Read O Debleskro Drom - I Bibla an o Romano Rakepen 2021 Hosea 1 Bible Online

Hosea 1 - O Debleskro Drom - I Bibla an o Romano Rakepen 2021 bible

Hosea 1

¹Kawa hi o lab, hoi penas o baro Dewel ap o Hosea, koleskro dad o Beeri his, an ko tsiro, har o Usija, o Jotam, o Ahas un o Hiskija kol bare raja pral o them Juda his, un o Jerobeam, koleskro dad o Joash his, ko baro rai pral o them Israel his.

²Har rakras o baro Dewel o ersto kopo ap o Hosea, te penell job leskre laba i menshenge, penas lo ap leste: Rode tuke i lubni un romedine lat! Tut hunte well tchawe, kai i lubjatar ap i phub anlo wenn. Jaake sikreh: I menshe an kau them hi har i lubni: Jon mukan man un nashenn wawar deblenge palla.

³Un o Hosea djas koi, un romedineras i Gomer, kolakro dad o Diblajim his. Un joi was wawartchandes un anas leske i mursh tchawes ap kai phub.

⁴Un o baro Dewel penas ap leste: De les ko lab Jesreel! An i tikno tsiro anau ap o rajeskro kheer koi doosh pale, hoi o baro rai, o Jehu, ap peste anas, har maras lo bud mire menshendar an i tala Jesreel. Un krau, te hi o themes Israel buder kek rai.

⁵An ko tsiro krau, te wenn kote an i tala Jesreel i Israelengre lurde dino.

⁶Un i Gomer was o duito kopo wawartchandes, un anas i tchai ap i phub. Kote penas o Dewel ap leste: De lat ko lab Lo-Ruhama![1] Man hi buder kek dji i menshenge dran o kheer Israel, un bistrau lengri doosh buder gar.

⁷I menshenge dran o kheer Juda krau miro dji pre. Me, o baro Dewel, hom lengro Dewel, un wau lenge ap i rig. Kowa krau gar o bogeha, o chareha, un o kurepaskro koowa, witar gar i grajentsa un i kurepangre wurdjentsa.

⁸Un har joi i Lo-Ruhama buder kek tchutchja das, was li pale wawartchandes, un anas i mursh tchawes ap kai phub.

⁹Un o Dewel penas: De les ko lab Lo-Ammi![2] I menshe an Israel hi gar mire menshe, un me hom gar lengro Dewel.