Read O Debleskro Drom - I Bibla an o Romano Rakepen 2021 Jona 1 Bible Online

Jona 1 - O Debleskro Drom - I Bibla an o Romano Rakepen 2021 bible

Jona 1

¹O baro Dewel rakras o mursheha Jona, koleskro dad o Amitai his, un penas:

²“Dja sik an o baro foro, hoi kharell Ninive, un de lakri doosh win gole. Lakro tchilatchepen was glan mande.”

³Un o Jona stas pre un kamas glan o baro Debleste an o foro Tarsis te nashell, un was tele an o foro Jafo. Un har lo i shiffo hatsas, hoi kamas pash o foro Tarsis te ulerell, das lo lowe koi, un stas dren, te nai ulerell lo lentsa pash o foro Tarsis, un te well lo glan o baro Debleskre jaka buder gar diklo.

⁴Kote mukas o baro Dewel i sorelo phurdepen pral o baro pani te well, hoi jaake sorelo his, te kamas ko shiffo khetne te phagell.

⁵Un i bari traash was ap kol tsele murshende, kai ap ko shiffo budran. Un jon dan i bari gole hakeno ap peskro debleste. Un jon witsran ko koowa, hoi ap ko shiffo tchiddo his, an o baro pani, te well ko shiffo buder gar jaake pharo. Un o Jona his tele an o shiffo, his koi tchiddo, un sowas soreles.

⁶Kote was ko rai pral kau shiffo pash leste un putchas lestar: “Hoi hi kanna tuha? Hoske soweh tu? Ste pre, un khare tiro debles an! Nai well, tiro dewel dikell kamles ap mende, te meras gar!”

⁷Un jek rakras o wawareha: “Awenn, mer kamah kashta te witsrell, te djinas nai, dran koneste sawi bibacht ap mende was.” Un har jon kol kashta witsran, sikran le ap o Jona.

⁸Kote penan jon ap leste: “Pen menge, koneskri doosh hi kowa, te djal menge jaake tchikles? Hoi hi tiri budi, un kai weh tu? Dran hawo them hal tu, un hawe menshendar weh tu?”

⁹Un job penas ap lende: “Me hom i Hebreari un mangau o baro Debles an, ko Dewel pral o bolepen, kowa kai kras o baro pani un ninna o them.”

¹⁰Ninna penas lo lenge, kai job o baro Deblestar krik nashas. Kote trashan kol mursha budeder, un putchan lestar: “Hoske kral tu kowa?

¹¹Hoi te kras kanna tuha, te well ko baro pani pokones un mukell mendar tele?” Ap ko tsiro was o baro pani diwjes un diwjeder.

¹²O Jona penas ap lende: “Lenn man un witsrenn man an o baro pani! Palle well o baro pani pale pokones un mukell tumendar tele. Me djinau: Kowa hi miri doosh, kai kau baro phurdepen pral tumende was.”

¹³Ninna har lan kol mursha pengri tseli soor khetne, te anenn le ko shiffo pale ap o them, djas kowa lenge gar. Ko baro pani was diwjeder un diwjeder.

¹⁴Kote dan le ap o baro Debleste gole un penan: “Ach, baro Dewel, ma muk men te tassell dran kau mursheste. Ma muk leskro rat pral mende te well! Tu, baro Dewel, kral, hoi an tire jaka mishto hi.”

¹⁵Un jon lan o Jona un witsran les an o baro pani. Kote was ko baro pani ap jek kopo pokones un his buder gar diwjo.

¹⁶Kote lan i mursha bari traash glan o baro Debleste. Un jon chatchran leske i vieches, te parkrenn le pen pash leste, jaake har jon pen sowel dan.