar. Jaake dur djal o them Israel ap koi rig, kai o kham pre djal.

¹⁹Un ap koi rig, kai o kham pralstunes tardo hi, djal o them Israel fun o foro Tamar bis pash o pani, hoi kharell Meriba-Kadesh, un dureder langs ko tikno pani, hoi nashell mank Israel un Egiptia, bis pash o Mashkralstuno Baro Pani. Jaake dur djal o them Israel ap koi rig, kai o kham pralstunes tardo hi.

²⁰Un kote, kai o kham tele djal, djal o them Israel bis pash o Mashkralstuno Baro Pani, bis pre wergel o foro Hamat. Jaake dur djal o them Israel ap koi rig, kai o kham tele djal.

²¹Denn kau them i Israelenge, te well hako tchaweske o Jakobestar peskro kotar them.

²²Kau them hi tumare familjenge, un well o dadestar ap o tchaweste dureder dino. Te witsrenn tumer kashta, hoi sikrenn, koon hawo kotar them lella, palle bistrenn gar kol wi-themarjen, kai mank tumende djiwenn, un kolenge pash tumende tchawe boldo wan! Jon hunte wenn tumenge har jek fun tumendar Israelitarja. Un khetne tumentsa lenn le pengro kotar them, un kowa atchell an lengre familje.

²³Un hakeno lendar lell peskro kotar them pash ko Jakobeskro tchaweste, kai job djiwell. Kawa penell o baro Dewel, maro rai.