Read O Debleskro Drom - I Bibla an o Romano Rakepen 2021 Hesekijel 9 Bible Online

Hesekijel 9 - O Debleskro Drom - I Bibla an o Romano Rakepen 2021 bible

Hesekijel 9

¹Un me shunom, har das o baro Dewel soreles gole, un penas: Mu wenn le, kolla, kai denn o foro peskri phagi! Hakeno lendar te lell peskro kurepaskro kasht an o wast!

²Koi wan shob mursha ap o drom, kai was kotar, kai o pralstuno baro wudar hi, ap i nordetikri rig o baro Debleskro kherestar. Un hakenes his tchomone an o wast, koleha job nai marell. Un pash lende his jek, koleskre koola his dran laintikro than. Ap leskro pereskri dori his i tchinepaskri pandlo, koleha job nai laba pre tchinell. Un jon wan un atchan pash i sasterni chatchepaskri tardo.

³Un o railepen o Israeleskro Deblestar, kai his pral kol star bolepangren, kai kharan Cherubim, hadas pes fun kotar, un djas pash o kheer, kote kai o wudar hi. Un o baro Dewel das ap ko mursheste gole, koleskre koola dran laintikro than his, un koles i tchinepaskri ap peskri rig his,

⁴un penas ap leste: An o foro Jerusalem hi gomme menshe, kolengro dji rowell un dell gole pral kau bud djungelo koowa, hoi kate kerdo well. Dja an o tselo foro trujel, un kre i sikepen glan ap kolengre sherja.

⁵Ap kol wawar murshende penas lo jaake, te shunom kowa: Djan pal leste an o foro un denn hakenes mulo. Dikenn kek kamlepah ap lende! Kek hunte khaitell tumen!

⁶Denn i phuren mulo, un i terne murshen un i terne tchen, ninna i tchawen un i djuwjen! Ma taprenn jekeske an, koles ko sikepen glan ap peskro shero hi! Djan glanstunes pash miro kheer, un fun kotar dureder. Jaake kran le, un maran glanstunes kol pralstunen, kai glan o baro Debleskro kheer tardo his.

⁷Un o baro Dewel penas ap lende: Anenn kolen, kai mulo dino wan, ap i platse glan o Debleskro kheer! Krenn jaake o kheer pale-tchiddo! Palle djan win an o foro! Un jon djan win, un dan i menshen an o foro mulo.

⁸Un har le kowa kran, atchom me kokres ap i platsa glan o Debleskro kheer pale. Un mukom man ap i phub te perell, un dom pre gole un penom: Baro Dewel, miro rai! Hal tu jaake chojedo pral Jerusalem, te mukess halauteren mulo te dell, kai i Israelendar pral atchan?

⁹Un job penas ap mande: I doosh, hoi i menshe dran o kheer Israel un dran o kheer Juda ap pende anan, hi jaake bud. Bud marepen hi an o them. Un an o foro rikrenn i sorele i wawaren sorjah tele. Un jon penenn: “O baro Dewel djas peske dran kau them. Job dikell men gar!”

¹⁰Doleske dikau me kek kamlepah ap lende, un jon khaitenn man gar. Lengro tchilatchepen anau ap lengre sherja pale.

¹¹Koi was ko mursh, koleskre koola dran laintikro than his, un koles i tchinepaskri ap peskro pereskri dori pandles his, un penas: “Me krom kowa, hoi tu mange penal.”