Read O Debleskro Drom - I Bibla an o Romano Rakepen 2021 Hosea 7 Bible Online

Hosea 7 - O Debleskro Drom - I Bibla an o Romano Rakepen 2021 bible

Hosea 7

¹Hako kopo, kai kamau mire menshenge lauter pale mishto te krell, palle sikrell pes, hawi doosh o Efrajim[12] ap peste anas, un har baro o tchilatchepen kol menshendar an o foro Samaria hi. Jon hi chochepangre. Tchorepangre phagenn an i khera dren. Un randepangre tchorenn i menshen win ap o drom.

²Un kowa djal gar an lengro shero dren, te djinau me lengro tselo tchilatchepen. Lengro tchilatcho koowa hi trul lende trujel, un hi mange tardo glan mire jaka.

³Pengro tchilatchepah krenn le o baro rajes bachtelo, un pengro chochepah i pralstunen.

⁴Jon halauter hi phukepangre. Lengri choli chatchell har i jag an i bob, hoi hi jaake tato, te hunte dell o pekepaskro buder gar jak koi pre, jaake rah har krell lo o maro, hoi kamell lo te pekell.

⁵Ap maro baro rajeskro diwes pijenn pen i pralstune mates i moljatar. Un o baro rai beshell pes khetne kolentsa, kai san pral halauter.

⁶An ko tsiro, kai lenn le penge tchilatcho koowa glan, hi lengro dji tato har i bob. I tseli rati sowell lengri choli, taissarlake chatchell li pre har i bari jag.

⁷Halauter lendar chatchenn i choljatar har i bob. Jon marenn pengre tchatchepaskre rajen. Lengre bare raja perenn jek pal o wawar. Un kek lendar dell pal mande gole.

⁸O them Efrajim djal khetne wawar thementsa. O Efrajim hi har i paash-pekedi merkli, hoi was gar trujel rissedo.

⁹I wawar menshe chan leskri soor, un job haiwell kowa gar. O Efrajim hi har i phuro mursh, koleskre balla parno wan. Un job haiwell gar, kai leskro tsiro sik trujel hi.

¹⁰I Israelengre pre-phurde djia sikrenn, har bud doosh ap lende hi. Ninna te hi kowa jaake, wenn le gar pale pash mande, lengro baro Debleste, un rodenn man gar.

¹¹O Efrajim hi har i dineli tauba, kai mukell pes sik te kharell. Ap jek diwes kharell lo i Egiptarjen, te wenn le leske ap i rig, o wawar diwes nashell lo an o them Assur.

¹²Te krenn i menshe an o them Efrajim jaake dureder, witsrau me miri netsa pral lende, un taprau len har tchirkle, un dau len pengri phagi, jaake har lenge penom, har jon khetne his.

¹³Bibacht ap lende! Jon djan mandar krik! Merepen pral lende! Jon peran mandar tele! Me kamoms len dran i bibacht te lell, un jon rakrenn chochepen pral mande.

¹⁴Te denn le gole ap mande, well kowa gar dran lengro dji. Tchiddo hi le ap pengro tchiben un rowenna soreles, un tchinenn pen ratles, te well len djob un mool. Ap mande shunenn le gar.

¹⁵Me homs lengro sikepaskro un krom len soreles. Un len hi tchilatchepen an o dji, hoi kamenn le mange te krell.

¹⁶Jon rissrenn pash i debleste, koles kek soor hi[13]. Jon hi har i bango bogo, koleha kek failo kote djal, kai te djal lo. Lengre pralstune hi bare mujengre. Doleske wenn le maredo o chareha. Palle san i Egiptarja pral lende.