Read O Debleskro Drom - I Bibla an o Romano Rakepen 2021 Daniel 8 Bible Online

Daniel 8 - O Debleskro Drom - I Bibla an o Romano Rakepen 2021 bible

Daniel 8

¹An ko tsiro, har o Belsazar an o triinto bersh baro rai his, dikom me, o Daniel, i dikepen, jaake har glan kowa dikom.

²An miri suni homs an o sorelo kheer an o foro Susa an o them Elam, pash o lengsto pani Ulai.

³Un kote dikom pre, un dikom i bakro glan ko pani tardo. Koles his dui shinga, jek lendar his bareder har ko wawar. Un ko bareder was pal ko tikneder win.

⁴Un me dikom, har das ko bakro peskre shingentsa ap kol triin rigja: kote, kai o kham tele djal, un kote, kai o kham gar well, un kote, kai lo pralstunes tardo hi. Un kek viecho his sorleder har ko bakro. Un koon an leskre wasta peras, koles nai las kek win. Un ko bakro kras, hoi job kamas, un was pre-phurdo.

⁵Un har dom me ap ko bakro jak, kote was i mursh busni dran koi rig, kai o kham tele djal, un leskre herja wan gar ap i phub. Un les his jek baro shing mashkral peskre jaka.

⁶Un koi mursh busni was pash o bakro, koles kol dui shinga his, koles me pash ko pani tardo dikom. Un bari choljah nashas koi busni pash leste,

⁷das les an peskri bari choli, un phagas ko bakreske leskre shinga tele. Un an ko bakro his buder kek soor, te atchell lo tardo. Un koi mursh busni witsras ko bakres tel peste, un stakras les khetne. Un kek was leske ap i rig.

⁸Un koi mursh busni was bareder un bareder. Un har koi busni jaake sorelo was, phagas ko jek shing tele, un star wawar shinga wan kote win, kai glanstunes ko jek his. Un hako shing sikras ap i wawar rig: glan un pal, tchatches un serwes.

⁹Un dran jek lendar was jek wawar tikno shing win. Kowa was bareder un bareder un sikras ap koi rig, kai o kham pralstunes tardo hi, un palle ap koi rig, kai o kham pre djal, un palle ap koi rig, kai o railo them hi.

¹⁰Un ko shing was jaake baro, te was lo bis pash i bolepangre momlia pre, un lendar witsras lo tele ap i phub, un stakras len khetne.

¹¹Awa, ko shing kras pes bareder har ko rai pral i bolepangre lurdende, un kras, te anenn o Debleskre rashaja leske buder gar kol viechen, hoi leske hako diwes anlo hunte wans. Un ninna kras lo o Debleskro kheer pale-tchiddo.

¹²Un i bolepangre lurde wan dino an leskro wast. Un kol vieche, hoi o Debleske hako diwes dino hunte wans, wan leske buder gar anlo, jaake te was o Dewel buder gar sharedo. Un ko shing witsras o tchatchepen ap i phub. Un lauter, hoi kras o shing, djas leske mishto.

¹³Un me shunom i bolepaskres te rakrell. Un i wawar bolepaskro putchas lestar: “Har rah djal kowa, hoi an kau dikepen diklo was? Har rah well o Debleske buder gar kowa dino, hoi leske hako diwes hunte wals? Un har rah well o Debleskro kheer pale-tchiddo kerdo, un ap i bolepangre lurdende trujel stakedo?”

¹⁴Un job penas mange: “Jaake rah har 2.300 (dui-serja-triin-sheel) kope rati un pale diwes was. Palle well lauter an o Debleskro kheer newo kerdo.”

¹⁵Un me, o Daniel, kamoms te haiwell, hoi dikom an kau dikepen. Ap jek kopo his jek glan mande tardo, kowa dikas win har i mursh.

¹⁶Un me shunom jekes gole te dell pral ko pani Ulai, jaake har i mensho gole dell. Un kowa penas: “Gabrijel, pen leske, hoi job kate dikas, te haiwell lo les!”

¹⁷Un o Gabrijel was pash mande, kai me tardo homs. Un i daar tapras man jaake soreles, te perom ap i phub. Job penas ap mande: “Tu mensho, de jak un shun! Kowa hoi dikal, kowa hi ko tsireske, kai o tsiro kai phubjake tele nashell.”

¹⁸Un har job jaake mantsa rakras, homs tchiddo har mulo ap miro mui ap i phub. Un job tapras man un tchiwas man pale ap mire herja, te homs pale tardo.

¹⁹Un job penas ap mande: “Shun, me kamau tute te sikrell, hoi well an ko tsiro, kai o Debleskri choli pral i menshende well. Kowa hi ko tsiro, kai o tsiro kai phubjake tele nashell.

²⁰Ko bakro kol dui shingentsa, hoi tu dikal, kolla hi i bare raja pral i themma Media un Persia.

²¹Un koi mursh busni hi o baro rai pral o grichtikro them. Un ko baro shing, hoi mashkral leskre jaka his, hi ko ersto baro rai.

²²Un kol star shinga, kai wan baro, har ko ersto tele phagas, kolla hi star rajengre themma, kai wenn dran ko jek rajeskro them. Kol star hi gar jaake sorele har ko ersto.

²³Ap ko tsiro, kai lengro rajengro tsiro tele naashedo hi, hadenn pen bud menshe pral o Debleste un krenn baro tchilatcho koowa. Palle stell i baro rai pre, koles hi i tchilatcho mui, un hi i baro chocheno.

²⁴Un les well bud penepaske, ninna te well leskri soor gar dran leste. Un job anell sawi bari bibacht, te nai patsenn le les gar. Lauter, hoi lell lo an o wast, djal leske mishto. Ninna i sorelen dell lo mulo. Un o Debleskre menshen taprell lo an.

²⁵Peskro goswepah chochell lo bud menshen. Un job phurdell pes pre un djal ap budende un marell kolen, kai patsenn, te krell lo lenge tchi. Un ninna hadell lo pes pral o pralstuno rajeste. Un palle well job phagedo kek mensheskro wasteha.

²⁶Un kau dikepen, hoi dikal, un kowa hoi tuke penlo was pral kol viechende, hoi o Debleske buder gar haki rati un haki tsalla anlo wan, kowa hi o tchatchepen. Hi gomme i rah tsiro, bis te kowa jaake wella. Doleske rike les khatedo un ma rake kolestar!”

²⁷Un man, o Danieles, his buder kek soor, un me homs diwessa nasselo. Un pal kowa stom pale pre, un krom miri budi pash o baro rajeste. Un ko dikepen, hoi dikom, kras mange daar un nai haiwom les gar.