Read O Debleskro Drom - I Bibla an o Romano Rakepen 2021 Hosea 9 Bible Online

Hosea 9 - O Debleskro Drom - I Bibla an o Romano Rakepen 2021 bible

Hosea 9

¹Ma de gole i bachtjatar, Israel, har i menshe an wawar themma krenna! Tiro Deblestar djal tu krik un wawar deblenge palla. Tu bikreh tut ap lende ap haki platsa, kai o djob win dino wella.

²Doleske well jaake, te hi tumen buder gar doha djob, witar gar doha djet. Ninna dell buder kek newi mool.

³Tumer atchenn gar an o them, hoi o baro Dewel tumen das. I menshe dran o them Efrajim hunte djan pale an o them Egiptia, ninna an o them Assur. Kote hunte chan le sawo koowa, hoi pale-tchiddo hi.

⁴Kote nai anenn le kek mool o baro Debleske. Un ap kol vieche, hoi le leske marenn, dikell lo gar latches. O chapen, hoi le kote chan, hi pale-tchiddo, un krell hakenes pale-tchiddo, hoi kowa chal — jaake har ko maro, hoi an i kheer hi, kai jek meras. Lengro maro nai chan le pash pende kokres, un nai anenn tchi an o baro Debleskro kheer.

⁵Hoi kamenn tumer palle te krell an kol bare diwessa, kai wenn khetne te sharenn o baro Debles?

⁶Dran tumaro them, hoi paash kerdo hi, hunte djan tumenge krik. O them Egiptia lell tumen pash peste pre, un an o foro Memfis wenn tumer paskedo. Kote, kai kanna tumaro kutch rup hi, well subjengro senlepen baro, un subjengre burra wenn baro an tumare khera.

⁷O tsiro hi koi, kai me tumenge tumari phagi dau, un tumaro tchilatchepen ap tumare sherja pale anau. Un tumer Israelitarja haiwenn kowa! Tumer penenn: “I narwelo hi ko Debleskro rakepaskro! Ko mursh, koles o Debleskro ducho hi, rakrell dinelo koowa!” Jaake baro hi tumari doosh un tumari choli ap mande!

⁸Miro Dewel bitchras man, leskro rakepaskres, te dap jak ap tumende an o them Efrajim. Un tumer tchiwenn i netsa win ap mire tsele dromma, te taprenn man har i tchirkles. Ninna an o kheer miro Deblestar lenn tumer man palla.

⁹Tumaro tchilatcho koowa, hoi krenn, hi jaake djungelo har kowa, hoi was kerdo an o foro Gibea glan i rah tsiro. Doleske bistrell o baro Dewel gar tumari doosh un dell tumen tumari phagi.

¹⁰O baro Dewel penell: I Israelitarja his mange har drake an o mulo them, har hatsom len kote. Un tumare phure his mange har newe faige ap i faigetikro ruk. I tsiro koi pre, har wan le pash i berga Peor, dan le pen o wi-ladjedo debleske Baal koi, un wan jaake pale-tchiddo har ko dewel, kones jon kaman.

¹¹Efrajim, tiro railepen djal peske, har i tchirklo peske djal. I djuwja wenn buder gar wawartchandes, un anenn buder kek tchawen ap i phub.

¹²Ninna te tserdenn le pengre tchawen bares, lau len lendar pale krik. Kek lendar atchell djido. Hawi bibacht well pral lende, me te tserdau man lendar krik!

¹³Har me dikom o Efrajimes, his lo har i terni palma, tardo ap shukar senlepen. Kanna hunte dell lo peskre tchawen an i wasta kolendar, kai marenn len.

¹⁴Baro Dewel, hoi te putchap tutar, te dess lende? Kre, te nai wenn i djuwja buder gar wawartchandes, un nai denn buder kek tchawo i tchutchi.

¹⁵O baro Dewel penell: Lengro tselo tchilatchepen krenn le kote pash o foro Gilgal; kote choirom man pral lende ko tselo tchilatchepaske, hoi jon kran. Doleske tradau me len dran miro kheer win. Me kamau len buder gar. Lengre tsele pralstune mukenn pen tchi mandar te penell.

¹⁶O Efrajim hi har i mulo ruk. Leskre draba, len hi kek pani. Un rukengre wenn gar bares ap leste. Te lenn i djuwja ninna tchawe, me marau len, kolen jon pengro djijestar kamenna.

¹⁷I menshe Efrajim shunan gar ap miro Debleste. Doleske witsrell lo len pestar krik. Jon wenn naashepangre an i wawar themma.