Read O Debleskro Drom - I Bibla an o Romano Rakepen 2021 Daniel 9 Bible Online

Daniel 9 - O Debleskro Drom - I Bibla an o Romano Rakepen 2021 bible

Daniel 9

¹His an ko tsiro, har o Darius, ko Medari, an o ersto bersh o baro rai his pral o them Babilonia. Leskro dad his o Ahasveros.

²An kau ersto bersh, kai job kote o baro rai his, dom me, o Daniel, jak ap kowa, hoi an o Debleskre lila tchinlo hi, kote kai penell o baro Dewel ap peskro rakepaskro, o Jeremia, te atchell o foro Jerusalem 70 (efta-deesh) bersha khetne dino tchiddo.

³Un me dikom pre pash o Debleste, miro rajeste, un rodom les un mangom les ropah, chom tchi un riwom man an i gono, un witsrom jagakri tchik pral mande.

⁴Un me rakrom ap miro baro Debleste un mangom man tele, un penom: Ach, miro rai, tu hal o baro Dewel un mer sharah tut. Tu rikreh tiro lab, hoi kolenge dal, kai kamenn tut o djijestar un rikrenn tire laba. Un hal lenge latches.

⁵Mer anam bari doosh ap mende, kram, hoi gar mishto hi, atcham gar tuha un mukam tiro drom. Mer djiwam gar pal tire laba un pal tiro tchatchepen.

⁶Un mer shunam witar gar ap tire budepangre, kol rakepangre, kai rakran tuke ap mare rajende, pralstunende, phurende un ap mare tsele menshende.

⁷Tu, rai, hal an o tchatchepen. Un mer hunte ladjas men, mer, kai wah dran o them Juda un dran o foro Jerusalem, ninna dran o tselo them Israel. Mer kram tchilatcho koowa ap tute. Doleske tradal men an wawar themma, kai dur hi un kai gar jaake dur hi, te djiwas buder gar khetne.

⁸Awa, baro Dewel, mer hunte ladjas men, mer, mare raja, mare pralstune un mare phure, te kram tchilatcho koowa ap tute.

⁹Maro rai un Dewel, tut hi i baro dji un hal kowa, kai lell i doosh krik. Mer mukam tiro drom,

¹⁰un shunam gar ap kowa, hoi tu, maro baro Dewel, menge penal, un djam gar ap tiro drom, hoi sikran men tire rakepangre, kai tuke budran un menge tire laba penan.

¹¹Un o tselo Israel djas tiro dromestar tele, un kras, hoi job kamas, un shunas gar ap tute. Un jaake was koi tseli bibacht pral mende, hoi tchinlo hi an o liil o Mosestar, koles tiro tchatcho wast his. Mer kram tchilatchepen ap tute. Doleske was kai bibacht jaake pral mende, har tu tut sowel dal.

¹²Un tu rikral tiro lab un anal kowa, hoi penal, pral mende un pral mare tchatchepangre murshende, hoi menge o tchatchepen win krenn. Koi bibacht, hoi mukal pral mende te well, his jaake baro, te was tel o tselo bolepen sau koowa gar diklo har kowa, hoi an o foro Jerusalem djas.

¹³Jaake har an o Moseskro liil tchinlo hi, jaake was ninna koi bari bibacht pral mende. Un mer mangam men gar tele glan tute, maro baro Debleste, un mukam gar maro tchilatcho drom, un dam gar jak ap tiro tchatchepen.

¹⁴Un jaake dal tu jak, baro Dewel, te well koi bari bibacht pral mende. Tchatchepah, tu maro baro Dewel hal an o tchatchepen an halauter hoi kreh. Un mer shunam gar ap tute.

¹⁵Maro rai un Dewel, tu sikral tiri soor, har anal tire menshen win dran o them Egiptia, un kral tiro lab bares bis kau diwes. Mer anam doosh ap mende. Mer kram tchilatcho koowa.

