Read O Debleskro Drom - I Bibla an o Romano Rakepen 2021 Daniel 5 Bible Online

Daniel 5 - O Debleskro Drom - I Bibla an o Romano Rakepen 2021 bible

Daniel 5

¹Un o baro rai Belsazar kras i baro chapen peskre jek-sero (1.000) bareder murshenge. Khetne lentsa pijas lo mool.

²Un mates i moljatar penas lo, te anenn le kol sonakangre un rupene khore, hoi leskro dad Nebukadnezar dran o Debleskro kheer an o foro Jerusalem peha las. Dran kolende kamas lo te pijell khetne peskre bare murshentsa un peskre romjentsa un wawar djuwjentsa[5].

³Un kote anan le kol sonakangre un rupene khore, hoi tchoredo wan dran o Debleskro kheer an o foro Jerusalem. Un o baro rai un leskre bare mursha un leskre romja un wawar djuwja pijan dran kol khore.

⁴Koi pashel sharan le i deblen dran sonakai, rup, lolo saster, wawar saster, kasht un bar.

⁵Ap jek kopo wan gushte diklo har i menshengro wastestar. Un kolla tchinan laba ap i parni massuri, hoi wergel i momelengri hi an o rajeskro kheer. Un o baro rai dikas ko wast, hoi kote tchinell.

⁶Koi was o baro rajeskro mui parno. Un job trashas jaake, te nashras lo haki soor, un leskre herja trissan.

⁷Un o baro rai das sorjah gole un penas, te anenn le i drawepangren pash leste, ninna kolen, kai an i bolepangre momlia drawerenn un kolen, kai i mulen putchenn. Un job mukas kol siklenge dran o foro Babilon te penell: “Hakeno, kai nai drawerella, hoi koi tchinlo hi, un mange nai penella, hoi kowa kharella, kowa well rido an rajengre lole koola, un lell koi pashel i sonakaskri werkli trul peskri meen. Un job well o triinto pralstuno an miro them.”

⁸Kote wan i tsele sikle mursha o baro rajestar koi, un kek lendar nai draweras, hoi koi tchinlo hi. Un kek lendar nai penas o baro rajeske, hoi kowa nai kharella.

⁹Kote tapras o baro rajes Belsazar gomme bareder daar. Un leskro mui was mulo parno, un leskre bare mursha trashan un daran.

¹⁰Win shunas i rajeskri dai i gole, hoi o baro rai un leskre bare mursha kran. Un joi djas an o kheer, kai pilo was, un penas: “Rai, te djiwess hako tsireske! Muk tuke kowa kek daar te krell! Tu hunte wess gar jaake parno.

¹¹Koi hi i mursh an tiro them, an koleste hi o ducho i bolepangre deblendar. An kol diwessa, har tiro dad o baro rai his, sikras pes, kai an leste jaake bud goswepen hi har i deblen hi. Job haiwell un djinell, hoi kek wawar haiwell un djinell. Un tiro dad Nebukadnezar tchiwas les pral i tsele durkepangre un drawepangre un pral kolende, kai an i bolepangre momlia drawerenn, un kai i mulen putchenn.

¹²Kowa, hoi job haiwell, hatseh gar pash i wawareste. Job hi gosewo, nai penell, hoi sunja kamenn te penell, haiwell phare laba, un sikrell pre, hoi kek djinell. Job hi o Daniel. Un o baro rai das les o lab Beltsazar. Muk kanna o Danieles gole te dell, te well lo kai. Un job penell tuke, hoi kawa kamell te penell.”

¹³Un o Daniel was glan o baro rajeste anlo. Un o baro rai putchas lestar: “Hal tu o Daniel, jek kolendar, kai o baro rai, miro dad, pandles dran o them Juda peha anas?

¹⁴Me shunom, te hi o ducho o bolepangre deblendar an tute. Ninna well tuke kowa siklo, hoi i wawarenge khatedo atchell, un hal gosewo un djineh bud koowa.

