Read O Debleskro Drom - I Bibla an o Romano Rakepen 2021 Jona 3 Bible Online

Jona 3 - O Debleskro Drom - I Bibla an o Romano Rakepen 2021 bible

Jona 3

¹Un o baro Dewel rakras i duito kopo ap o Jona, un penas:

²“Dja sik an ko baro foro, hoi kharell Ninive, un de kote wi-gole, hoi me tuke penau!”

³Kote kras pes o Jona ap o drom un djas an o foro Ninive, jaake har leske o baro Dewel penas. O foro Ninive his jaake baro, te djal jek triin diwessa, te well lo jek rigjatar ap i wawar.

⁴Un o Jona djas i tselo diwes dren. Palle das lo gole un penas: “Star-deesh diwessa, palle phagell o foro Ninive khetne.”

⁵Un kol tsele menshe an o foro Ninive patsan o Debleske, un mukan win te kharell, kai kek te chal tchomone buder. Un halauter, bare un tikne, riwan gone pral pende, te sikrenn le, te khaitell len lengro tchilatcho djipen.

⁶Har o baro rai o forestar Ninive shunas, hoi o Jona rakras, stas lo pre peskro beshepastar, riwas peskri kutch plaashka win, un tchiwas i gono ap peste, un beshas pes an i jagakri tchik.

⁷Job mukas win kharell an o tselo foro: “Shunenn, hoi o baro rai un leskre pralstune budepangre tumenge penenn! Kowa hunte well hakenestar kerdo, i menshendar, ninna i viechendar: Kek mensho, kek grumni, witar kek bakro chal un pijell tchomone! Un i vieche wenn gar ap o senlepen anlo! Mukenn len witar kek pani te pijell!

⁸Un halauter hunte tchiwenn gone pral pende: i menshe un i vieche. Un hakeno hunte kharell ap o Debleste peskri tseli sorjah. Un hakeno hunte mukell peskro tchilatcho drom un ko tchilatcho koowa, hoi lo kras.

⁹Koon djinella? — Kowa, hoi o Dewel kamas te krell, nai khaitell les, un job mukell peskri choli gar pral mende te well, te meras gar halauter.”

¹⁰Har o Dewel dikas, hoi jon kran, har mukan le pengre tchilatche dromma, kote khaitas o Debles koi bibacht, hoi kamas lo pral lende te anell, un job kras les gar.