Read O Debleskro Drom - I Bibla an o Romano Rakepen 2021 Hosea 4 Bible Online

Hosea 4 - O Debleskro Drom - I Bibla an o Romano Rakepen 2021 bible

Hosea 4

¹Tumer Israelitarja, shunenn, hoi o baro Dewel tumenge penell! O baro Dewel hunte tchingrell tumentsa, kai djiwenn an o them Israel. Tumer rikrenn gar khetne, han gar kamles jek o wawareha un prindjrenn o Debles gar.

²Kowa, hoi pash tumende hatslo well hi koshepen, chochepen, tchorepen, menshe wenn mulo dino, un bud mursha chochenn pengre romjen, un bud djuwja pengre romen. Un jon marenn jekes pal o wawares.

³Doleske trushell o them, un i menshe merenn; ninna i diwje vieche, i tchirkle un i matche hunte merenn.

⁴Kek te tchingrell ap i wawareste un penell: ‘Kowa hi tiri doosh.’ Na-a, kokres tumentsa, kol rashajentsa hunte tchingrap, penell o baro Dewel.

⁵Doleske perenn tumer rashaja ap o diwes, un o Debleskro rakepaskro, kai pash tumende hi, perell ratsjake. Un o kheer Israel, tumari dai, krau paash.

⁶Mire menshe prindjrenn o tchatcho drom gar. Doleske djan le tele. Tumer kaman lenge gar miro drom te sikrell. Doleske kamau me tumendar witar tchi te djinell. Tumer han buder gar mire rashaja. Tumer bistran miro drom. Doleske bistrau tumare tchawen.

⁷Jaake har tumer rashaja bud un budeder wan, kran tumer bud un budeder tchilatchepen ap mande. Doleske krau, te wenn buder gar an-diklo, un witsrau tumen an i ladj.

⁸Tumer rashaja chan ko mass, hoi denn i menshe o Debleste pengri doshake. Doleske han tumer bachtelo pral i menshengri doosh.

⁹Doleske djal i rashajenge jaake har kol wawar Israelenge: Me dau tumen lauteren i phagi, un dau tumen pale pal kowa, hoi tumer kran.

¹⁰Tumer mukan man, o baro Debles, te djan wawar deblenge[9] palla. Doleske chana un wenn gar tchalo, djan bud djuwjentsa un lenn gar bud tchawe.

¹¹Mool — phuri mool un newi mool — krenn, te haiwenn i menshe buder gar, hoi latcho un hoi tchilatcho hi.

¹²Mire menshe putchenn pengre deblen un wawar kashta, te penenn jon lenge, hoi te krenn le. Lengre djia nashenn i chochene deblenge palla. Har i lubni mukell peskro romes, nashan le mandar, pengro Deblestar, krik.

¹³Pral ap i berge marenn le viechen pengre chochene deblenge, un ap i tikne berge chatchrenn le lenge sungepaskro koowa, tel i bare un buchle ruka, kai gar jaake tato hi un shukar te beshell. Doleske wenn lengre tcha lubja, un lengre tchawengre romja chochenn pengre romen.

¹⁴Kek phagi dau tumare tchenge, witar gar tumare tchawengre romjenge koleske, hoi le kran. Na-a, tumenge murshenge dau i phagi. Tumer djan i lubjentsa ap i rig, un chan khetne lentsa o mass kol viechendar, hoi i chochene deblenge maredo wan. Un i menshe, kai dikenn kowa, un djinenn gar, hoi latcho un hoi gar latcho hi, jon perenn o tchatcho dromestar tele.

¹⁵Israel, ninna te kameh tu tut trujel te lubrell, kamau gar, te krenn i menshe an o them Juda sau koowa har tu, un anenn doosh ap pende. Ma djan an i forja Gilgal un Bet-Awen, te mangenn kote i chochene deblen an! Un ma denn tumen kote sowel un penenn “Me dau man sowel pash o djido Debleste.”

¹⁶I menshe an Israel hi har i diwji grumni, un mukenn pen tchi te penell. Har nai krals o baro Dewel lentsa, har te wans le tikne bakre, un nai anals len win ap i buchlo kotar phub, te hatsenn le kote senlepen?

¹⁷I menshe an o them Efrajim mukan pen chochene deblentsa dren. Mu te krenn le har kamenn le!

¹⁸Jon pijenn pen mates, un palle lubrenn le trujel. Jon nashenn wi-ladjedo koowa palla, un ladjenn pen gar.

¹⁹I sorelo ducho taprell len un hidjrell len krik. Un ladj well ap lende doleske, kai maran jon viechen kol chochene deblenge.