Read O Debleskro Drom - I Bibla an o Romano Rakepen 2021 Daniel 2 Bible Online

Daniel 2 - O Debleskro Drom - I Bibla an o Romano Rakepen 2021 bible

Daniel 2

¹Un an ko tsiro, har o Nebukadnezar an o duito bersh o baro rai his, his les i suni, kai les sawi daar kras, te nai sowas lo buder gar dren.

²Un o baro rai mukas khetne te kharell i tsele durkepangren un drawepangren, kolen, kai bengeskro koowa krenn un kolen, kai an i bolepangre momlia drawerenn. Jon hunte penan leske, hoi leskri suni kamell te penell. Un jon wan un his tardo glan leste.

³Un o baro rai penas ap lende: “Me dikom i suni, koja mange palla djal, un me kamau tumendar te djinell, hoi dom suni, un hoi koi suni kamell te penell.”

⁴Kote rakran i durkepangre an aramtikes ap leste un penan: “Maro baro rai, te djiwess hako tsiro! Pen tiri suni ap mende, tire budepangre! Un mer kamah tuke te penell, hoi koi suni kamell te penell.”

⁵O baro rai penas ap lende: “Hi jaake har penom: Tumer hunte penenn mange i suni, un hoi koja kamell te penell. Te krenn tumer kowa gar, palle mukau me tumen an kotja te tchinell, un tumare khera tele te phagell.

⁶Tumer te penenn mange koi suni un hoi koja kamell te penell, palle krau me tumen braweles un bares. Doleske penenn mange koi suni un hoi koja kamell te penell.”

⁷Un jon penan o duito kopo: “Maro baro rai, mer ham tire budepangre. Pen menge tiri suni! Un mer penah tuke, hoi li kamell te penell.”

⁸Un o baro rai penas: “Tchatchepah, me dikau, tumer rakrenn jaake, te well tumen budeder tsiro. Tumer djinenn, kowa hoi me penom, krau ninna tumentsa.

⁹Tumer lan tumenge glan, te rakrenn o chochepen glan mande, bis te well o tsiro wawartchandes. Doleske penau: Te penenn tumer mange gar koi suni, palle well i phagi pral tumende lauterende. Kanna penenn mange koi suni! Palle nai djinau, te nai penenn mange ninna, hoi joi kamell te penell.”

¹⁰Un jon penan ap leste: “Kek mensho ap kai phub nai penell tuke, hoi tu kameh, baro rai! Kek baro rai, har baro un sorelo job ninna his, putchas sawo koowa jekestar mank peskre durkepangre un drawepangre un kolendar, kai an i bolepangre momlia drawerenn.

¹¹Kowa, hoi tu, baro rai, kai kameh, hi jaake pharo, te nai penell kowa kek, kokres i debla. Un kolla djiwenn gar pash i menshende.”

¹²Kote was o baro rai jaake chojedo, te penas lo, te wenn i tsele sikle mursha[2] maredo an o them Babilonia.

¹³Un kau lab was i lurdenge penlo. Un jaake rodan le ninna o Danieles un leskre malen, te marenn le len.

¹⁴Koi djas o Daniel pash o pralstuno lurdeste kolendar, kai dan jak ap o baro rajeste. Leskro lab his Arjoch. Job his kowa, kai win djas, te marell lo i sikle murshen an o them Babilonia. Un o Daniel rakras gosewe labentsa leha un putchas lestar:

¹⁵“Hoske rakras o baro rai sawi phari phagi win?” Un o Arjoch penas o Danieleske, hoi djas.

¹⁶Kote pre djas o Daniel pash o baro rajeste dren, un mangas lestar, te dell lo les i tsiro, te nai penell lo leske, hoi koi suni kamell te penell.

¹⁷Pal kowa djas o Daniel khere, un penas lauter peskre malenge, — un kolla his o Hananja un o Mishael, un o Asarja —

¹⁸te mangenn le o bolepaskro Debles, te well lo lenge latches, un te sikrell lo len ko khatedo koowa, jaake te wenn jon gar maredo khetne kol wawar sikle murshentsa an o them Babilonia.

¹⁹Un an i rati dikas o Daniel i dikepen un leske was koi suni sikedo. Un o Daniel sharas o bolepaskro Debles,

²⁰un penas: Sharedo well o Dewel kanna un hako tsireske! Leske hi o goswepen un i soor.

²¹Job hi o rai pral o tsiro, un dell hakeneste peskro tsiro; job lell i bare rajendar lengro them, un tchiwell wawar rajen dren; job dell i gosewen lengro goswepen un kolen, kai haiwenn tchomone, das job an o shero, te nai haiwenn le.

²²Job tchakrella pre un sikrell, hoi khatedo hi, un djinell, hoi an o tamlepen[3] hi; pash leste hi kek tamlepen.

²³Tu, o Dewel mire phurendar, pash tute parkrau man un tut sharau, te dal man goswepen un soor, un mukal man te djinell, hoi tutar mangam, un sikral man kowa, hoi o baro rai kamell te djinell.

²⁴Un o Daniel djas dren pash o Arjoch, koles o baro rai bitchras, te marell lo i siklen an o them Babilonia. Un o Daniel penas ap leste: “Ma mare i siklen dran Babilonia! An man pash o baro rajeste, te nai penap me leske, hoi leskri suni kamell te penell.”

²⁵Kote anas o Arjoch o Danieles sik pash o baro rajeste un penas ap leste: “Me hatsom i murshes mank kolende, kai wan pandlo dran o them Juda kate anlo. Kowa nai penell tuke, miro baro rai, hoi tiri suni kamell te penell.”

