Read O Debleskro Drom - I Bibla an o Romano Rakepen 2021 Daniel 12 Bible Online

Daniel 12 - O Debleskro Drom - I Bibla an o Romano Rakepen 2021 bible

Daniel 12

¹Un an ko tsiro stell o bolepaskro Michael pre, kowa, kai ap i rig tire menshendar hi. Ko tsiro hi jaake pharo, har das kek wawar glan kowa, jaake rah har menshe koi hi. Un an ko tsiro wenn tire menshe wi-lino dran i bari bibacht, lauter kolla, kai an o Debleskro liil dren tchinlo hi.

²Un bud kolendar, kai tel i phub tchiddo his un sowan, kolla stenn pre, ko jek o djipaske, hoi gar pre herella, un ko wawar i bari ladjake un o praassepaske, hoi buder gar pre herella.

³Un kolla, kai haiwan o Debleskro drom, hi har i momeli ap o bolepen. Un kolla, kai sikran i wawarende o tchatcho drom, hi har i bolepangre momlia hako tsireske.

⁴Un tu Daniel, rike kau lab khatemen. Un pande i dori trul kau liil un tchip tiro sikepen pre, te nai krell les kek pre, bis ko tsiro wella, kai i phub buder gar rah koi hi. Palle rodenn bud koi dren un haiwenn bud un budeder.

⁵Un me, o Daniel dikom: Dui wawar his koi tardo, ko jek ap kai rig o lengsto panjestar un ko wawar ap koi wawar rig.

⁶Un job penas ap ko mursheste, kai an laintikre koola rido his, un pral ko lengsto pani tardo his: “Kaana hi ko tsiro, kai kau baro sorelo koowa pre herella?”

⁷Un me shunom ko murshes, kai an laintikre koola rido his, un pral ko lengsto pani tardo his. Un kowa hadas peskro tchatcho un peskro serwo wast pre ap o bolepen, un das pes sowel pash koleste, koleskro djipen gar pre herella, un penas: “Jek tsiro un dui tsirja un i paash tsiro. Un ap ko tsiro, kai o Debleskre menshe pale khetne djiwenna, un buder gar kate te kote tradedo hi, palle hi kowa lauter kerdo.”

⁸Un me shunom kowa un haiwom les gar. Un me penom: “Miro rai, har djal lauter win?”

⁹Un job penas: “Dja koi, Daniel! Kal laba atchenn khatedo un dre-pandlo, bis te well ko tsiro, kai i phub buder gar rah koi hi.

¹⁰I djia bud menshendar wenn djudjo kerdo un wenn thodo, har sonakai an i jag thodo well. Un i tchilatche krenn dureder o tchilatchepen. un haiwenn kau koowa gar. Kokres kolla, kai o Debleskro drom prindjrenna, haiwenn ninna kau koowa.

¹¹Un ko tsirestar, kai anenn le buder gar hako diwes viechen o Debleske, un kai tchiwenn le koi djungeli tchilatchi figura pre, hi 1.290 (jek-sero-dui-sheel-te-enja-deesh) diwessa.

¹²Bachtelo hi kowa, kai win rikrell bis te 1.335 (jek-sero-triin-sheel-te-trijanda-te-pantch) diwessa trujel hi.

¹³Un tu, Daniel, atch o Debleha tiro tselo djipen! Un palle sob! Te hi kai phubjakro tsiro trujel, steh tu pale pre o djipaske un leh tiro brawlepen.”