¹⁵Me mukom i siklen un drawepangren glan mande te anell, te drawerenn le kol laba, hoi koi tchinlo hi, un te penenn le mange, hoi kolla kamenn te penell. Un jon haiwan kowa gar.

¹⁶Tutar shunom, te nai peneh tu, hoi kowa kamell te penell, un te nai tchakreh tu pre, hoi kek djinell. Haiweh tu kanna kol laba te drawerell, hoi kote tchinlo hi un nai peneh mange, hoi kolla kamenn te penell, palle weh tu rido an rajengre lole koola, un leh koi pashel i sonakaskri werkli trul tiri meen. Un tu weh o triinto pralstuno an miro them.”

¹⁷Kote penas o Daniel ap o baro rajeste: “Kowa hoi kameh man te dell, nai rikreh tuke. Un tiro kutch koowa de i wawareste! Ninna jaake kamau tuke kal laba te drawerell, un tuke te penell, hoi kolla kamenn te penell.

¹⁸Tu miro rai! O pralstuno Dewel das tiro dades Nebukadnezar themma, rajeskri soor, barepen un railepen.

¹⁹Doleske daran un trissan i menshe dran hako them un rakepen lestar. Un job maras, jaake har job kamas, un mukas koles te djiwell, kones job kamas, te atchell lo djido. Job hadas menshen un kras wawaren tikno, jaake har leske shukar his.

²⁰Har hadas pes leskro dji, un was job jaake pre-phurdo, te rikras lo glan tchi buder pale, was lo tele witsedo peskro rajeskro beshepaskri. Un o rajeskro barepen was lestar krik lino.

²¹Un job was pale-tchiddo un nai djiwas buder gar mank i menshende. Un leskro dji was har i viecheskro dji. Un job djiwas pash i diwje burike[6]. Un jon dan les khass te chal har i grumjen. Un job tchiwas pes win tele. Un o brishin peras ap leste tele un kras les sapeno, bis ap ko diwes, kai job haiwas, te hi o pralstuno Debles i tsele rajengre themma an peskro wast, un job dell len koleste, koneste job kamell.

²²Un tu Belsazar, leskro tchawo, djinal kawa lauter, un kral tut gar tiknes glan o Debleste.

²³Un tu hadal tut pral leste, ko bolepaskro rajeste, un penal, te anenn le i khore dran leskro kheer glan tute. Un tumer pijan mool dran lende, tu un tire bare mursha, ninna tire romja un wawar djuwja. Un tu sharal i deblen dran rup un sonakai, dran lolo saster un wawar saster, kasht un bar, kol deblen, kai gar dikenn un gar shunenn. Ko Debles, koles tiro ducho an peskro wast hi, un pash koleste tire tsele dromma hi, koles hadal tu gar.

²⁴Doleske bitchras lo ko wast, un kowa tchinas kal laba.

²⁵Un kawa hi kol laba, hoi tchinlo wan: mene, mene, tekel uparsin.

²⁶Un kawa hi, hoi i laba kharenna: ‘mene’ kharell ‘khetne ginlo’[7]. O Dewel ginas i diwessa khetne, kai hal rai; un ko tsiro hi trujel.

²⁷‘Tekel’ kharell ‘ap i waga tchiddo’. Tu wal ap i waga tchiddo, un hal gar phares doha.

²⁸‘Peres’ kharell ‘paash tchinlo’. Tiro them well an dui kotja un well ap i Medarja un i Persarja dino.”

²⁹Har o Daniel kol laba rakras, penas o Belsazar, te riwenn le les an lole rajengre koola, un tchiwenn leske i sonakaskri werkli trul leskri meen. Un job hadas les, te well lo o triinto pralstuno an o rajeskro them.

³⁰An kai rat was o Belsazar, ko baro rai pral o them Babilonia, maredo.