Read O Debleskro Drom - I Bibla an o Romano Rakepen 2021 4. Mose 11 Bible Online

4. Mose 11 - O Debleskro Drom - I Bibla an o Romano Rakepen 2021 bible

4. Mose 11

¹Un kol menshe penan glan o baro Debleskre kanda, kai lenge djungeles djala. Un har o baro Dewel kowa shunas, was job chojedo un bitchras i jag, hoi chatchras win ap i platsa, kai lengre plachtene khera his.

²Koi dan i menshe ap o Moseste gole. Un o Mose mangas o baro Debles. Koi djas i jag krik.

³Un jon dan koi platsa ko lab ‘Tabera’[17], te bistrenn le gar, kai kote i jag o baro Deblestar mank lende chatchras.

⁴Mank i Israelitarja his ninna wawar menshe, kai lentsa djan. Kolen was i bari bok pal mass. Koi rowan kol Israelitarja ninna pale, un penan: “Koon dell men mass chapaske?

⁵Har shukar his an o them Egiptia, kai men matche tchitcheske chapaske his. Men his kürbisse, melone, senlepen, purma un sirja.

⁶Kate dikah tchi wawar har ko manna, un kowa well men dran o nak win.”

⁷Ko manna dikas win har tikno djob, parno-djelto.

⁸Un kol menshe nashan kate te kote, un lan kowa khetne, un kran jarro dran leste, un keran kowa an pirja, un kran merklia kolestar. Ko manna his an o mui har maro, kai djet dren hi.

⁹Un te well rati i platsa sapeno, perell o manna koi pre.

¹⁰Har o Mose shunas, kai i tsele menshe khetne tardo his an i wudja glan lengre plachtene khera un rowan, koi tapras o baro Debles i choli, un ninna o Moseske his kowa doha.

¹¹Un o Mose penas ap o baro Debleste: “Hoske kreh tu mange, kai tiro budepaskro hom, o djipen jaake pharo? Hoske hi tut kek dji mange, un me hunte marap man tele kol tsele menshentsa?

¹²Hi kalla halauter mire tchawe? Wan jon mandar boldo? Har nai peneh tu ap mande: Hidje len an tire mussja, har i djuwel, kai hidjrell i ternepen, te anap len an ko them, kolestar penal lengre phurenge, te dess ko them lenge?

¹³Kai lap me mass, te dap les kal tsele menshende? Jon rowan glan mande, un penan: ‘De men mass te chal!’

¹⁴Me nai hidjrau kal tsele menshen gar kokres! Kowa hi jaake pharo mange, te nai krau les buder gar.

¹⁵Te kameh tu mantsa jaake te krell, palle ab mange latcho un de man mulo, te dikap gar miri bibacht.”

¹⁶Un o baro Dewel penas leske: “Le tuke efta-deesh mursha kol phurendar an Israel, kolendar, kai tu djineh, kai hi jon pralstune pral i menshende. An len glan o Debleskro plachteno kheer. Kote wenn le glan tute tardo.

¹⁷Me kamau tele te well, un kote tuha rakrell, un lau i kotar ko duchestar, hoi ap tute hi, un tchiwau les ap lende, te nai krenn jon khetne tuha kai phari budi, hoi hi har i pharo koowa ap tire phika. Tu hunte hidjress kowa gar lauter kokres.

¹⁸Un ap i menshende hunte peness tu: Krenn tumen djudjo o Debleske! Taissarlake lenn tumer mass chapaske. Tumaro ropen was glan o baro Debleste. Job shunas har penan: ‘Koon dell men mass te chal? Menge djas mishto an o them Egiptia.’ Doleske dell tumen o baro Dewel mass te chal.

¹⁹Gar jek diwes, gar dui, gar pantch, gar deesh, gar biish diwessa.

²⁰Kowa djal jek tchon, bis te nai sungenn les buder gar, un kowa dran tumaro nak win well. Tumer tchiwan o baro Debles ap i rig, koles, kai mashkral tumende hi. Un tumer rowan glan leste un penan: ‘Hoske djam mer dran o them Egiptia?’ Doleske well kau koowa kanna ap tumende.”

²¹Un o Mose penas ap o baro Debleste: “Shob-sheel-serja menshe hi kai, kolentsa me djiwau, un tu peneh: Me kamau len mass te dell, te well len jek tchon chapaske.

²²Nai maras mer jaake bud bakre un grumja, te hi len doha mass? Nai tapras mer kol tsele matche an o baro pani, te well lenge lauterenge doha?”

²³O baro Dewel penas ap o Moseste: “Hi miro wast gar sorelo doha, te krap, hoi penom? Tu dikess kanna: Well kowa jaake, har me tuke penom? Well kowa jaake gar?”

²⁴Un o Mose djas win un penas i menshenge o baro Debleskre laba, un las khetne efta-deesh mursha kol phurendar, un tchiwas len trul o Debleskro kheer.

²⁵Koi was o baro Dewel tele an i wolka un rakras o Moseha, un las i kotar ko duchestar, hoi ap leste his, un tchiwas les ap kol efta-deesh phureder. Un har o Debleskro ducho ap lende his, kharan le laba win har kol Debleskre rakepangre[18]. Jon kran kowa kokres kau jek kopo.

²⁶Koi his dui mursha pash i plachtene khera, ko jek kharas Eldad, ko wawar Medad. Lengre laba his ninna pre-tchinlo an ko liil, kai i efta-desha phureder dren tchinlo hi. Jon atchan pash i plachtene khera un djan gar win pash o Debleskro kheer. Un o Debleskro ducho was ninna pral lende. Un ap i platsa mank i khera kharan le laba win har kol Debleskre rakepangre.

²⁷Koi nashas i terno mursh pash o Moseste un penas: “O Eldad un o Medad kharenn laba win har kol Debleskre rakepangre!”

²⁸Koi his o Josua, koleskro dad o Nun hi, kowa budras o Moseske fun tiknes pre. Un job penas leske: “Mose, miro rai, pen te mukenn le kowa!”

²⁹O Mose penas ap leste: “Kreh tu kowa mange? Me kamoms, te dals o baro Dewel peskre tsele menshende peskro ducho, te wans le halauter Debleskre rakepangre, kai leskre laba win kharenna.”

³⁰Pal kowa djas o Mose pale pash i plachtene khera un kol Israeleskre phureder djan leha.

³¹Koi bitchras o baro Dewel i baro ducho pral o them, hoi was kotar, kai o baro pani hi, un anas pesse tchirklen peha, un mukas len ap i platsa te perell, jek diwes dur trul i platsa, jaake jek metari pral i phub.

³²Koi djan kol menshe un lan kol tchirklen khetne o tselo diwes, un i tseli rati, un ko wawar tselo diwes. Un ninna koles, kai gar bud khetne las, his jaake jek sero kilogramme. Un jon tchiwan kol tchirklen trul i platsa, te wenn le truk, te rikrell pes o mass.

³³Un har jon ko mass chan un kowa gomme mashkral lengre danda his, was o baro Debleskri choli pral i menshende, un job das len i phari phagi un bud lendar meran.

³⁴Un jon kharan koi platsa ‘Kibrot-Taawa’[19]. Kote wan kolla paskedo, kolen chantch hi pal o mass.

³⁵Un jon mukan Kibrot-Taawa pal pende un djan dureder an Hazerot, un jon atchan kote.