Read O Debleskro Drom - I Bibla an o Romano Rakepen 2021 Daniel 10 Bible Online

Daniel 10 - O Debleskro Drom - I Bibla an o Romano Rakepen 2021 bible

Daniel 10

¹An ko tsiro, har o Kirus an o triinto bersh o baro rai his pral o them Persia, las ko Daniel, kai ninna Beltsazar kharella, i lab o Deblestar. Un kowa, hoi leste siklo was, well tchatchepah un rakrell i pharo tsirestar. Un job rodas te haiwell lo les, un dikas an i dikepen, hoi kowa kamell te penell. [Job ginell dren:]

²Triin tsele kurke[10] rowom me, o Daniel, an ko tsiro.

³Latcho chapen chom me kek an ko tsiro. Kek mass un kek mool was an miro mui, un makom man gar djeteha dren, bis te kol triin kurke trujel his.

⁴Un ap o 24. (biish-te-starto) diwes an o ersto tchon, homs me tardo pash ko baro lengsto pani Tigris.

⁵Un dikom pre, un dikom i murshes. Kowa his rido an laintikre koola, un i pereskri dori dran sonakai his trul leste.

⁶Un leskro betch un per his har ko kutch bar, hoi kharell Krisolit. Un leskro shero un mui dikas win har koi jag, hoi ap o bolepen pral un tele djal.[11] Un leskre jaka his har jag. Un leskre mussja un herja his har lolo saster. Un leskro rakepen his, har te rakrans bud menshe.

⁷Un me kokres, o Daniel, dikom ko dikepen. Kol mursha, kai pash mande his, dikan kowa gar. Ap lende peras i bari daar, jaake te nashan le un khatran pen.

⁸Un me atchom kokres koi, un dikom ko baro dikepen. Un i tseli soor an mande djas krik; miro mui was parno, un kek soor his buder an mande.

⁹Un me shunom i laba, hoi job rakras. Un har shunom len, perom har mulo ap miro mui ap i phub.

¹⁰Un i wast tapras man. Un mire wasta un tchanga trissan.

¹¹Un job penas ap mande: “Daniel, tu hal kutch o Debleske! De jak ap kol laba, hoi me tuha rakrau! Un ste pre! Me wom kanna pash tute bitchedo.” Un har job kawa mantsa rakras, stom me pre, un mire tsele kokale trissan ap mande.

¹²Un job penas ap mande: “Daniel, ma dare! O Dewel shunas tire laba fun o ersto diwes an, har kamal tiro tselo djijeha o dikepen te haiwell, un tut tiknes kral glan tiro Debleste. Un kol labenge, hoi tu rakral, wom me.

¹³Un o bolepaskro, kai rai hi pral o them Persia tchiwas pes mange an o drom 21 (biish-te-jek) diwessa. Un jek kol glanstunendar mank i bolepangre, o Michael, was ap miri rig, har homs kote pash i rajende pral o them Persia.

¹⁴Kanna wom me, te penap tuke, hoi tire menshenge djal an kol diwessa, kai wenna, un kanna gomme dur glan mende hi. Ninna kau dikepen well tchatcho an o tsiro, kai gomme dur krik hi.”

¹⁵Un har job jaake mantsa rakras, dikom me tele ap i phub, un nai penom buder tchi.

¹⁶Koi was ko jek, kai win dikas har i mensho, un tchiwas peskro gushto ap miro mui. Un me krom miro mui pre, un rakrom, un penom ap koleste, kai glan mande tardo his: “Miro rai, har dikom ko dikepen, tapras man sawi daar, te atchas kek soor an mande.

¹⁷Har nai rakrau me, tiro budepaskro, tuha, miro rai, kanna, kai buder kek soor an mande hi, un kek ducho an mande atchell?”

¹⁸Kote tapras man kowa pale an, kai win dikas har i mensho, un das man pale soor,

¹⁹un penas: “Ma dare gar! Tu hal kutch o Debleske! Lauter te djal tuke mishto! Ab sorelo, ab sorelo!” Un har job mantsa rakras, wom me sorelo, un penom: “Miro rai, rake! Tu dal man soor.”

²⁰Kote penas lo mange: “Haiwal tu, hoske me pash tute wom? Me kamau tute te sikrell, hoi an ko liil tchinlo hi, kai o Debleskro tchatchepen dren tardo hi. Pal kowa hunte kurap man o bolepaskreha, kai hi o rai pral o them Persia, un palle koleha, kai hi o rai pral o grichtikro them. Un kek hi koi, kai well ap miri rig an o kurepen lentsa, kokres o bolepaskro Michael, kai tumare menshenge koi hi.