Read O Debleskro Drom - I Bibla an o Romano Rakepen 2021 Hesekijel 5 Bible Online

Hesekijel 5 - O Debleskro Drom - I Bibla an o Romano Rakepen 2021 bible

Hesekijel 5

¹O baro Dewel penas: Tu, mensho, le tuke i charo, hoi mishto tchinell, un tchin tuke koleha i balla ap tiro shero tele un tiri tchor. Palle le i waga, tchip i balla pre, un kre triin kotja lendar, hakeno jaake pharo har ko wawar.

²Ap ko tsiro, kai well o foro dren lino, chatche jek triinto kotar fun kol balla mashkral an o foro[7]. Un i wawar triinto kotar de ko chareha paash win glan kol foreskre wudja. Un ko wawar triinto kotar witse pre, te lell len o ducho[8] peha! Jaake lau me i menshen dran Jerusalem palla o chareha.

³Rike kol ballendar tchomone pale un pande len tella an tiri baja.

⁴Un kolendar less triin-star kotar un witse len an i jag un chatche len pre! Fun kolendar djal i jag win un well pral o tselo kheer Israel.

⁵Kawa hi, hoi penau me, o baro Dewel, tumaro rai: Kau bar hi o foro Jerusalem! Mashkral dren an i themma, kai wawar menshe djiwenn, tchiwom kau foro.

⁶I menshe an Jerusalem mukan pen tchi mandar te penell, un shunan gar ap mande. Jon wan tchilatcheder har kol themma, kai trul lende hi. Mire tchatchepaskre laba witsran le pal pende, un djiwan gar jaake har lendar kamom.

⁷Doleske penau me, o baro Dewel, lengro rai, ap lende: Tumer hans tchilatcheder har i menshe an i themma trul tumende, un djiwan gar jaake har tumendar kamom, un rikran gar mire tchatchepaskre laba dren. Awa, tumer han jaake tchilatcho, te rikran tumen witar gar ap o tchatchepen kol wawar menshendar, kai trul tumende djiwenn.

⁸Doleske shunenn, tumer menshe an Jerusalem, hoi penau me, o baro Dewel, tumaro rai: Kanna sikrau les tumenge! Un dau tumen tumari phagi glan i jaka kol wawar menshendar.

⁹Un me kamau tumentsa jaake te krell, har kowa kekeha krom, un witar gar krau an ko tsiro, hoi wella. Kawa krau doleske, kai kran sawo bud djungelo koowa.

¹⁰I tsiro well, kai chan dada pengre tchawen mashkral an Jerusalem, un tchawe chan pengre daden. Jaake pharo well miri phagi, hoi dau tumende. Un halauter, kai tumendar pral atchenn, wenn win tradedo ap hake rigja.

¹¹Tumer kran miro kheer pale-tchiddo kol chochene deblentsa un djungelo koweha, hoi kote kran, penau me, o baro Dewel, tumaro rai. Doleske dau man sowel, me o djido Dewel, te dap tumen paash. Tumer khaitenn man buder gar un me krau miro dji buder gar tumenge pre.

¹²O triinto kotar tumendar merell ap i pharo nasslepen un i bokatar. Un i triinto kotar tumendar well glan o foro o chareha mulo dino. Un i triinto kotar tumendar tradau win ap hake rigja, un me lau len palla o chareha.

¹³Te mukom miri tseli choli ap tumende win, un dom tumen pale, hoi kran, palle djal miri choli krik, un hom buder gar chojedo pral tumende. Un tumer djinenn, te homs me, o baro Dewel, kai das tumen trad o tselo djijeha.

¹⁴Tutar, Jerusalem, krau i mulo foro. Tchi har barra atchenn tutar pral. I menshe an i wawar themma trul tute trujel, san pral tute — hakeno kai djal koi un dikell tut.

¹⁵Awa, jon san pral tute un praassenn tut. Lenge well traash, te dikenn le, har miri bari choli pral tute well, un har djungeles sawe menshenge djal, kai man mukan. An miri choli anau tiri doosh ap tute pale. Me, o baro Dewel, rakrom.

¹⁶Te bitchrau i bok mank tumende, hi kowa jaake har te doms tchilatche faile karje mank tumende, te marap tumen. An ko tsiro well tumen buder gar doha te chal. Un i bok well baro un bareder mank tumende.

¹⁷Awa, i bok un diwje viechen bitchrau mank tumende. Kolla marenn tumare tchawen. Ninna pharo nasslepen, marepen un kurepen anau pral tumende. Me, o baro Dewel, rakrom.