²⁶Un o baro rai putchas o Danielestar, koleskro lab kanna Beltsazar his: “Haiweh tu kowa, te nai peness tu mange, hoi me suni dikom, un hoi koi suni kamell te penell?”

²⁷Un o Daniel penas ap o baro rajeste: “Kowa, hoi tu kameh te djinell, miro rai, kowa nai penell tuke kek siklo, kek drawepaskro, kek durkepaskro un kek, kai nai drawerell an i bolepangre momlia.

²⁸Kanna djin, an o bolepen hi i Dewel, kowa nai sikrell, hoi khatedo hi. Un job mukell o baro rajes Nebukadnezares te djinell, hoi wella an kol tsirja, kai wenna. Ake kowa, hoi suni dal un ko dikepen, hoi dikal, har sowal:

²⁹Har hals ap tiro tchiben tchiddo, djas tuke, baro rai, an o shero trujel, hoi pal kawa lauter wella. Un o Dewel, kai tchakrell pre, hoi khatedo hi, kowa sikras tut, hoi wella.

³⁰Me hom gar gosweder har i wawar, kai ap i phub djiwenna. Man was kawa sikedo, te djiness tu, hoi koi suni kamell te penell, un te haiwess, hoi an tiro dji hi.

³¹Tu, miro baro rai, dikal an i suni i bari figura glan tute tardo. Un i baro railepen djas latar win. Un i figura dikas win, te hunte las jek daar.

³²Lat his i shero, hoi his dran latcho sonakai. Un o betch un i mussja his dran rup. Un o per bis ap i herja his dran lolo saster.

³³Un i pralstune herja his dran saster. Un kotja i pirendar his dran saster, un wawar kotja dran phubjakri tchik.

³⁴Un har dikal ap koi figura, koi peras i bar tele, koles kek mensho witsras. Un ko bar peras ap kol pire dran saster un phubjakri tchik, un das len paash.

³⁵Koi djas i tseli figura paash. Un o saster, i phubjakri tchik, o lolo saster, o rup un o sonakai peran khetne an tikne kotja. Un i ducho phurdas len krik har phuss. Un kek nai hatsas len buder. Un ko bar, hoi koi figura khetne das, was i bari berga, un las i tseli phub dren.

³⁶Kawa hi koi suni. Un kanna kamau o baro rajeske te penell, hoi li kamell te penell:

³⁷Tu miro baro rai, hal o bareder i tsele rajendar. O bolepaskro Dewel kras, te wal baro rai, das tut soor un kras tut bares.

³⁸Un das an tiro wast i tsele themma, kai menshe djiwenna, ninna i viechen an o weesh un i tchirklen tel o bolepen. Un kras tut rai pral lende. Tu hal ko shero dran sonakai.

³⁹Un pal tute well i wawar rai. Kowa hi buder gar jaake sorelo har tu. Un pal koleste well i triinto rai. Koleskro them hi har dran lolo saster, un hi rai pral i tseli phub.

⁴⁰Un ko starto rai hi sorelo har saster. Un jaake har o saster lauter phagell un paash dell, jaake krell job ninna lauter paash, hoi leske an o drom tchiddo hi.

⁴¹Tu dikal, kai i kotja i pirendar dran phubjakri tchik hi un wawar kotja dran saster. Kowa kamell te penell, koi hi budeder themma, hoi gar tchatchepah khetne rikrenna. Kai saster dren hi, kote hi le soreles.

⁴²Un kai kol tsebe dran saster un phubjakri tchik hi, kamell menge te penell, kai o paash them sorelo hi, un o wawar paash gar sorelo.

⁴³Un tu dikal, kai o saster un i phubjakri tchik khetne kerdo hi. Kowa kamell te penell, te romedineran le mank pende, un wan gar jek. Jaake har o saster un i phubjakri tchik nai wenn gar jek.

⁴⁴Un an ko tsiro, kai kol bare raja djiwenna, krell o bolepaskro Dewel jek them, hoi an kek tsiro paash kerdo nai well. Kau them well an kek tsiro wawar menshendar dren lino. Leskro baro rai krell kol wawar rajengre themma paash, un leskri soor atchell hako tsireske.

⁴⁵Kowa kamell ko bar te penell, hoi tu dikal, koles kek mensho witsras. Tu dikal, har was lo i berga tele un das koi figura dran saster, lolo saster, phubjakri tchik, rup un sonakai, an tikne kotja. Jaake mukell tut o baro Dewel te djinell, hoi pal kawa wella. Un kai suni penell o tchatchepen. Un hoi me penom, hoi kai suni kamell te penell, hi ninna tchatcho.”

⁴⁶Kote mukas pes o baro rai Nebukadnezar ap i phub te perell, glan o Daniel, un penas, te chatchrenn le leske chapen un sungepaskro koowa.

⁴⁷Un o baro rai penas ap o Daniel: “Tchatchepah tumaro Dewel hi o Dewel pral i tsele debla, un o rai pral i tsele bare raja ap kai phub. Job sikrell kowa, hoi khatedo his un kek djinas. Jaake nai penal tu menge, hoi koi suni kamas te penell.”

⁴⁸Un o baro rai kras o Danieles baro, un das les bud kutch koowa. Un job tchiwas les pral o tselo them Babilonia, un das les penepaske koi pral un kras, te well lo o pralstuno pral i tsele sikle murshende an o them Babilonia.

⁴⁹Un o Daniel mangas o baro rajestar, te wenn o Shadrach un o Meshach un o Abed-Nego i moskre pral i forja an o them Babilonia. Un kowa was jaake. O Daniel atchas an o baro rajeskro kheer.