Read O Debleskro Drom - I Bibla an o Romano Rakepen 2021 Hosea 8 Bible Online

Hosea 8 - O Debleskro Drom - I Bibla an o Romano Rakepen 2021 bible

Hosea 8

¹O baro Dewel penell: Phurde soreles an i phurdepaskri! Har i adlari wenn le pral miro them. Kolla kai kote djiwenn, rikran pen gar ap kowa, hoi lentsa win krom, un hadan pen pral mire laba.

²Ninna te denn le pal mande gole ‘Maro Dewel, mer prindjrah tut, mer i Israelitarja’,

³witsrenn le ap i rig, hoi latcho hi. Doleske lenn len i lurde dran wawar themma palla.

⁴Jon kran penge bare rajen, kai gar mandar wi-rodede his. Pralstune tchiwan le pral pende, un putchan man gar. Dran lengro rup un sonakai krenn le penge chochene debla — jaake nashenn le an pengri bibacht.

⁵Tumer an o foro Samaria, ko sonakaskro terno gurum, koles tumer an-mangenn, hi mange pale-tchiddo. Miri choli pral tumende hi sorelo. Har rah atchell kowa jaake, te rikrenn ap ko pale-tchiddo koowa?

⁶I budepaskro dran Israel kras koi figura. Doleske nai well li kek dewel. An kotja dino well ko terno gurum, hoi i menshe an Samaria an-mangenn!

⁷Kowa, hoi le krenn, hi har te tchiwans le i ducho an i phub un kek djob. Un hoi win well, hi i baro phurdepen. Kek djob well baro. Kowa hoi pre djal, anell kek jarro. Un te anals kowa jarro, wans wawar menshe un chans les pre.

⁸O Israel hi nashedo; i menshenge dran i wawar themma trul lende, hi lo har i piri, hoi tchi moldo hi.

⁹Jon djan pral an o them Assur kutch koweha.[14] I diwji burika atchell peske kokres. O Efrajim kamell malen peske te ginell.

¹⁰Ninna te denn le lowe kol rajende pral i wawar themma, kamau len me khetne te lell, te dap len i phagi. An i tikno tsiro hunte djan le dukentsa tel o pharepen, hoi tchiwell o baro rai dran o them Assur ap lende.

¹¹I menshe an o them Efrajim kran penge bud chatchepangre[15], kai chatchran le tchomone, te well lengri doosh krik lino. Un jaake kran le, te was lengri doosh gomme bud un budeder.

¹²Te mukau lenge deesh-serja mire labendar pre te tchinell, hi mire laba lenge tchi-moldo, har te wans le fun i wi-themarja.

¹³Jon anenn mange viechen, un chan pen tchalo ap ko mass. Me, o baro Dewel, dikau gar latches koi pre. Lengri doosh bistrau me gar, un lengro tchilatchepen well pral lende: Jon hunte djan pale an o them Egiptia pale.

¹⁴I Israelitarja bistran koles, kai kras len. Jon krenn penge bare shukar khera. Un i menshe an o them Juda krenn penge sorele forja. Me, o baro Dewel, witsrau i jag an lengre forja, hoi lengre khera pre chatchrell.