Read O Debleskro Drom - I Bibla an o Romano Rakepen 2021 Hosea 12 Bible Online

Hosea 12 - O Debleskro Drom - I Bibla an o Romano Rakepen 2021 bible

Hosea 12

¹O baro Dewel penell: O chocheno rakepen i menshendar an o them Efrajim hi trul mande. O kheer Israel chochell man wawar deblentsa. Ninna i menshe an o them Juda rikrenn pen gar ap mande, ko tchatcho Debleste, kai rikrell peskro lab.

²O Efrajim kamell o ducho dren te taprell, un nashell o tato ducho palla, kai well kotar, kai o kham pre djal. Un hako diwes krell lo budeder chochepen un randepen[19]. Jon tchiwenn pen o themeha Assur khetne, un anenn djet an o them Egiptia.

³Ninna i menshenge an o them Juda rikrell o baro Dewel lengro tchilatcho koowa glan i jaka. Job dell o Jakobes peskri phagi koleske, hoi lo kras, un har lo djiwas.

⁴Har lo an o per peskri datar his, chochras lo peskro phrales. Un har lo i mursh was, kuras lo pes o Debleha.

⁵Job kuras pes o bolepaskreha un was o sorleder, un mangas lestar o ropah latchepen. Un o Dewel hatsas les pash Betel un rakras kote leha,

⁶job, o rai pral o bolepen un i phub, leskro lab hi ‘baro Dewel’.

⁷Tumer Israelitarja, awenn pale pash tumaro Debleste! Krenn, hoi latcho un tchatcho hi! Hako tsiro rikrenn tumen ap tumaro Debleste!

⁸O Efrajim hi har i parepaskro. An leskro wast hi i waga, hoi o chocheno pharepen sikrell. Job hi bachtelo, te nai dell lo i wawaren pral o kand.

⁹Job penell peske: Me wom brawelo, un lom mange i baro brawlepen khetne. Hi kowa i tchilatcho koowa? Hoi hi djungelo koleha, hoi mange khetne lom?

¹⁰Me, o baro Dewel, hom tiro Dewel fun ko tsiro, kai anom tut dran o them Egiptia. Me mukau tut pale an plachtene khera te djiwell, har an ko tsiro, har homs pash tute an o mulo tato them.

¹¹Me rakrom ap mire rakepangre, un sikrom lende bud kope, hoi wella. Dran lende mukom tumenge trad te dell[20].

¹²An o foro Gilead mangenn le chochene deblen an. Tchi-moldo hi kolla, kai kowa krenna! An o foro Gilgal marenn le gurma i chochene deblenge. Doleske wenn lengre pre-tchidde barra[21] trujel dino, un atchenn tchiddo ap i hachetikri phub.

¹³O Jakob hunte nashas peske an o them Aram, un o Israel hunte budras i wawareske, te lell lo i romjat, un hunte das jak ap i bakre, te nai romedinerell lo lat.

¹⁴O baro Dewel bitchras peskro rakepaskres, te anell lo i Israelitarjen dran o them Egiptia win. Un leskro rakepaskro das jak ap lende.

¹⁵O kheer Efrajim dukas o baro Debles un kras les chojedo. Doleske well o rat kolendar, kolen jon maran, pral lende. Un lengro rai anell koi ladj ap lende pale, hoi le leske kran.