Read O Debleskro Drom - I Bibla an o Romano Rakepen 2021 Daniel 4 Bible Online

Daniel 4 - O Debleskro Drom - I Bibla an o Romano Rakepen 2021 bible

Daniel 4

¹Me, o Nebukadnezar homs bachtelo an miro kheer, un man his lauter, hoi kamom.

²His jek rati, har homs tchiddo ap miro tchiben, koi dom suni. Un koja kras mange daar. Awa, kowa, hoi dikom, kras mange bari traash.

³Un me penom soreles, te wenn i tsele sikle mursha an o them Babilonia pash mande khetne, te nai penenn le mange, hoi koi suni kamell te penell.

⁴Kote wan pash mande: i tsele durkepangre un drawepangre, un kolla, kai an i bolepangre momlia drawerenn, un kolla, kai i mulen putchenn. Un me penom lenge, hoi me suni dom. Un jon nai penan mange gar, hoi koi suni kamell te penell.

⁵Un o palstuno, koon glan mande was, his o Daniel, kowa kanna Beltsazar kharell pal o lab miro deblestar. Un an leste hi o ducho o bolepangre deblendar. Un ap leste penom:

⁶“Beltsazar, tu pralstuno pral i tsele siklende, djinau, te hi o ducho i bolepangre deblendar an tute, un tuke hi tchi khatedo. Jaake pen mange, hoi miri suni kamell te penell!”

⁷“Kawa hi koi suni, hoi dikom, har homs ap miro tchiben tchiddo: I baro ruk his tardo mashkral ap kai phub.

⁸Ko ruk was bareder un sorleder, jaake te djal lo bis ap o bolepen. Un hakeno ap kai phub nai dikas les.

⁹Leskre patria his shukar, un bud rukengre his ap leste. Un chapaske his hakeneske doha ap leste. Tel leste tchiwan pen i wesheskre vieche tele. Un ap leskre kashta beshan i tchirkle. Un lauter, hoi djiwas, chas lestar.

¹⁰Un har homs gomme tchiddo ap miro tchiben, dikom i bolepaskres, kai was tele dran o bolepen. Kowa las lauter an i jak,

¹¹un das gole: ‘Denn ko ruk trujel! Un denn leskre kashta tele! Tserdenn leskre patria lestar tele! Un witsrenn leskre rukengre trujel, te nashenn i vieche tel leste lestar krik! Un i tchirkle mukenn pengre kashta ninna!

¹²Leskro telstuno kotar i drabentsa[4] hunte atchell an i phub mashkral o senlepen, hoi trul leste bares wella. Un sasterne shelle wenn trul leste pandlo. Un o brishin perell ap leste tele un krell les sapenes. Un har i vieche chal lo o senlepen ap i phub.

¹³Leskro mensheskro dji well lestar krik lino, un i viecheskro dji well leske dino! Un efta bersha djan jaake pral leste krik!

¹⁴I bolepangre, kai lauter an o jak lenn, rakran kowa win. Un jon, kai wenna o Deblestar, kamenn, te well kowa jaake, te dikenn i menshe, te hi o pralstuno Debles i soor pral i rajengre themma, un job len koleste dell, koneste job kamell. Koles, kai tikno hi mank i menshende, nai tchiwell job pral lende.’

¹⁵Kawa hi koi suni hoi his man, o baro rajes Nebukadnezar. Un tu, Beltsazar, pen mange, hoi koi suni kharell! I tsele sikle mursha an mire themma nai penan mange gar, hoi joi kharell. Tu kokres haiweh kowa. An tute hi o ducho o bolepangre deblendar.”

¹⁶Un o Daniel, koleskro lab ninna Beltsazar his, his koi tardo un penas nai kek lab. Koi suni his leske har i dap. Un kowa, hoi leske pashel an leskro shero trujel djas, kras leske bari daar. Kote penas o baro rai ap o Beltsazar: “Kai suni, un hoi joi kamell te penell, hunte krell tuke kek daar!” Un o Beltsazar penas: “Miro rai, kai suni te djal ap kolende, kai kamenn tuke tchilatchepen! Un kowa, hoi koi suni kamell te penell, te djal ap kolende, kolentsa an o tchingepen hal!

¹⁷Ko ruk, koles tu dikal, kowa, kai baro un sorelo was, — jaake baro, te djas lo bis ap o bolepen, un koles hakeno nai dikas, kai lo ninna his ap kai phub,

¹⁸un koleskre patria shukar his, un koles jaake bud rukengre hidjras, te his hakeneske doha te chal, tel koleste i weshengre vieche tchiddo his un i tchirkle ap leskre kashta beshdo his,

¹⁹kowa hal tu, miro baro rai. Tu hal jaake baro un sorelo. Un tiri soor hi baro un djal bis pash o bolepen, un tu wal o rai pral i tseli phub.

