Read O Debleskro Drom - I Bibla an o Romano Rakepen 2021 4. Mose 31 Bible Online

4. Mose 31 - O Debleskro Drom - I Bibla an o Romano Rakepen 2021 bible

4. Mose 31

²“De kol Midianarjen ko tchilatchepen pale, hoi kran le ap i Israelitarjen! Un pal kowa well ko diwes, kai mereh tu.”

³Koi penas o Mose ap i Israelitarjen: “Lenn lurden tumendar, te kurenn jon pen kolentsa dran Midian. Jaake te lenn kol Midianarja pengri phagi, hoi o baro Dewel len dell.

⁴Lenn jek sero murshen dran hakeneste kol deesh-te-dui bare familjendar, hoi wenn o Jakobeskre tchawendar, un bitchrenn len an o kurepen.” Un jaake kran le, un 12.000 (deesh-te-dui-serja) mursha wan khetne kurepaske.

⁵

⁶Un o Mose bitchras len an o kurepen. Lentsa djas o Pinhas, koleskro dad o rashai Eleasar his. Un o Pinhas las o Debleskro koowa peha, ninna kol kurepaskre phurdepangre[47].

⁷Un jon djan an o kurepen an o them Midian, te kurenn le pen lentsa, jaake har o baro Dewel kowa o Moseske penas, un dan i tsele murshen kote mulo.

⁸Ninna maran le kol pantch bare rajen pral i Midianarja. Jon kharan Ewi, Rekem, Zur, Hur, un Reba. Ninna dan le o Bileames o chareha mulo, koleskro dad o Beor his.

⁹Un kol Israelitarja pandan kol djuwjen fun kol Midianarja un lengre tchawen. Lengre vieche, un halauter, hoi len hi, tchoran jon.

¹⁰Un chatchran lengre tsele forja, lengre khera un plachtene khera, kai jon djiwan.

¹¹Un jon lan ko tselo tchoredo koowa, un halauter, hoi jon nai lan, menshe un vieche,

¹²un anan len pash o Moseste un o rashajeste, o Eleasar, un pash i tsele wawar Israelitarja. Kolla his ap pengri platsa pash o pani Jordan an o telstuno them, kai kol Moabarja djiwan, wergel o foro Jericho.

¹³Un o Mose un o rashai Eleasar un kol wawar pralstune djan pash lende, win glan i platsa.

¹⁴Un o Mose was chojedo pral i pralstune lurdende un pral kol pralstune pral i serja un pral sheel lurdende, kai dran o kurepen wan.

¹⁵Un job penas ap lende: “Hoske mukan tumer i tsele djuwjen djido?

¹⁶Ma bistrenn, te his kol djuwja, kai kran, hoi o Bileam lenge penas, un tserdan i Israelitarjen o baro Deblestar krik, jaake te nashan le o chocheno debles Baal-Peor palla. Doleske was ko baro nasslepen ap o Debleskre menshende.

¹⁷Kanna, denn mulo kol tsele mursh tchawen, un kol tsele djuwjen, kolen i rom his.

¹⁸Kol tsele tcha, kai wan kek murshestar an-tapedo, kolen mukenn tumenge djido!

¹⁹Un tumer halauter, kai dan jekes mulo oder kai tapran i mules an, atchenn efta diwessa glan koi platsa, kai tumare plachtene khera hi. Ap o triinto diwes un ap o eftato diwes thowenn tumen jaake har glan tchinlo hi[48], te wenn pale djudjo un erligo. Ninna kol tcha, kai lan tumenge pandlo, hunte thowenn pen jaake.

²⁰Ninna kol tsele ripaskre koola, un halauter, hoi dran ledera, busjengro bal un kasht kerdo was, hunte well djudjo kerdo.”

²¹Un o Eleasar, ko rashai, penas ap kol lurdende, kai his an o kurepen: “Kowa hunte well jaake kerdo, har o baro Dewel kowa o Moseske penas.

²²Ko koowa dran sonakai, rup, lolo saster, saster, zinno un blaio,

²³un halauter, hoi i jag gar pre chatchrell, kowa hunte rikrenn an i jag, te well kowa djudjo. Un pal kowa witsrenn pani koi pre. Un kowa halauter, hoi chatchrals pre an i jag, tchiwenn an o pani.

²⁴Un tumer hunte thowenn tumare ripaskre koola ap o eftato diwes. Palle wenn tumer djudjo. Pal kowa nai wenn pale ap i platsa, kai i plachtene khera tardo hi.”

