Read O Debleskro Drom - I Bibla an o Romano Rakepen 2021 Hesekijel 48 Bible Online

Hesekijel 48 - O Debleskro Drom - I Bibla an o Romano Rakepen 2021 bible

Hesekijel 48

¹Un kalla hi i laba kol deesh-te-dui bare familjendar un ko kotar them, hoi hakeni lendar lell. Ko kotar them, hoi ap i nordetikri rig tchiddo hi, lell o kheer Dan. Kau them djal fun o Mashkralstuno Baro Pani bis pash o foro Hetlon, un dureder bis pash o foro Hamat, un dureder bis pash o foro Hazar-Enan. Ap leskri nordetikri rig hi o foro Damaskus tchiddo, wergel ko foro Hamat. Jaake dur hi kau kotar them, hoi o kheer Dan lell, fun kotar, kai o kham pre djal, bis kote, kai o kham tele djal.

²Ninna i wawar bare familje lenn i kotar them, hoi djal fun kote, kai o kham pre djal, bis kote, kai o kham tele djal. Ap i tchatchi rig[89] ko themestar, hoi o kheer Dan lell, well ko them, hoi lell o kheer Asser. Ap i tchatchi rig ko themestar, hoi o kheer Asser lell, well ko them, hoi lell o kheer Naftali. Ap i tchatchi rig ko themestar, hoi o kheer Naftali lell, well ko them, hoi lell o kheer Manasse. Ap i tchatchi rig ko themestar, hoi o kheer Manasse lell, well ko them, hoi lell o kheer Efrajim. Ap i tchatchi rig ko themestar, hoi o kheer Efrajim lell, well ko them, hoi lell o kheer Ruben. Ap i tchatchi rig ko themestar, hoi o kheer Ruben lell, well ko them, hoi lell o kheer Juda.

⁸Ap i tchatchi rig ko themestar, hoi o kheer Juda lell, tchiwenn i kotar ap i rig, hoi mange hi. Kau kotar djal ninna fun kote, kai o kham pre djal bis kote, kai o kham tele djal, un hi 12,5 (deesh-te-dui-te-paash) kilometarja buchlo, un jaake lengsto har kol wawar kotja ninna. Mashkral dren hi miro kheer tardo.

⁹Kau kotar them, hoi tchiwenn tumer mange ap i rig hi 12,5 (deesh-te-dui-te-paash) kilometarja lengsto un 10 (deesh) kilometarja buchlo.

¹⁰Fun kau kotar hi i paash i rashajenge: 12,5 (deesh-te-dui-te-paash) kilometarja lengsto un 5 (pantch) kilometarja buchlo. Mashkral dren hi miro kheer tardo.

¹¹Kau kotar hi kol rashajenge, kai wenn pal o Zadok. Jon hi mange koi, un budran mange, un peran gar mandar tele, har i Levitarja khetne i Israelentsa mandar tele peran.

¹²Doleske well lenge kau kotar ko themestar, hoi mange hi, un kai miro kheer tardo hi. Kau kotar hi kokres i rashajenge, un hi tchiddo pash ko kotar them, hoi lenn i wawar Levitarja.

¹³Un langs ko kotar them, hoi lenn kol rashaja, lenn i Levitarja pengro kotar them. Kowa hi ninna 12,5 (deesh-te-dui-te-paash) kilometarja lengsto un 5 (pantch) kilometarja buchlo. Ko tselo kotar, hoi o Debleske ap i rig tchiddo hi, hi 12,5 (deesh-te-dui-te-paash) kilometarja lengsto un 10 (deesh) kilometarja buchlo.

¹⁴Un i Levitarja hunte bikrenn tchi pengro themestar un tchi parenn. Kau fetester kotar them hunte well gar an i wawarengre wasta. Kau kotar them was o baro Debleske dino.

¹⁵Un ko kotar them, hoi pral atchell — 2,5 (dui-te-paash) kilometarja buchlo un 12,5 (deesh-te-dui-te-paash) kilometarja lengsto — kowa hi gar o Debleske. Kowa hi o foreske Jerusalem, te djiwenn i menshe kote, un te hatsenn i vieche kote senlepen. Un ko foro well mashkral dren.

