Read O Debleskro Drom - I Bibla an o Romano Rakepen 2021 Hosea 2 Bible Online

Hosea 2 - O Debleskro Drom - I Bibla an o Romano Rakepen 2021 bible

Hosea 2

¹Un i Israelitarja wenn jaake bud har i santa pash o baro pani hi. Kek nai penella, har bud kote tchiddo hi. His i tsiro, kai penas o Dewel ap lende: “Tumer han gar mire menshe.” Palle well i tsiro, kai ap lende penlo well: “Tumer tchawe o djido Deblestar!”

²Palle wenn i menshe dran o them Juda un i menshe dran o them Israel khetne. Un khetne rodenn le penge jek pralstunes win, te well lo o rai pral lende. Un jon djiwenna an o tselo them.[3] Hawo baro diwes well ko diwes, kai djal jaake, har o lab Jesreel kharell[4]!

³Penenn tumare phralenge, te hi le mire menshe, un ap tumare phenja, te krau me miro dji lenge pre.

⁴O baro Dewel penell: Penenn, hawi doosh o them Israel ap peste anas! O them Israel, tumari dai, hi buder gar miri romni, un me hom buder gar lakro rom. Mangenn latar, te lell li kowa krik, hoi sikrell, te hi li i lubni, — ko koowa an lakro mui un kowa, hoi hidjrell li ap peskri betch.

⁵Te krell li kowa gar, palle riwau lat win, te hi li nanges tchiddo, har ap ko diwes, kai li boldo was. Un krau, te well o them i mulo them, kai kek pani hi, kai hunte merell li i trushatar.

⁶Lakre tchawe hi i lubjengre tchawe. Lenge krau miro dji gar pre.

⁷Lengri dai nashas wawar murshenge palla, un anas ladj ap peste. Joi penas peske: “Me kamau mire pirnenge palla te nashell: Jon denn man, hoi man hunte well djipaske: Maro un pani, bakrengre balla un laintikre thaba, djet un mool.”

⁸Doleske tchiwau subjengre burra ap lakro drom un krau i massuri, te nai hatsell li peskro drom gar.

⁹Un te nashell li peskre pirnenge palla, un nai lell len gar dren, un te rodell li pal lende, un nai hatsell len gar, palle penell li: “Me kamau pale pash miro ersto romeste te djal. An ko tsiro djas mange feteder har kanna.”

¹⁰Joi kamas gar te haiwell, kai me homs kowa, kai dom lat djob, mool un djet, ninna bud rup un sonakai. Un kowa das li o mulo debleske, o Baal.

¹¹Doleske kamau miro djob un mire drake pale te lell an ko tsiro, kai le baro wan, un dren anlo wans. Ninna lau latar mire bakrengre balla, un miro laintikre thaba lakre ripjenge.

¹²Glan lakre pirnengre jaka riwau lat nanges win. Un kek nai lell lat dran miro wast win.

¹³Me krau, te wenn i Israelitarja buder gar bachteles khetne ap kol bare diwessa. Ap kek Debleskro diwes[5], ap kek diwes, kai well o newo tchon diklo, un ap kek wawar baro diwes wenn le buder khetne.

¹⁴Me krau lakre drakengre ruka paash, ninna lakre faigetikre ruka, kolendar joi penas: “Kolentsa plaissran man mire pirne.” Me krau i diwjo weesh dran lende. Un kol rukengre, hoi pral atchenn, chan i diwje vieche.

¹⁵Me dau lat i phagi hako diweske, kai nashas li peskre pirnenge palla, kol chochene deblenge, un chatchras sungepaskro koowa lenge, un tchiwas kanengre un werklia ap peste; te krell li pes shukar lenge. Un man bistras li! Kowa penell o baro Dewel.

¹⁶Doleske dik, me kamau lat te tserdell, un kamau lat an o mulo tato them te anell. Un kote rakrau kamles lah.

¹⁷Kote dau late pale lakro drakengro them, un koi tala Achor[6] well lake har i baro wudar, pal koleste lake o kham pre djal. Un kote nashell li pale kamles pal mande, har an ko tsiro, kai li terno his, har an ko tsiro, kai li dran o them Egiptia djas.

¹⁸Palle, penell o baro Dewel, kharell li man pale ‘miro rom’, un gar buder ‘miro Baal’[7].

¹⁹Un me krau, te lell li o lab ‘Baal’ buder gar an o mui. Hako tsireske wenn i laba kol chochene deblendar bistedo.

²⁰An ko tsiro krau i diwje viechentsa, i tchirklentsa un i sapentsa win, te krenn le lake kek tchilatchepen. Me phagau o tselo kurepaskro koowa paash, i boge un i chare an o them. Un mukau len kek darjah kote te djiwell.

²¹Israel, tu weh miri romni hako tsireske. Me djau tuha trujel, har mishto un tchatcho hi. Me hom latches ap tute, un krau miro dji pre tuke.

²²Me atchau hako tsiro pash tute. Un tu prindjreh man, o baro Debles.

²³An ko tsiro, penell o baro Dewel, kamau te shunell: Me shunau, hoi o bolepen mandar mangell, un o bolepen shunell, hoi i phub lestar mangell.

²⁴Un i phub shunell, hoi o djob, i drake, un i djeteskre ruka latar mangenn. Un jon shunenn, hoi o Jesreel[8] lendar mangell.

²⁵Un me anau i Israelitarjen pale an o them, te wenn le kote i bari natsjona. Un man hi pale i dji lenge, kai kharedo wan: ‘Les hi kek dji lenge.’ Un ap kolende, kai kharedo wan: ‘Gar mire menshe’ penau palle: ‘Mire menshe’. Un jon penenna: ‘Miro Dewel’.