Read O Debleskro Drom - I Bibla an o Romano Rakepen 2021 Hosea 13 Bible Online

Hosea 13 - O Debleskro Drom - I Bibla an o Romano Rakepen 2021 bible

Hosea 13

¹His i tsiro, koi trissan i menshe, te rakras o Efrajim. Jaake an-diklo his lo an o them Israel. Palle was i tsiro, koi djas lo o Debleskro dromestar tele, un mukas pes o debleha Baal dren. Kowa his leskro merepen.

²Un kanna krell o kheer Efrajim budeder tchilatcho koowa: Dran pengro rup krenn le penge figure, hoi wi-dikenn, har jon kamenn, un hoi le an-mangenn. Mursha, kai lengri budi mishto haiwenn, krenn len pengre wastentsa. I menshenge well penlo: Koon anell tchomone o Debleske, hunte tchumrell kal rupene terne grumjen[22]!

³Doleske hi le har i wolka, hoi taissarlakro sik krik djal, un har ko pani, hoi ap o senlepen hi, un sik buder gar koi hi. Awa, har o phuss hi le, hoi well dran i platsa win phurdedo, kai o djob win dino was, un har i jagakro ducho, hoi tserdell dran i wochni win.

⁴Me o baro Dewel, hom tiro Dewel, fun ko tsiro, kai anom tut dran o them Egiptia win. Tu te prindjress kek wawar debles har man, Un kek wawar nai lell tut dran o merepen win har me kokres.

⁵Me hom, kai dom garda ap tumare phurende an o mulo tato them, kote kai kek senlepen hi.

⁶Un har dom len te chal, un jon tchalo wan un len doha his, phurdan le pen pre, un bistran man.

⁷Jaake wau lenge har i lewo, un har i diwji margodja taprau len tele ap o drom.

⁸Me perau pral lende har i baro diwjo viecho, koleske i tchawe krik line wan. Me dandrau len an kotja un chau len pre har i lewo, awa, har i diwjo viecho dandrau len khetne.

⁹Israel, mange sikral o dumo, kai me kokres kowa hom, kai nai lell tut dran o merepen win. Jaake aneh bibacht pral tute.

¹⁰Kai hi tiro baro rai, kowa kai well ap tiri rig an tire tsele forja? Kai hi tire tchatchepangre raja? Tumare phure penan: Tchip i rai un pralstune pral mende!

¹¹Me dom tumen i rai an miri choli, un an i choli lom les tumendar pale krik.

¹²Ko tchilatcho koowa, hoi o Efrajim kras, hi an i liil tchinlo, hoi hi khetne pandlo un mishto khatedo.

¹³Duka wenna pral leste, har i djuwjat duka hi, kai anell i ternepen ap i phub. O Efrajim hi har i ternepen, kai haiwell gar, te was o tsiro, kai well lo boldo, un job kamell gar win te well.

¹⁴Ginap me len win dran i soor, hoi o mulengro themes hi? Lap me len win dran o merepen?[23] Tu, merepen, kai hi tut ko nasslepen, ap koleste i menshe merenn? Tu, mulengro them, kai hi tut ko pharo nasslepen, hoi anell i menshen pash tute? Kal menshe khaitenn man buder gar.

¹⁵Ninna te hi o Efrajim mank peskre phralende har i senelo ruk, hoi hidjrell latche rukengre, bitchrell o baro Dewel i tato ducho, hoi well kotar, kai o kham pre djal. Dran o mulo tato them well lo, un krell, te wenn i tsele panja truk. Un job lell leskro tselo brawlepen lestar krik, — ko tselo kutch koowa.