Read O Debleskro Drom - I Bibla an o Romano Rakepen 2021 Hosea 5 Bible Online

Hosea 5 - O Debleskro Drom - I Bibla an o Romano Rakepen 2021 bible

Hosea 5

¹Tumer rashaja, shunenn kowa! Un denn garda, tumer dran o kheer Israel! Ninna tumer dran o baro rajeskro kheer, shunenn kal laba! Tumer hunte dans jak, te well o tchatchepen kerdo. Un tumer anan i menshen jaake dur, te mangenn le chochene deblen an. Lenge wan tumer har pandle dorja, hoi jek win tchiwas an o foro Mizpa, un har i netsa, koleha jek tchirklen taprell ap i berga Tabor.

²Tumer, kai peran tele mandar, anan bari doosh ap tumende. Doleske dau tumen halauteren tumari phagi.

³Me prindjrau o Efrajim[10] mishto, un kowa hoi o Israel krell, hi gar khatedo glan mande. O Efrajim lubras pes trujel, o Israel kras pes pale-tchiddo.

⁴Ko tchilatcho koowa, hoi le kran, rikrell len pale, te wenn le pash mande. Jon nai mukenn gar tele, te mangenn le chochene deblen an. Man, o baro Debles, prindjrenn jon gar.

⁵Lengre pre-phurde djia sikrenn, har bud doosh ap lende hi. Dran lengri doosh perenn i Israelitarja an i bibacht. Ninna i menshe dran o them Juda perenn lentsa khetne.

⁶Palle wenn le pengre bakrentsa un pengre grumjentsa, te anenn le len o baro Debleske, te well job lenge latches. Un job sikrell lenge o dumo, te nai hatsenn le les gar.

⁷Jon phagan mantsa, o baro Debleha, un anan tchawe ap i phub, kai man gar prindjrenn. Doleske wenn le halauter krik lino an kol diwessa, kai well o newo tchon diklo, — jon khetne pengro themeha.

⁸Phurdenn an i phurdepaskri an i forja Gibea un Rama! Denn i kurepaskri gole an o foro Bet-Awen! Tumer kurepangre dran o kheer Benjamin, nashenn glan, mer nashah tumenge palla!

⁹An ko tsiro, kai dau o Efrajimeske peskri phagi, well leskro them i mulo them. Halauter, hoi i Israelenge trad dom, well jaake har penom.

¹⁰I pralstune an o them Juda lan penge o themestar, hoi i Israelenge his. Jon hi har kolla, kai tchiwenn kol barra i kotar krik, hoi sikrenn har baro jekeskro kotar phub hi. Doleske tchorau miri choli pral lende win har pani.

¹¹O Efrajim las pes glan, te nashell lo i chochene deblenge palla.[11] Doleske well lo kanna tele rikedo. Un leskro tchatchepen well i pirentsa stakedo.

¹²Me hom o khereske Efrajim har i motta, hoi chal i ripen paash. Un o khereske Juda hom har i kirmo, hoi chal o kasht paash.

¹³Har dikas o Efrajim peskro nasslepen un o Juda peskro dukepen, djas o Efrajim an o them Assur, un putchas kote o baro rajestar, te well lo leske ap i rig. Kowa nai well tumenge gar ap i rig, witar gar nai krell lo tumaro dukepen sasto.

¹⁴Me hom o themeske Efrajim har i lewo, un o khereske Juda har i terno lewo. Me dandrau len an kotja, un djau mange. Me hidjrau len krik, un kek nai lell len dran miro wast win.

¹⁵Me djau mange pale kote, kai khere hom, bis te dikenn le pengri doosh dren un rodenn man. Te djal lenge gar mishto, palle putchenn le pale pal mande.