Read O Debleskro Drom - I Bibla an o Romano Rakepen 2021 Obadja 1 Bible Online

Obadja 1 - O Debleskro Drom - I Bibla an o Romano Rakepen 2021 bible

Obadja 1

¹Kowa hi, hoi o Obadja dikas. Kawa penell o baro Dewel, maro rai, pral o them Edom: O baro Dewel bitchras peskro bitchepaskres pash i menshende an wawar themma. Un mer shunam, har job penas: Stenn pre! Mer djas an o kurepen un kuras men i menshentsa an o them Edom!

²O baro Dewel penell ap o them Edom: Me krau tut tiknes, jaake te dikell hako them ap i phub tele ap tute.

³Tiro sorelo foro hi tardo ap i bare barra, tu djiweh pral an i berge. Doleske phurdal tu tut pre. Dik, tiro dji chochras tut, har lo tuke dren rakras: ‘Kek nai witsrell tut tele ap i phub.’

⁴Te krals tu ninna tiro kheer dur pral ap i berga har i adlari, jaake te dikell kowa win, har te wals tiro kheer mashkral i bolepangre momlia, djiness, me witsrau tut tele, penell o baro Dewel.

⁵Tchorepangre wenn rati pral tute un tchorenn tut win, bis te hi le doha! Hoi atchell tuke palle? Ninna kolla wenna pral tute, kai i drake tele lenna. Tuke mukenn le tchi pral!

⁶An tiro tselo them rodenn le trujel, un hatsenn tiro tselo khatedo kutch koowa!

⁷Tire tsele mala tradenn tut dran tiro them win! Kolen tu patsal, jon chochenn tut, un perenn tuke an o dumo. Kolla, kai tiro maro chan, phukrenn ap tute, un tu haiweh les gar.

⁸Me, o baro Dewel penau: An ko tsiro lau i gosewen an o them Edom krik. Un ap i berge Esau djinell buder kek, hoi te krell.

⁹Un i sorele kurepangre an o foro Teman lenn bari daar. Doleske well hakeno ap i berge Esau maredo.

¹⁰Tu kral djungelo koowa ap tiro phraleste, o Jakobeste! Doleske well i ladj ap tute, un tu wess jaake khetne stakedo, te stess buder gar pre!

¹¹Tu, Edom, hals koi pashel tardo, har djan i wi-themarja an Jerusalem dren, un anan leskre lurden pandles krik, un khelan koi pral, koon kones lengre menshendar lella. Tu hals har jek lendar!

¹²Tu, Edom, ma dik buder tele ap tiro phraleste, o Juda, an ko tsiro, kai leske djungeles djal! Ma sa buder pral leskre tchawende an ko tsiro, kai lenge ropaske hi! Ma rake jaake pre-phurdo an ko tsiro, kai jon darenna!

¹³Ma dja dren an i wudja lengro forestar an ko tsiro, kai mire menshenge o ropaske hi! Ma dik tele ap lengri bibacht an ko tsiro, kai jon rowenna! Ma tape pal lengro koowa, an ko tsiro, kai lenge jaake djungeles djal!

¹⁴Ma tchip tut pash o drom khatedo tardo, kai i menshe nashenn penge, te dess len mulo! Ma phuke ap kolende, kai pral atchan an ko djungelo tsiro!

¹⁵O diwes well sik, kai well miri choli pral i tsele themma ap kai phub, penell o baro Dewel. Jaake har tu kral, jaake well tuke kerdo. Kowa hoi tu kral, well ap tiro shero pale.

¹⁶Tumer menshe dran Juda, kai djiwenn ap miri berga, tumenge penau: Jaake har pijan tumer dran o khoro miri choljatar, jaake hunte pijenn palle i tsele wawar menshe ap i phub koi dran hako diwes. Jon hunte tchorenn o pipen an pende dren, bis te tchi buder dren hi, un kek lendar buder koi hi. Palle well, har te dans jon gar.

¹⁷Ap i berga Zion djiwenn kolla, kai win lino wan dran o merepen. Un i berga hi pale o baro Debleske kokres. O Jakobeskre tchawe lenn o them pale penge, hoi lenge randedo was.

¹⁸Un i menshe dran i khera Juda un Israel[1] wenn har i jag. Un o kheer Edom hi o phuss, hoi well pre chatchedo, bis te tchi o kherestar Esau pral atchas. Kowa penell o baro Dewel.

¹⁹Un i menshe dran o kheer Juda, kolla kai djiwenn an o them, kai o kham pralstunes hi, jon lenn kol berge dren, kai i Edomarja djiwenn. Un kolla, kai djiwenn kote, kai o kham tele djal, jon lenn o them dren, kai i Filistarja djiwenn. Un kol wawar lenn i themma Efrajim un Samaria penge dren. Un o kheer Benjamin lell o them Gilead dren.

²⁰Un kolla, kai pandles krik anlo wan dran Israel, jon lenn o them Kanaan dren bis pash o foro Zarpat. Un kolla, kai dran o foro Jerusalem pandles an o foro Sefarad anlo wan, jon lenn kol forja penge, kai an o them Juda kote hi, kai o kham pralstunes tardo hi.

²¹Un kolla ap i berga Zion, kai win lino wan dran o pandepen, len hi penepaske pral i Edomarja ap pengre berge. Un o baro Dewel hi o baro rai.