Read O Debleskro Drom - I Bibla an o Romano Rakepen 2021 Hesekijel 7 Bible Online

Hesekijel 7 - O Debleskro Drom - I Bibla an o Romano Rakepen 2021 bible

Hesekijel 7

¹Un o baro Dewel penas ap mande:

²Tu, mensho, kawa hi, hoi penau me, o baro Dewel tumaro rai ap o them Israel. Hi doha! O tsiro hi koi, kai djal o tselo them Israel tele.

³Israel, kanna well miri choli pral tute, un tu djah tele. Me rakrau o tchatchepen pral tute win, un tu leh tiri phagi. Ko tselo djungelo koowa, hoi kral, anau ap tiro shero pale.

⁴Me dikau buder gar latches ap tute. Man khaiteh tu gar. Ko djungelo koowa, hoi kral, well ap tiro shero pale. Un tu leh tiri phagi. Un tumer dikenn un haiwenn palle, te hom me o baro Dewel.

⁵Kawa hi, hoi o baro Dewel, maro rai penell: Shunenn, bibacht pal bibacht wella!

⁶O tsiro hi koi, kai djal o tselo them tele. Tele djal o tselo them! Dikenn tumer, har i bibacht wella? Koi hi li!

⁷I bibacht perell pral tumende dren, pral tumende kai djiwenn an o them. O tsiro was, ko diwes hi koi, kai o ropen well, un buder kek gipen pral ap i berge hi.

⁸Sik tchorau miri choli pral tumende win. Un djau choljah tumentsa trujel, bis te miri choli trujel hi. Me rakrau o tchatchepen pral tumende win, un tumer lenn tumari phagi. Ko tselo djungelo koowa, hoi kran, anau ap tumare sherja pale.

⁹Me dikau buder gar latches ap tumende. Man khaitenn tumer gar. Ko djungelo koowa, hoi kran, well ap tumare sherja pale. Un tumer lenn tumari phagi. Un tumer dikenn un haiwenn palle, te hom me o baro Dewel, kowa kai tumen dell.

¹⁰Dikenn ko diwes! Dikenn, hoi wella! I bibacht hi glan o wudar. O tchilatchepen was bud un budeder[10]. Un o pre-phurdepen hi baro.

¹¹Kolla, kai djan tchilatches i wawarentsa trujel, wan tchilatche raja. Tchi atchell lendar pral. Lengro brawlepen atchell gar, witar gar lengro railepen un an-dikepen.

¹²Ko tsiro was, ko diwes hi koi! O ginepaskro nai sal gar buder. Un kowa, kai hunte bikrell tchomone, hunte rowell gar koi pral. O baro Debleskri choli well pral kal tsele menshende[11].

¹³O bikepaskro lell kowa gar pale, hoi lo bikras, ninna te atchell lo djido. Kowa, hoi glan-wi penlo hi, well pral kal tsele menshende. O baro Dewel lell kowa gar pale. Kek, kai doosh ap peste las, atchell djido.

¹⁴I menshe shunan, har an i phurdepaskri phurdedo was, te kharenn le len an o kurepen, un i kurepangre lan pengre karmangre. Un palle well miri choli jaake sik pral lende halauterende[12], te djal kek koi.

¹⁵Glan o foro hi kol lurde, kai kamenn i Israelitarjen te marell. An o foro hi i pharo nasslepen[13] un bok. Koon win glan o foro hi, kowa well o chareha maredo. Un koon an o foro dren hi, merell ap o pharo nasslepen un i bokatar.

¹⁶Un kolla, kai nai nashenn penge, djiwenn ap i berge har darene taube mank i bare barra, un rowenn pral pengri doosh.

¹⁷Kek soor hi len buder an pengre wasta. I darjatar nai rikrenn le pengro pani gar.

¹⁸Gone tchiwenn le trul pende har ripja, un tchinenn pengre balla ap lengro shero tele, te sikrenn le har bud khaitell len lengri doosh. Jon trissenn i darjatar. Un lengre sherja hi lolo i ladjatar.

¹⁹Lengro rup witsrenn le ap o drom, un lengro sonakai hi lenge har tchik. Lengro rup un lengro sonakai nai lell len gar dran o merepen win, ap ko diwes, kai i choli o baro Deblestar pral lende well. Lengro rup un sonakai was tchi-moldo. Jon nai chan les gar, un nai krenn gar pengro per lestar pherdo. Lengro brawlepen his kowa, hoi anas len jaake dur, te peran le o baro Debleskro dromestar tele.

²⁰Lengro tselo shukar koowa kras, te wan le pre-phurdo. Un jon kran pen kolestar djungele figure, chochene deblen, hoi le an-mangan. Doleske krom me, te well kau koowa lenge har tchik.

²¹Un me dau kowa an o wast kolendar, kai wenn dran wawar themma. Kol tchilatche ap kai phub randenn les, un krenn, te nai wenn kol figure buder gar an-mangedo.

²²Un me rissrau miro shero krik mire menshendar. Un wawar menshe krenna, te well kowa pale-tchiddo, hoi mange jaake kutch hi[14]. Awa, randepangre phagenn dren un krenn, te nai djiwau me buder gar koi.

²³Kre i shello! O tselo them hi pherdo kolendar, kai lan rateskri doosh ap pende. Un o foro hi pherdo kolentsa, kai rikran i wawaren i sorjah tele.

²⁴Doleske mukau lurden dran tchilatche natsjone pral o Israel te well, te lenn le lengre khera penge dren. Un kol raja, kai rikran i tchorwelen sorjah tele, lenge krau o pre-phurdepen paash. Un kol platse, kai mangan le pengre deblen an, mukau pale-tchiddo te krell.

²⁵I daar well bari. Tchitcheske rodenn le i khatepen, kai djal lenge tchi. Kek hatsenn le.

²⁶Bibacht pal bibacht well. Pale te pale shunenn le, hawo djungelo koowa was. Tchitcheske djan le pash o Debleskre rakepangre, un putchenn lendar, hoi o baro Dewel sikras len. Witar gar i rashaja nai penenn lenge, hoi te krenn le. Un i phureder djinenn kek drom win dran o merepen.

²⁷O baro rai rowell, un i pralstune darenn pengro djipaske. Hakeno an o them trissell i darjatar. Me krau lentsa pal kowa har jon kran. Un jaake har kran jon o tchatchepen win pral i wawarende, jaake krau me o tchatchepen win pral lende. Palle dikenn un haiwenn le, te hom me o baro Dewel.