Read O Debleskro Drom - I Bibla an o Romano Rakepen 2021 Daniel 3 Bible Online

Daniel 3 - O Debleskro Drom - I Bibla an o Romano Rakepen 2021 bible

Daniel 3

¹O baro rai Nebukadnezar kras i sonakaskri figura, hoi shob-deesh (60) mussja bares un shob mussja buchles his. Un job tchiwas lat pre an o buchlo them Dura. Ko them Dura his an o them Babilonia.

²Un o baro rai Nebukadnezar bitchras murshen win, te anenn le khetne i tsele pralstunen, bare lurden, themeskre rajen, tchatchepangre murshen, lowengre pralstunen, rakepangre, pralstune kliste un lauteren, kai his penepaske pral wawarende. Kolla te wenn pashel, te well koi figura o ersto kopo an-mangedo.

³Un jon halauter wan un his tardo glan koi figura.

⁴Un jek, kai win gole dell, hoi o baro rai kamella, stas pre un das gole: “Menshale dran hako them un rakepen, shunenn, hoi o baro rai tumenge penell:

⁵Te shunenn tumer o bashepen ap i phurdepangre, ap i dorjengre bashepangre un ap i tsele wawar bashepangre, palle hunte witsrenn tumen tele glan koi sonakaskri figura, hoi mukas o baro rai Nebukadnezar pre te tchiwell.

⁶Un kowa, kai witsrell pes gar tele un mangell koi figura gar an, kowa well sik lino un an i bobeskri jag witsedo.”

⁷Un kol tsele menshe, kai khetne wan dran hako them un dran hako rakepen, shunan o phurdepaskro bashepen un o bashepen ap kol dorjengre bashepangre un ko tselo wawar bashepen. Koi witsran le pen tele ap i phub glan koi sonakaskri figura, hoi mukas o baro rai Nebukadnezar pre te tchiwell.

⁸An ko tsiro wan Babilonarja un phukran ap i biboldende.

⁹Un jon penan ap o baro rajeste Nebukadnezar: “O baro rai te djiwell hako tsireske!

¹⁰Tu, maro baro rai rakral un penal: ‘Hakeno, kai shunell o phurdepaskro bashepen, o bashepen ap i dorjengre bashepangre un ko wawar bashepen, kowa hunte witsrell pes tele un hunte mangell koi sonakaskri figura an.

¹¹Un kowa, kai witsrell pes gar glan late tele un mangell lat gar an, kowa hunte well an i bobeskri jag witsedo.’

¹²Un kate hi biboldengre mursha, hoi tu dren tchiwal an pengri budi, te wenn le pralstune an o them Babilonia. Kolla krenn gar, hoi tu penal, un sharenn tiro debles gar un mangenn koi figura gar an, hoi tu mukal pre te tchiwell. Kolla hi o Shadrach, o Meshach un o Abed-Nego.”

¹³Un i bari choli tapras o Nebukadnezar. Un job penas, te anenn le kol triin murshen glan leste. Un i mursha wan glan leste anlo.

¹⁴Un o Nebukadnezar putchas lendar: “Hi kowa tchatcho, Shadrach, Meshach, un Abed-Nego? Kamenn tumer gar miro debles te sharell, un koi sonakaskri figura gar an-mangell, hoi mukom pre te tchiwell?

¹⁵Kanna shunenn: Jaake sik, har shunenn tumer o phurdepaskro bashepen un bashepen ap i dorjengre bashepangre un ko tselo wawar bashepen, witsrenn tumen tele ap i phub, un mangenn koi figura an, hoi me krom! Te witsrenn tumen gar glan late ap i phub, palle wenn tumer gomme kate an i bobeskri jag witsedo! Un koon hi ko dewel, kai nai lell tumen win dran miro wast?”

¹⁶Un o Shadrach, o Meshach un o Abed-Nego penan ap o baro rajeste Nebukadnezar: “Mer hunte penas tuke kate tchi!

