Read O Debleskro Drom - I Bibla an o Romano Rakepen 2021 4. Mose 16 Bible Online

4. Mose 16 - O Debleskro Drom - I Bibla an o Romano Rakepen 2021 bible

4. Mose 16

¹Un o Korach, — leskro dad his o Jizhar, — i Levitari kolendar, kai wan pal o Kohat, ko Korach was chojedo ap o Moseste. Khetne leha his mursha, kai wan dran o kheer Ruben: o Datan un o Abiram, kolengro dad o Eliab his, un o On, koleskro dad o Pelet his. Pash lende his ninna 250 (dui-sheel-te-paash-sheel) wawar Israelitarja, kai pralstune his mank i Israelitarja, wi-rodede un an-dikle mursha.

³Un jon halauter wan khetne pash o Mose un o Aron, tchingran ap lende un penan: “Tumer krenn, har te wans bareder har mer wawar! O tselo kheer Israel hi o Debleskre menshe. Un o baro Dewel hi mashkral lende. Hoske hadenn tumer tumen pral o baro Debleskre menshende?”

⁴Har o Mose kowa shunas, witsras lo pes ap peskro mui,

⁵un penas ap o Korach un ap kolende, kai pash leste his: “Taissar penell o baro Dewel, koon leskre menshe hi, kones job peske wi-rodas, un koon nai well pash leste. Un kones job win rodella, kowa nai well pash leste.

⁶Taissarlakro lenn tumenge pirja, tu o Korach un kol tsele mursha, kai pash tute hi!

⁷Un krenn jag koi dren, un tchiwenn sungepaskro koowa koi pre, un anenn kowa glan o baro Debleste! Kones koi o baro Dewel wi-rodella, kowa hi leskro. Tumer, i Levitarja, han kolla, kai krenn, har te wans i bareder!”

⁸Un o Mose penas ap o Korach: “Shunenn, tumer Levitarja!

⁹Hi kowa tumenge gar doha, kai o Israeleskro Dewel tumen win rodas dran i tsele Israelitarja, te wenn pash leste, te krenn tumari budi ap o Debleskro kheer? Tumer nai wenn i tsele menshenge Israel koi.

¹⁰Job mukas tut, o Korach, un tire tsele phralen, kol Levitarja, pash leste te well. Un tumer kamenn kanna ninna rashai te well!

¹¹Tu un tire tsele menshe tchiwan tumen khetne, te hadenn tumen pral o baro Debleste. Kowa hi gar o Aron, pral koleste hadan tumen.”

¹²Un o Mose mukas kol dui murshen, o Datan un o Abiram, pash peste te kharell. Kolengro dad hi o Eliab. Jon penan: “Mer wah gar.

¹³Hi kowa tuke gar doha, kai lal men dran ko them, kai hi bud thud un gwin[27], un mukeh men te merell an o mulo tato them? Kameh tu ninna rai pral mende te well?

¹⁴Hi kawa them i them, kai hi bud thud un gwin? Un dal tu men i hachetikri phub un drakengre themma, kai menge hi? Ma pande kol menshen i jaka! Mer wah gar.”

¹⁵Koi was o Mose chojedo, un penas ap o baro Debleste: “Ma dik latches ap kowa, hoi jon tut denna! Me lom gar i burika[28] lendar, un krom len kek tchilatchepen.”

¹⁶Un o Mose penas ap o Korach: “Tu un tire tsele menshe hunte wenn taissar glan o baro Debleste, tu un jon un o Aron!

¹⁷Un hakeno lell peskri piri, un tchiwell sungepaskro koowa dren, un well glan o baro Debleste, hakeno peskri pirjah, dui-sheel un paash-sheel pirja, — ninna tu un o Aron, hakeno peskri pirjah.”

¹⁸Un hakeno las peskri piri, un tchiwas jag koi dren, un ko sungepaskro koowa koi pre. Un jon djan pash o wudar glan o Debleskro kheer, ninna o Mose un o Aron.

¹⁹Un o Korach las i tsele menshen khetne ap peskri rig, un was lentsa glan o Debleskro kheer pash o wudar. Koi was o baro Debleskro railepen glan i tsele menshende.

²⁰Un o baro Dewel rakras o Moseha un o Aroneha, un penas:

²¹“Djan kol menshendar krik, te marap len sik.”

²²Kol dui mukan pen ap pengro mui te perell, un penan: “Ach Dewel, tu hal o Dewel, kai das hakenes o djipen! Te kras jek mursh i tchilatcho koowa, kameh tu doleske tiri choli pral i tsele menshende te tchiwell?”

²³Un o baro Dewel rakras o Moseha, un penas:

²⁴“Pen ap i tsele menshende: Djan halauter krik, kai djiwenn trul koi platsa, kai djiwell o Korach, o Datan, un o Abiram!”

²⁵O Mose stas pre, un djas pash o Datan un o Abiram, un kol phureder mank i Israelitarja djan leske palla.

²⁶Un job penas ap i tsele menshende: “Djan krik kol plachtene kherendar kol menshendar, kai shunenn gar ap o Debleste! Un taprenn ap tchi, hoi len hi, te merenn tumer gar ap ko tselo tchilatcho koowa, hoi jon kran!”

²⁷Un jon djan penge un mukan koi platsa, kai djiwas o Korach un o Datan un o Abiram. O Datan un o Abiram djan win dran lengre plachtene khera un his tardo glan o wudar pengre djuwjentsa, tchawentsa, un tchawengre tchawentsa.

²⁸Un o Mose penas: “Koi pre hunte dikenn tumer, kai bitchras man o baro Dewel, te krap ko tselo koowa, un kai me kowa gar mandar krau.

²⁹Jon te merenna jaake har i tsele menshe merenna, palle bitchras man o baro Dewel gar.

³⁰Te krell o baro Dewel tchomone newes, kai i phub krell peskro mui pre, un tserdell len dren lauterentsa, hoi len hi, jaake te djan jon djides tele an o mulengro them, palle djinenn tumer, kai kalla mursha pral o baro Debleste djungeles rakran.”

³¹Un pal kowa, har job kol tsele laba penas, djas koi phub tel lende pre,

³²un kras peskro mui pre, un tserdas len tele pengre familjentsa un kol tsele menshentsa, kai pash o Korach his, ninna halauter, hoi len hi.

³³Un jon djan djides tele an o mulengro them lauterentsa, hoi len hi. Un i phub tchakras len. Un jon meran mashkral win dran kol tsele menshende.

³⁴Har i wawar Israelitarja, kai trul lende his, shunan, har jon gole dan, nashan le penge. Jon trashan, te chal len i phub ninna pre.

³⁵Un o baro Dewel bitchras jag, kai chas kol 250 (dui-sheel-te-paash-sheel) murshen pre, kai anan ko sungepaskro koowa o Debleske.