Read O Debleskro Drom - I Bibla an o Romano Rakepen 2021 4. Mose 26 Bible Online

4. Mose 26 - O Debleskro Drom - I Bibla an o Romano Rakepen 2021 bible

4. Mose 26

¹Pal ko pharo nasslepen, rakras o baro Dewel ap o Moseste un ap o Eleasareste, koleskro dad o rashai Aron his, un penas:

²“Tchinenn an i liil har bud mursh Israelitarja koi hi, kai hi soreles doha, te wenn le lurde. Tchinenn kolen pre, kai hi biish bersha phuro un phureder! Tchinenn ninna pre hawe menshendar jon wenna!”

³Un o Mose un o rashai o Eleasar kran kowa jaake, har o baro Dewel o Moseske penas, un dan kol tsele murshen, kai biish bersh un phureder his, khetne gole pash o pani Jordan an o telstuno them, kai i Moabarja djiwan, wergel o forestar Jericho. Kolla his kol Israelitarja, kai wan dran o them Egiptia win:

⁴

⁵O kheer Ruben: O Ruben his o Jakobeskro phureder tchawo. Leskre tchawe his o Henoch, o Pallu,

⁶o Hezron un o Karmi. Kolendar wenna i Henocharja, i Palluarja, i Hezronarja un i Karmarja.

⁷Kalla halauter wan o Rubenestar. Un khetne his le 43.730 (star-deesh-te-triin-serja-efta-sheel-triin-deesh) mursha.

⁸Un kolla, kai wan pal o Pallu his leskro tchawo, o Eliab,

⁹un koleskre tchawe, o Nemuel, o Datan un o Abiram. Kolla hi ko Datan un o Abiram, kai wan wi-rodedo, te wenn le pralstune, un pal i tsiro hadan le pen pral o Mose un o Aron, un kran pen khetne kol menshentsa, kai wan pal o Korach, har jon hadan pen pral o baro Debleste.

¹⁰Un i phub kras peskro mui pre, un tserdas len tele khetne o mursheha, o Korach. Un kol 250 (dui-te-paash-sheel) mursha, kai djan lentsa, meran an i jag. Jaake wan le i sikepen, te dikan i menshe, hoi hi.

¹¹Kol tchawe o Korachestar meran gar halauter.

¹²O kheer Simeon: Leskre tchawe his o Jemuel, o Jamin, o Jachin, o Serach un o Shaul. Lendar wenna i Jemuelarja, i Jaminarja, i Jachinarja, i Seracharja un i Shaularja.

¹³

¹⁴Kalla halauter wan o Simeonestar. Un khetne his le 22.200 (biish-te-dui-serja-dui-sheel) mursha.

¹⁵O kheer Gad: Leskre tchawe his o Zifjon, o Haggi, o Shuni, o Osni, o Eri, o Arod un o Areli. Lendar wenna i Zifjonarja, i Haggarja, Shunarja, i Osnarja un i Erarja, i Arodarja un i Areljarja.

¹⁶

¹⁷

¹⁸Kalla halauter wan o Gadestar. Un khetne his le 40.500 (star-deesh-serja-pantch-sheel) mursha.

¹⁹O kheer Juda: Leskre phureder tchawe his o Er un o Onan. Kol dui meran an o them Kanaan.

²⁰Pal lende was o Shela, o Perez, un o Serach. Kolendar wan i Shelanarja, i Perezarja un i Seracharja. Kol tchawe fun o Perez his o Hezron un o Hamul. Kolendar wenna kol Hezronarja un kol Hamularja.

²¹

²²Kalla halauter wan o Judaestar. Un khetne his le 76.500 (efta-deesh-te-shob-serja-pantch-sheel) mursha.

²³O kheer Issachar: Leskre tchawe his o Tola, o Puwa, o Jashub, un o Shimron. Kolendar wenna kol Tolarja, kol Puwanarja, kol Jashubarja un kol Shimronarja.

²⁴

²⁵Kalla halauter wan o Issacharestar. Khetne his le 64.300 (shob-deesh-te-star-serja-triin-sheel) mursha.

²⁶O kheer Sebulon: Leskre tchawe his o Sered, o Elon, un o Jachleel. Kolendar wenna kol Seredarja, kol Elonarja un kol Jachleelarja.

²⁷Kalla halauter wan o Sebulonestar. Khetne his le 60.500 (shob-deesh-serja-pantch-sheel) mursha.

²⁸O Josefes his dui tchawe: o Manasse un o Efrajim.

²⁹O Manasse his o dad jek tchawestar, kowa his o Machir. Kolestar wenna kol Machirarja. O Machir las i tchawo, kowa kharas Gilead. Kolestar wenna kol Gileadarja.

³⁰O Gileadeskre tchawe hi: o Jeser, o Helek, o Asrijel, o Sichem, o Shemida, un o Hefer. Kolendar wenna kol Jeserarja, kol Helekarja, kol Asrijelarja, kol Sichemarja, kol Shemidarja, un kol Heferarja.

³¹

³²

³³O Hefer las i tchawo. Kowa his o Zelofhad. Un koles his kek tchawe. Les his tcha. Kolla kharan Machla, Noa, Hogla, Milka, un Tirza.