¹⁷Maro Dewel, koles mer an-mangah, te kamell job, palle nai lell lo men win dran i bobeskri jag un dran tiro wast.

¹⁸Un ninna te kamell lo kowa gar te krell, tu djiness: Mer sharah tiro debles gar, un mangah gar koi sonakaskri figura an, hoi tu mukal pre te tchiwell.”

¹⁹Kote was o Nebukadnezar jaake pherdi choli, te was leskro mui lolo i choljatar pral o Shadrach, o Meshach un o Abed-Nego. Un job penas soreles, te well o bob efta kope jaake tateder kerdo, har glan ko tsiro.

²⁰Pale penas lo peskre sorleder lurdenge, te pandenn le o Shadrach un o Meshach un o Abed-Nego, un te witsrenn le len an koi bobeskri jag.

²¹Un kolla pandan len un witsran len an koi bobeskri jag. Len his gomme pengre tsele koola ap pende: lengre baja, cholopja un stadja.

²²Un jaake har o baro rai penas, te krenn le, chatchras i jag an o bob soreles, jaake soreles, te tapras li kol murshen, kai kol trinen, o Shadrach un o Meshach un o Abed-Nego pre anan. Un kol mursha chatchran pre.

²³Un o Shadrach un o Meshach un o Abed-Nego peran pandles an i jag.

²⁴Un ap jek kopo kras o baro rai Nebukadnezar bare jaka. Un job stas ap peskre herja, un putchas kol pralstunendar, kai pash leste hi: “Mukam mer gar triin murshen te pandell un len an i jag te witsrell?” “Awa, baro rai, jaake hi!” penan le.

²⁵Job penas: “Me dikau star murshen, kai an i jag trujel djan. Un jon hi buder gar pandlo, un kek dukepen hi ap lende. Un ko starto dikell win har i bolepaskro.”

²⁶Un o Nebukadnezar djas pash ko wudar ko bobestar un das gole: “Shadrach, Meshach un Abed-Nego, tumer budepangre o pralstuno Deblestar, awenn koi win, un wenn pash mande!” Un o Shadrach, o Meshach un o Abed-Nego djan win dran i jag.

²⁷Un i pralstune, i bare lurde, o themeskre raja un wawar pralstune o baro rajestar wan khetne, un dikan penge kol murshen an, un dikan, kai i jag kek soor pral kolende his. Un i balla ap lengre sherja his gar chatchedo. Un lengre baja his gar paash. Un ap lende sungas nai kek i jagakri khand.

²⁸Un o Nebukadnezar penas: “Sharedo well o Dewel, koles o Shadrach un o Meshach un o Abed-Nego an-mangenn. Job bitchras peskro bolepaskres un las peskre budepangren dran o merepen win. Kolla rikran ap leste, un shunan gar ap miro lab, un dan pengro djipen an o merepen. Jon kaman kek wawar debles an-mangenn har pengro Debles kokres.

²⁹Un jaake penau me kanna: Koon i tsele menshendar dran hako them un rakepen rakrell djungeles pral ko Debleste, koles o Shadrach un o Meshach un o Abed-Nego an-mangenn, kowa well an kotja dino. Un koleskro kheer well pash dino. Hi kek wawar dewel, kai nai lell jekes jaake dran o merepen win har job.”

³⁰Pal kowa das o baro rai kol triin murshende bud penepaske an o them Babilonia.

³¹O baro rai Nebukadnezar mukas i liil te tchinell ap i menshende dran hako them un hako rakepen, kai ap i tseli phub djiwenna. “Bari bacht tumenge!

³²Mange hi shukar, te penap tumenge ko baro koowa, hoi o pralstuno Dewel ap mande kras, hoi kek wawar nai krella.

³³Har baro hi kowa, hoi job krell! Har sorelo hi lo un krell, hoi kek wawar nai krella! Job hi un atchell o rai kanna un hako tsireske.”