Read O Debleskro Drom - I Bibla an o Romano Rakepen 2021 Amos 6 Bible Online

Amos 6 - O Debleskro Drom - I Bibla an o Romano Rakepen 2021 bible

Amos 6

¹Djungeles djal kolenge, kai djiwenn i shukar djipen ap i berga Zion! Djungeles djal kolenge, kai djiwenn an o foro Samaria, un krenn pen kek shero! Djungeles djal tumenge, kai han i raja pral Israel — koi an-dikli natsjona, pash kolende i Israelitarja wenna!

²[Tumer penenn ap i menshende:] Djan an o foro Kalne! Un dikenn, har ko foro hi! Un kotar djan dureder pash o baro foro Hamat! Palle djan tele pash i Filistarja an o foro Gat! Hi le sorleder har kal themma Juda un Israel? Hi lengro them bareder har tumaro them? Na-a!

³Tumer patsenn, kai hi o tchilatcho diwes dur krik tumendar. Djinenn: Kowa, hoi krenn, mukell ko diwes sikeder te well, kai tchilatche raja pral tumende wenn.

⁴Har djungeles djal tumenge, kai han kanna tchiddo ap tchibja shukar kerde i dandentsa fun i elefante, un mukenn tumenge koi latches te djal. Tumer denn tumen o per pherdo o masseha i tikne bakrendar un terne thulle grumjendar,

⁵un bashenn ap i harfa un krenn gilja har o David.

⁶Mool pijenn tumer dran khore, un makenn tumen dren o feteder djeteha. Un tumen hi gar ropaske pral o kheer Josef, hoi paash dino well.

⁷Doleske wenn tumer i glanstune kolendar, kai wenn pandles krik anlo. Tumaro shukar djipen un pipaskro tsiro hi trujel.

⁸O baro un sorelo Dewel, ko rai pral o bolepen un i phub, das pes sowel pash peskro djipen un penas: Me hom chojedo pral o pre-phurdepen o Jakobeskre tchawendar, un nai dikau lengre shukar khera buder gar glan i jaka. Doleske dau o foro[5] un lauter, hoi koi dren hi, an i wasta wawar menshendar.

⁹Ninna te atchenn deesh mursha djido an jek kheer, hunte merenn le.

¹⁰Te well palle o kako jekestar lendar, un lell les, te paskrell lo les, un dell gole an o kheer: ‘Hi gomme jek an o kheer?’ Un te hi i wawar khatedo kote, penell lo: ‘Na-a! Kek, kokres me.’ Palle penell o kako: ‘Atch, mer hunte rakras gar o baro Debleskro lab win!’

¹¹Djinenn: O baro Dewel, te penell job: ‘O baro kheer hunte perell khetne’, palle perell lo khetne. Un te penell job: ‘O tikno kheer hunte perell an kotja’, palle perell lo an kotja.

¹²Nashenn i graja ap i bare barra? Na-a! Nashte budrenn i hache koi pre i grumjentsa? Na-a! Tumer rissrenn o tchatchepaskre laba jaake, te wenn le har tchomone, hoi marell, un o tchatcho drom jaake, te hi lo har i shutlo pipen!

¹³Tumer phurdenn tumen pre pral o foro Lo-Dabar, un penenn: Mari sorjah lam o foro Karnajim dren.

¹⁴“Doleske”, penell o baro Dewel, ko rai pral o bolepen un i phub, “bitchrau i natsjona, hoi djal ap tumende, kai han dran o kheer Israel. Kolla menshe lenn tumaro them dren fun Lebo-Hamat bis pash o lengsto pani an o telstuno them.” [6]