Read O Debleskro Drom - I Bibla an o Romano Rakepen 2021 Jona 4 Bible Online

Jona 4 - O Debleskro Drom - I Bibla an o Romano Rakepen 2021 bible

Jona 4

¹Kowa choiras o Jones un chatchas an leste.

²Kote rakras lo ap o baro Debleste un penas: “Ach, baro Dewel, kowa hi, hoi penom an ko tsiro, har khere homs. Doleske kamom sik an o them Tarsis krik te nashell. Me djinom, kai tu i latcho Dewel hal, un tut i baro dji hi. Tu weh gar sik chojedo. Un tiro latchepen hi baro. Un koi bibacht, kolah i menshen trad deh, khaitell tut pal kowa.

³Un kanna, baro Dewel, le miro djipen mandar! Miro merepen hi mange mishto, budeder har te djiwap!”

⁴Un o baro Dewel putchas: “Hawo tchatchepen hi tut, te choiress tut jaake?”

⁵Un o Jona djas win dran o foro ap koi rig, kai o kham pre djala, un kras peske i dacha dran patria, un beshas pes koi tel, te dell les o kham gar tchurje. Kote atchas lo, te dikell lo, hoi o foreha wella.

⁶Un o baro Dewel, maro rai, mukas i bur bare patjentsa dran i phub bares te well kote, kai o Jona beshdo his, te dell les o kham gar tchurje, un te djal leske feteder. Un o Jona his bud bachtelo pral ko bur.

⁷O wawar diwes, har o kham pre djal, mukas o Dewel i kirmo te well. Kowa das ko bur tchurje, kai meras lo tele.

⁸Un har o kham ap o bolepen tardo his, mukas o baro Dewel i tato phurdepen dran o mulo them te well, un o kham das jaake tchurje ap o Joneskro shero, te nashras lo peskri soor. Un job kamas te merell un penas: “Miro merepen hi mange mishto, budeder har te djiwap!”

⁹Un o Dewel penas ap o Jona: “Hawo tchatchepen hi tut, te choiress tut jaake pral ko bur, hoi tele meras?” Un job penas: “Tchatchepah, mange hi jaake tchatcho, te choirap man, te kamau te merell.”

¹⁰Un o baro Dewel penas: “Tut khaitell ko bur, koleske tchi kral, te well lo baro. Leske maral tut gar tele. An jek rat was lo baro un an jek rat meras lo tele!

¹¹Un man te khaitenn gar kol tsele menshe an o foro Ninive? Kate djiwenn budeder har 120.000 (sheel-te-biish-serja) menshe, kai gar djinenna, hoi latcho un tchilatcho hi[1], un koi pashel bud vieche!”