Read O Debleskro Drom - I Bibla an o Romano Rakepen 2021 Joel 1 Bible Online

Joel 1 - O Debleskro Drom - I Bibla an o Romano Rakepen 2021 bible

Joel 1

¹Kawa hi i lab o baro Deblestar, hoi penas lo ap o Joel, koleskro dad o Petuel hi.

²Shunenn, tumer phure, un denn jak tumer halauter, kai djiwenn an kau them! Penenn mange, das sawo koowa jaake rah har tumer djiwenn? Das sawo koowa an tumare phurengro tsiro?

³Penenn kowa tumare tchawenge, te penenn jon les dureder lengre tchawenge, un kolla lengre tchawenge:

⁴Bud bud stepangre wan pral o them un beshan pen ap o djob. Hoi mukan kolla pral, chan kolla, kai pal lende wan. Hoi kolla pral mukan, chan kolla, kai pal kolende wan. Hoi palle pral atchas, chan kolla, kai pal kolende wan.

⁵Stenn pre, tumer mate, un rowenn! Denn gole, tumer pipangre! Rowenn trul i moljake, hoi was krik lino tumare mujendar.

⁶Bud bud stepangre peran an maro them dren. Len hi danda har lewen hi.

⁷Tchi hi buder ap mare drakengre ruka, kek patria hi buder ap mare faigetikre ruka. Ninna lengro kasht hi nango un parno, lauter hoi ap lende his, chan le tele.

⁸Rob har i terni tchai, kai nashras lakro pirno, un riwell pes an i gono.

⁹Djob un mool hi buder gar koi, hoi nai wals dino o baro Debleste an leskro kheer. I rashajenge hi ropaske. Len hi buder tchi, te anenn le o baro Debleske.

¹⁰O hachetikri phub hi pherde barra, un tchi well buder baro koi pre. O djob hi paash, i molengre drake un i djetengre drake meran tele.

¹¹I hachenge hi ropaske. Dell kek gib[1], un dell kek djob[2]. Lauter hi nashedo.

¹²I drakengre ruka hi truk. i faigetikre ruken hi buder kek patria. Ninna ap i phabjengre ruka un palmtikre ruka, har ap i tsele diwje ruka hi buder kek patria. Un dran o bachtelo tsiro was i menshenge i bibachtelo tsiro.

¹³Tumer rashaja, kai han tardo pash o Debleskri chatchepaskri, riwenn tumen an gone, un denn gole i bibachtjatar! Ninna ratsjake riwenn ko gono gar win, tumer, kai budrenn miro Debleske! Hi kek djob koi un kek mool, hoi nai anans tumaro Debleske an leskro kheer.

¹⁴Denn i menshen khetne gole! Penenn, te chan le tchi, te sikrenn le, kai lengri doosh len khaitell. Mukenn i phureden un i tsele menshen an kau them pash o baro Debleskro kheer te well! Job hi tumaro Dewel. Denn ap leste gole!

¹⁵Hawo bibachtelo tsiro! O diwes, kai o baro Debleskri choli well, hi buder gar dur. Ap ko diwes anell o sorelo Dewel bari bibacht pral mende.

¹⁶Mare jakentsa dikam, har maro chapen krik lino was, un gipen un khelepen dran maro Debleskro kheer.

¹⁷O djob an i phub meras tele, kek chapen hi buder an i djobengre khera, o djob was djungelo, un i djobengre khera phagenn khetne.

¹⁸I grumja denn gole i bokatar, un nashenn trujel un hatsenn kek khass. Ninna i bakre bokenna.

¹⁹Baro Dewel, ap tute dau gole! I jag chatchras o khass an o diwjo them, un i tsele ruka an o weesh.

²⁰Ninna i diwje vieche denn gole ap tute. Kek pani nashell un well dran i phub, un i jag chatchras o khass an o diwjo them.