Read O Debleskro Drom - I Bibla an o Romano Rakepen 2021 Amos 2 Bible Online

Amos 2 - O Debleskro Drom - I Bibla an o Romano Rakepen 2021 bible

Amos 2

¹O baro Dewel penell: I menshe an o them Moab kran pale te pale djungelo koowa. Jon chatchran i kokale o baro rajestar dran o them Edom, bis te wan le jagakri tchik. Doleske lenn le pengri phagi, un khaitenn man gar.

²Me bitchrau i jag an o them Moab, un chatchrau kol sorele khera tele an o foro Kerjot. I menshe an o them Moab merenna an o diwjo kurepen pash i gole, hoi i lurde un i phurdepangre[1] denna.

³Me marau lengro baro rajes un i lengre tsele pralstunen, penell o baro Dewel.

⁴O baro Dewel penell: I menshe an o them Juda kran pale te pale djungelo koowa. Miro drom un mire laba his lenge tchi moldo. Un jon kran gar, hoi lendar kamom. Jon mukan pen o tchatcho dromestar tele te anell un mangan kol chochene deblen an, kolen ninna lengre phure an-mangan. Doleske lenn le pengri phagi, un khaitenn man gar.

⁵Me bitchrau i jag an o them Juda, un chatchrau kol sorele khera tele an Jerusalem.

⁶O baro Dewel penell: I menshe an o them Israel kran pale te pale djungelo koowa. Jon bikran lowenge menshen, kai lenge tchi kran, ninna i tchorwelen, kai nashte denn kek lowe i kirchenge.

⁷Jon stakrenn i tchorwelen an i tchik, un i tiknen dran o drom. Doleske lenn le pengri phagi, un khaitenn man gar. I mursh un peskro dad djan dren pash i emligi djuwjate. Jaake anenn le ladj ap mande.

⁸Ap hake platse, kai o Dewel sharedo well, sowenn le ap koola, hoi lan le i tchorwelenge krik, kai sijaan pash lende hi. Un an o kheer lengro Deblestar pijenn le mool, hoi lan le kolendar, kai sijaan pash lende hi.

⁹Djinenn tumer gar, mire menshe, his tumenge, kai tradom i Amorarja glan tumende krik, kolen, kai his jaake baro un sorelo har ruka. Tchi atchas lendar pral.

¹⁰Me anom tumen win dran o them Egiptia, djom glan tumende star-deesh bersha an o mulo tato them, un dom tumen o them, kai i Amorarja khere his, te well lo tumenge.

¹¹Tumare mursh tchawendar rodom sawen win, kai wan mire rakepangre. Un tumare terne murshendar rodom mange murshen win, kai mange kokres koi hi. Tumer Israelitarja, penenn mange: Hi kowa gar jaake? penell o baro Dewel.

¹²Un hoi krenn tumer: Tumer denn kolen mool te pijell, kai mange koi hi! Un ap mire rakepangre penenn tumer: Ma rakrenn an o Debleskro lab!

¹³Kanna tserdau tumenge i phub tel tumare herja krik, te perenn fun jek rig ap i wawar har i wurdin, hoi pherdo djob hi.

¹⁴Ninna kolla, kai nashenn nai sik, nai nashenn gar penge. Sorele mursha nashrenn pengri soor. Un kurepangre atchenn gar djido.

¹⁵Kolla, kai denn karje, hunte tserdenn pen pale, sikede naashepangre wenn dren lino, un klissepangre nashrenn pengro djipen.

¹⁶Ninna o sorleder mank i tchatche murshende mukell ap ko diwes peskro charo pal peste un nashell peske. Kowa penell o baro Dewel.