²⁰Un tu, baro rai, dikal, har i bolepaskro dran o bolepen tele was, kai lauter an o jak las. Un kowa penas: ‘Denn ko ruk trujel un denn les paash! Leskro telstuno kotar i drabentsa mukenn an i phub un pandenn sasterne shelle trul leste! Job te atchell tchiddo mank o senlepen. Un o brishin perell ap leste tele un krell les sapenes. Un mank i viechende djiwell lo efta bersha.’

²¹Miro baro rai, kai suni kamell tuke te penell, hoi o pralstuno Dewel penas, te well pral tute:

²²Tu weh pale-tchiddo un hunte djiwess pash i viechende un buder gar mank i menshende. Jon denn tut khass te chal har i grumjen. Un tu tchiweh tut win tele. Un o brishin perell ap tute tele un krell tut sapenes. Un efta bersha djan jaake trujel, bis te tu haiweh, te hi o pralstuno Debles i tsele rajengre themma an peskro wast, un job dell kol themma koleste job kamell.

²³Kate was penlo, te atchell o telstuno kotar i drabentsa an i phub tchiddo. Kowa kamell te penell, te less tire rajeskre themma pale, te haiwal, te hi o bolepaskro Dewel o rai pral halauter.

²⁴Doleske, miro baro rai, muk o tchilatcho kowa, un an buder kek doosh ap tute! Un dja an o tchatchepen, un kre latchepen ap i tchorwelende! Palle djal tuke mishto i rah tsiro.”

²⁵Un lauter was jaake pral o baro rajeste, o Nebukadnezar.

²⁶Har 12 (deesh-te-dui) tchonna trujel his, un job pral ap peskro kheer an o foro Babilon trujel djas,

²⁷kharas lo win: “Ake, o baro foro Babilon! Me tchiwom les pre miri bari sorjah, te well lo miro foro, kai hom baro rai. Lauter, kai dikenn les, sharenn miro railepen.”

²⁸Un har kol laba gomme an leskro mui his, was i rakepen dran o bolepen un penas: “Tuke, baro rai Nebukadnezar, well penlo: Tiri rajeskri soor un tire themma hi tutar krik lino.

²⁹Tut tchiwenn le pale, te djiwess pash i wesheskre viechende un buder gar pash i menshende. Un jon denn tut khass te chal har i grumjen. Un efta bersha djan trujel, bis te tu haiweh, te hi o pralstuno Debles i tsele rajengre themma an leskro wast, un job dell kol themma koleste job kamell.”

³⁰Un gomme an ko tsiro, har lo koi pral tardo his, was kau lab tchatcho. Un job was pale-tchiddo un djiwas buder gar mank i menshende. Un job chas khass har i grumja. Un job tchiwas pes win tele. Un o brishin peras ap leste tele un kras les sapeno. Leskre balla wan jaake lengsto har i phora bare tchirklendar, un leskre naja bango har i tchirklengre tsebe.

³¹Un har kol bersha trujel djan, penas o Nebukadnezar: “Me hadom mire jaka pre pash o bolepen. Un me wom pale sasto an miro shero. Un me parkrom man pash o pralstuno Debleste. Les sharom un hadom, kai hako tsiro djiwella. Hako tsiro hi lo o pralstuno. Job hi un atchell o rai.

³²Kolla, kai ap i phub djiwenna, hi har tchi glan leste. Un har job kamella, djal job kol pralstunentsa trujel, kai an o bolepen hi, un ninna kolentsa, kai ap i phub djiwenna. Un kek nai penell leske: ‘Kowa hunte kress tu gar!’ Witar kek nai putchell lestar: ‘Hoi kreh tu kate?’

³³Ap kau emligo tsiro wom pale sasto an miro shero. Un man was miro railepen un barepen pale dino, un miro brawlepen un miro them wan sharedo. Un i pralstune un kol murshen, kai bud penepaske his, wan pash mande, un tchiwan man pale pral miro them dren. Un miri rajeskri soor was gomme bareder.

³⁴Me, o Nebukadnezar parkrau man pash o bolepaskro rajeste un hadau les un sharau les. Lauter, hoi job krell un kras, hi mishto. Un leskre dromma hi tchatcho. Un kolen, kai pen bares krenn, nai krell lo tiknes.”