¹⁶Un jaake baro well ko foro: 2.250 (dui-serja-dui-sheel-te-paash-sheel) metarja ap haki rig.

¹⁷Un trul o foro, ap hake star rigja, well i kotar them, hoi hi 125 (sheel-te-biish-te-pantch) metarja buchlo. Kote nai chan i vieche.

¹⁸Ap kol dui rigja o forestar, kai o kham pral djal un kai lo tele djal, atchell i kotar them, hoi hi ap kal dui rigja 5 (pantch) kilometarja lengsto. Leskri nordetikri rig djal bis ap ko kotar them, hoi mange, o baro Debleske dino hi. Kate nai budrenn kolla ap i hachetikri phub, kai an o foro Jerusalem budrenn, te well len chapaske.

¹⁹Jon wenna dran kol tsele 12 (deesh-te-dui) bare familje an Israel.

²⁰Ko tselo kotar them, hoi tumer ap i rig tchiwenn o Debleske un o foreske Jerusalem, kowa hi ap haki rig 12,5 (deesh-te-dui-te-paash) kilometarja lengsto. Haki rig hi emligo baro.

²¹Un kowa hoi ap kol dui rigja pral atchell, ap ko rig, kai o kham pre djal bis pash o pani Jordan, un ap koi rig, kai o kham tele djal bis pash o Mashkralstuno Baro Pani, kowa hi o baro rajeske. Kowa hi o them mashkral o them Juda un o them Benjamin. Mashkral dren an o rajeskro kotar them hi ko kotar them, kai o Debleskro kheer tardo hi, un hoi hi i rashajenge, un ko kotar i Levitarenge, un ko kotar, kai o foro Jerusalem tardo hi.

²³Palle lenn i wawar bare familje, kai pral atchan, pengro kotar them, hoi djal fun kote, kai o kham pre djal bis kote, kai o kham tele djal. Ap i tchatchi rig ko themestar, hoi o rajeske hi, well ko them, hoi lell o kheer Benjamin. Ap i tchatchi rig ko themestar, hoi o kheer Benjamin lell, well ko them, hoi lell o kheer Simeon. Ap i tchatchi rig ko themestar, hoi o kheer Simeon lell, well ko them, hoi lell o kheer Issachar. Ap i tchatchi rig ko themestar, hoi o kheer Issachar lell, well ko them, hoi lell o kheer Sebulon. Ap i tchatchi rig ko themestar, hoi o kheer Sebulon lell, well ko them, hoi lell o kheer Gad.

²⁸O them Gad djal ap koi rig, kai o kham pralstunes tardo hi, bis pash o foro Tamar, un fun kote dureder bis pash o pani Meriba pash o foro Kadesh, un fun kotar dureder bis pash ko tikno pani, hoi nashell mank Israel un Egiptia bis pash o baro pani.

²⁹Kawa hi o them, hoi denn tumer i bare familjenge, kai wenna kol 12 (deesh-te-dui) tchawendar o Jakobestar, te lell hakeni peskro kotar them. Kau them hi hako tsireske i Israelenge, un well o dadestar ap o tchaweste dureder dino. Kawa penell o baro Dewel, maro rai.

³⁰Trul o foro Jerusalem hi i massuri, hoi ap haki rig 2.250 (dui-serja-dui-sheel-te-paash-sheel) metarja lengsto hi. An haki rig hi triin bare wudja. Un kol wudja kharenn har i laba o Jakobeskre 12 (deesh-te-dui) tchawendar. Ap i nordetikri rig: o wudar Ruben un o wudar Juda un o wudar Levi. Ap i rig, kai o kham pre djal: o wudar Josef un o wudar Benjamin un o wudar Dan. Ap i rig, kai o kham pralstunes tardo hi: o wudar Simeon un o wudar Issachar un o wudar Sebulon. Ap i rig, kai o kham tele djal: o wudar Gad un o wudar Asser un o wudar Naftali.

³⁵Kal star rigja o forestar hi khetne enja (9) kilometarja lengsto. Fun ko tsiro well o foro kharedo: O baro Dewel hi kai!