³⁴Kalla halauter wan o Manassestar. Khetne his le 52.700 (pantch-deesh-te-dui-serja-efta-sheel) mursha.

³⁵O Efrajim his o dad triin tchawendar: o Shutelach un o Becher, un o Tachan. Kolendar wenna kol Shutelacharja, kol Becherarja un kol Tahanarja.

³⁶O Shutelach las i tchawo. Kowa his o Eran. Kolestar wenna kol Eranarja.

³⁷Kalla halauter wan o Efrajimestar. Khetne his le 32.500 (trijanda-te-dui-serja-pantch-sheel) mursha.

³⁸O kheer Benjamin: Leskre tchawe his o Bela, o Ashbel, o Ahiram, o Shufam, o Hufam. Kolendar wenna kol Belarja, kol Ashbelarja, kol Ahiramarja, kol Shufamarja, kol Hufamarja.

³⁹

⁴⁰O Bela his o dad dui tchawendar. Kolla his o Ard un o Naaman. Kolendar wenna kol Naamanarja un kol Ardarja.

⁴¹Kalla halauter wenn o Benjaminestar. Khetne his le 45.600 (star-deesh-te-pantch-serja-shob-sheel) mursha.

⁴²O kheer Dan: Leskro tchawo his o Shuham. Kolestar wenna kol Shuhamarja. Kalla hi halauter, kai wan pal o Dan.

⁴³Khetne his kol Shuhamarja 64.400 (shob-deesh-te-star-serja-star-sheel) mursha.

⁴⁴O kheer Asser: Leskre tchawe his o Jimna, o Jishwi un o Berja. Kolendar wenna kol Jimnarja kol Jishwarja un kol Berjarja.

⁴⁵O Berja las tchawe. Kolla his o Heber un o Malkijel. Kolendar wenna kol Heberarja un kol Malkijelarja.

⁴⁶O Asser, les his i tchai, koja kharas Serach.

⁴⁷Kalla halauter wan pal o Asser. Khetne his le 53.400 (pantch-deesh-te-triin-serja-te-star-sheel) mursha.

⁴⁸O kheer Naftali: Leskre tchawe his o Jachzeel, o Guni, o Jezer, o Shillem. Kolendar wenna kol Jachzeelarja, kol Gunjarja, kol Jezerarja un kol Shillemarja.

⁴⁹

⁵⁰Kalla halauter wan pal o Naftali. Khetne his le 45.400 (star-deesh-te-pantch-serja-star-sheel) mursha.

⁵¹I tsele Israelitarja his khetne 601.730 (shob-sheel-te-jek-serja-efta-sheel-te-triin-deesh) mursha.

⁵²Un o baro Dewel rakras o Moseha un penas:

⁵³“Tu dess hako khereske, kai well o Jakobeskre deesh-te-dui tchawendar, lengro kotar them pal kowa har bud jon hi, te well ko them lengro.

⁵⁴Kol familjenge, kolen bud menshe hi, hunte dess tu bud them, te well lo lengro. Un kol familjenge, kolen gar bud menshe hi, hunte dess gar jaake bud.

⁵⁵Witsrenn i bachtjakre barra, te hatsenn win, koon o Jakobeskre tchawendar hawo kotar them lella.

⁵⁶Jaake har i barra sikrenn, de len lengro them, i bari familjake i baro them un i tikneder familjake i tikneder them.”

⁵⁷O kheer Levi: Lengre laba wan pre tchinlo pal kol triin tchawende o murshestar Levi: o Gershon, o Kohat un o Merari. Lendar wenna kol Gershonarja, kol Kohatarja un kol Merarja.

⁵⁸Kalla hi kol familje, kai wenn pal o Levi: kol Libnarja, kol Hebronarja, kol Machlarja, kol Musharja, kol Koracharja. O murshestar Kohat well o Amram.

⁵⁹Koleskri romni kharas Jochebed, lakro dad his o Levi. Koja was boldo an o them Egiptia. Un joi anas o Aron, o Mose un lengri pheen, i Mirjam ap i phub.

⁶⁰O Aroneske wan tchawe boldo. Kolla his o Nadab, o Abihu, o Eleasar, un o Itamar.

⁶¹O Nadab un o Abihu meran, har anan jon glan o baro Debleste sawo sungepaskro koowa, hoi gar jaake kerdo his, har o baro Dewel kowa kamas.

⁶²Un i tsele mursh Levitarja, kai his jek tchon un phureder, his khetne 23.000 (biish-te-triin-serja). Jon lan kek them har i wawar Israelitarja. Doleske wan le gar lentsa khetne ginlo[45].

⁶³Jaake bud his kol Israelitarja, kolengre laba o Mose un o rashai Eleasar an i liil tchinan, har anan le len khetne pash o pani Jordan an o telstuno them, kai kol Moabarja djiwan, wergel o foro Jericho.

⁶⁴Mashkral kolende his kek buder djido kolendar, kolengre laba o Mose un o rashai Aron an i liil tchinan, har dikan le pal, har bud jon hi, an o mulo tato them Sinai.

⁶⁵O baro Dewel penas lenge, kai jon hunte merenn an o mulo tato them. Un jaake atchan kek lendar djido har kokres o Kaleb, koleskro dad o Jefunne his, un o Josua, koleskro dad o Nun his.