¹⁶Ach, maro rai, kre pal tiro tselo tchatchepen! Un muk tiri choli pale te djal! Ab buder gar chojedo ap tiro foro Jerusalem un ap koi berga, kai tu djiwal. Mer un mare phure anam doosh ap mende un kram tchilatcho koowa. Un kolla lauter, kai djiwenn trul mende, praassenn doleske tiro fores Jerusalem un tire menshen.

¹⁷Kanna, maro Dewel, shun miro mangepen! Shun har me, tiro budepaskro, ap tute rowau. Dik pale latches ap tiro kheer, hoi khetne dino koi tchiddo hi. Kre kowa, te djinell hakeno, tu hal o tchatcho Dewel!

¹⁸Miro Dewel, shun miro mangepen! Kre tire jaka pre un dik i tele-phagede barra ko forestar, hoi pal tiro lab kharedo hi. Glan tute ham tchiddo maro mangepah un dikah gar ap o tchatchepen hoi mer krams, na-a mer dikah ap tute, te kress tu tiro baro dji menge pre.

¹⁹Ach rai, shun! Ach rai, le mari doosh krik! Ach rai, shun un kre tchomone! Kre les sik! Gar menge, tuke kre les, miro Dewel! Tiro foro un tire menshe wenn pal tiro lab kharedo.

²⁰Un har me jaake miro baro Debleha rakrom, un man tele mangom, un leske miri doosh un i doosh mire menshendar Israel penom, un me glan leste trul o Debleskri berga rowom,

²¹koi was ap jek kopo ko mursh Gabrijel ap tchirklengre mussja[9] pash mande dren. Koles dikom an o dikepen ap ko tsiro, kai rati o Debleske i viecho anlo well.

²²Un job rakras mantsa, te sikrell lo man tchomone, un penas: Daniel, kanna wom pash tute, te sikrap tute, har te haiwess ko dikepen.

²³Har mangal o Debles, un rakral tire erste laba win, lom i lab lestar. Un me wom, te penap tuke kau lab. Tu hal kutch o Debleske. Kanna de jak, hoi penau, te haiwess, hoi ko dikepen kamell te penell.

²⁴Efta kope efta-deesh (70) bersha hi ko tsiro, hoi o Dewel peske glan tchiwas, te well o tchilatchepen un i doosh krik lino tire menshendar un dran o Debleskro foro. Palle well i phagi krik lino un ko tchatchepen well, hoi hako tsiro atchella. Un kowa, hoi an o dikepen diklo was, well tchatcho, ninna kowa, hoi o Debleskre rakepangre glan-wi penan. Un o Debleskro kheer well pale newes o Debleste dino.

²⁵Kanna dikess un haiwess: Har ko lab penlo was, te well o Jerusalem pale newes kerdo bis pash ko tsiro, kai well i rai o Deblestar bitchedo, djan efta kope efta bersha trujel. Un pal efta kope 62 (shob-deesh-te-dui) bersha hi lo pale newes kerdo peskre dromentsa un sorele kherentsa, ninna te hi kowa an i pharo tsiro bud kurepah.

²⁶Un pal kol efta kope 62 (shob-deesh-te-dui) bersha well ko rai maredo, kai o Deblestar bitchedo was. Un kek his ap leskri rig tardo. Un palle wenna lurde jek rajestar, kai gomme wella, un denn o fores un o Debleskro kheer paash. Un jon djan tele har an i baro pani. Un jaake rah har i phub gomme koi hi, atchell kurepen un marepen. Kowa hi i wi-kerdo koowa.

²⁷Un job krell pes budentsa khetne efta bershenge. Pal triin-te-paash bersha krell lo, te well o Debleske buder kek viecho anlo, witar kek chapen. Un i djungeli tchilatchi figura well pre-tchiddo an o Debleskro kheer un atchell koi, bis te well i phagi pral koleste, kai tchiwas les koi, — i phagi, hoi o Dewel leske glan dikas.