²⁵Un o baro Dewel rakras o Moseha un penas:

²⁶“Le kol tsele menshen un kol viechen, kai tapran, kai krik anlo wan, pash tumende pre, tu un ko rashai Eleasar un kol pralstune pral i bare familjende.

²⁷un de i paash kolende, kai his an o kurepen, un kol wawar paash de i wawar Israelitarjen.

²⁸Un kolla, kai his an o kurepen, hunte denn tchomone o baro Debleske. Kolestar, hoi jon pandles lan, le jek menshes hake pantch-shelendar un jek viecho hake pantch-shelendar, i grumjendar, i bakrendar un fun i burike. Un de les o rashajeste Eleasar, te dell job kowa o baro Debleste.

²⁹

³⁰Kol wawar Israelitarja hunte denn ninna tchomone o Debleske. Lendar less tu jek menshes hake paash-shelendar un jek viecho hake paash-shelendar, i grumjendar, i bakrendar, fun i burike, un i tsele wawar viechendar, un hunte dess len kol Levitarjen, kai krenn pengri budi ap o Debleskro kheer.”

³¹O Mose un o rashai Eleasar kran jaake har o baro Dewel kowa o Moseske penas.

³²Un kowa, hoi i lurde tapran un hoi djido atchas his 675.000 (shob-sheel-efta-deesh-te-pantch-serja) bakre.

³³72.000 (efta-dui-serja) grumja,

³⁴61.000 (shob-deesh-te-jek serja) burike,

³⁵32.000 (trijanda-te-dui-serja) djuwja, kai kek murshestar an-tapedo wan.

³⁶Un ko paash, kai kolenge hi, kai an o kurepen djan, his 337.500 (triin-sheel-trijanda-te-efta-serja-pantch-sheel) bakre.

³⁷Kolendar hunte dan jon o baro Debleste 675 (shob-sheel-efta-deesh-te-pantch) bakre.

³⁸Ninna 36.000 (trijanda-te-shob-serja) grumja. Kolendar hunte dan jon o baro Debleske 72 (efta-deesh-te-dui) grumja.

³⁹Ninna 30.500 (trijanda-serja-te-pantch-sheel) burike. Kolendar hunte dan jon o baro Debleste 61 (shob-deesh-te-jek).

⁴⁰Ninna 16.000 (deesh-te-shob-serja) djuwja. Kolendar dan le o baro Debleste 32 (trijanda-te-dui).

⁴¹Un o Mose das kowa, hoi dan kolla leske o baro Debleske, ko rashajeste Eleasar, jaake har o baro Dewel leske kowa penas.

⁴²Ko wawar paash, hoi o Mose ap i rig tchiwas kol wawar Israelenge, his jaake baro har kol lurdengro paash.

⁴³

⁴⁴

⁴⁵

⁴⁶

⁴⁷Un o Mose las kolestar, hoi i Israelengre hi, o 50. (paash-sheelto) kotar hake viechendar un hake menshendar, un das len kol Levitarjen, kai budrenn ap o Debleskro kheer, jaake har o baro Dewel kowa o Moseske penas.

⁴⁸Un pash o Moseste wan kolla, kai penepaske hi pral kol bud lurdende, kol pralstune pral i sero lurdende un pral i sheel lurdende,

⁴⁹un penan ap leste: “Mer, tire budepangre, lan pre, har bud lurde koi hi, kai men pral lende penepaske hi; un halauter his koi.

⁵⁰Doleske anah mer o baro Debleske ko sonakaskro koowa, hoi hakeno mendar hatsas: brassleta, wastengre werklia, gustria, kanengre un werklia. Mer dah kowa o baro Debleste, te plaissras maro djipaske, te well tchi tardo mank o baro Debleste un mende.”

⁵¹O Mose un o rashai Eleasar lan ko tselo sonakaskro koowa.

⁵²Un ko tselo sonakai, kai kol pralstune o baro Debleske anan, his 200 (dui-sheel) kilogramme pharo.

⁵³Kol lurde, kai his kek pralstune, rikran penge kowa, hoi tapran jon an o kurepen.

⁵⁴O Mose un ko rashai Eleasar lan ko sonakai kol pralstunendar un anan kowa an o Debleskro plachteno kheer, te bistrell o baro Dewel gar, te dikell lo latches ap i Israelitarja.