Read O Debleskro Drom - I Bibla an o Romano Rakepen 2021 4. Mose 6 Bible Online

4. Mose 6 - O Debleskro Drom - I Bibla an o Romano Rakepen 2021 bible

4. Mose 6

¹Un o baro Dewel rakras o Moseha un penas:

²Pen ap i Israelitarja: Te dell jek pes sowel, — nai well i mursh, ninna i djuwel, — un penell o baro Debleske, te well lo leske i tsireske koi,

³palle hunte pijell kowa kek mool un soreli chatchedi, witar kek wawar pipen, hoi dran drake kerdo was. Job hunte chal witar kek drake, kek, hoi pesso hi, witar kek, hoi truk hi.

⁴Jaake rah har job koi sowel das, hunte chal job tchi, hoi i drakengro rukestar wella, witar kek drake, hoi jalo hi, witar kek, hoi pral o tsiro ap o ruk hi.

⁵Jaake rah har job koi sowel das, hunte well gar leskro bal tchinlo, bis te ko tsiro trujel hi, kai das job pes an o baro Debleskro wast. Job hi o Debleskro, un hunte mukell peskro bal ap o shero lengsto te well.

⁶An ko tselo tsiro, kai das job pes an o baro Debleskro wast, hunte djal job gar pash jekeste, kai meras.

⁷Ninna te hi ko mulo leskro dad, leskri dai, leskro phraal un leskri pheen, hunte djal lo gar pash lende, te well lo gar pale-tchiddo an ko tsiro, kai hi lo peskro Debleske koi.

⁸Ko tselo tsiro, kai das job pes sowel, hi job kokres o baro Debleske koi.

⁹Te his job pashel, har meras jek ap jek kopo, wenn leskre balla pale-tchiddo shob diwessa. Ap o eftato diwes hunte tchinell job peskro bal ap o shero, un job well pale erligo.

¹⁰Un ap o ochtato diwes hunte lell job dui diwje taube oder dui wawar taube un anell kolen pash o rashajeste pash o wudar glan o Debleskro plachteno kheer.

¹¹Un o rashai hunte dell koi jek tauba o Debleste, te well i doosh krik lino. Un koi wawar hunte chatchrell job o Debleske, te well lo pale erligo un koi doosh lestar krik lino, hoi job ap peste anas, har tapras lo i mules an, un was doleske pale-tchiddo. Palle mukell job peskro bal pale lengsto te well,

¹²te well lo newes o baro Debleske koi ko tsireske, kai das lo pes sowel. Un job hunte lell i bakro, hoi jek bersh phuro hi, un dell les o Debleste, te well halauter pale mishto. Kol diwessa glan te wan leskre balla pale-tchiddo, his tchitcheske.

¹³Kowa hi ko lab, hoi penell koleske, kai hi i tsireske o Debleske koi, hoi te krell lo: Te hi ko tsiro trujel, kai das job pes sowel, hunte well lo pash o wudar glan o Debleskro plachteno kheer anlo.

¹⁴Un job hunte dell o baro Debles i bakro, jek bersh phuro un sasto, te well kowa tseles chatchedo o Debleske. Ninna dell job o Debles i bakri, jek bersh phuro un sasto, te well leskri doosh krik lino. Un pale anell lo leske i wawar sasto mursh bakro, hoi chan le khetne glan o Debleste.

¹⁵Ninna anell lo i kashteni piri, kai merklia un mare dren hi, kai kek shutlo jarro dren hi: merklia dran latcho jarro un djet, un sane mare, kai djet pre maklo hi, ninna ko tselo chapen dran jarro un koi mool, hoi koi pashel hi, te well lo dino o Debleske.

¹⁶Un o rashai hunte anell kowa glan o baro Debleste. Palle marell lo ko jek bakro, te well leskri doosh krik lino un ko duito, hoi o Debleske tseles chatchedo wella.

¹⁷Palle dell lo o mursh bakro o baro Debleste, ninna koi kashteni piri, kai o maro dren hi, kai kek shutlo jarro dren hi. Ko koowa dell lo o Debleste, te chan le les khetne glan leste. Pal kowa anell lo ko wawar chapen dran jarro, un koi mool, te well kowa o Debleske dino.

¹⁸Un ko mursh, kai his i tsireske o Debleske koi, hunte tchinell o bal ap peskro shero, hoi mukas lo lengsto te well o Debleske. Un job tchinell les pash o wudar glan o Debleskro plachteno kheer, un lell les un witsrell les ap i jag, kai chatchrenn kol thulle kotja ko bakrestar, hoi chan le khetne glan o Debleste.

¹⁹Un pal kowa lell o rashai i kotar keredo mass o bakreskro phikestar, ninna i merkli un i maro, kai kek shutlo jarro dren hi, dran i kashteni piri un tchiwell koleske, kai his i tsireske o Debleske koi, an leskre wasta.

²⁰Palle lell o rashai kowa an peskre wasta un hadell les pre, te dell lo les o baro Debleste. Ko koowa, khetne o betch un i palstuni heri o bakrestar, hi o rashajeske. Koi pal nai pijell kowa, kai i tsireske o Debleske koi his, pale mool.

²¹Jaake hunte krell ko mensho, kai his i tsireske o Debleske koi, un dell kau koowa o baro Debleste, ninna ko wawar koowa, hoi job pes sowel das. Jaake har job pes sowel das, jaake hunte krell job ninna.

²²Un o baro Dewel rakras o Moseha un penas:

²³“Pen ap o Aroneste un ap leskre tchawende: Jaake hunte penenn tumer ap kol Israelitarja, te rakrenn miri bacht pral lende win:

²⁴Mu dell tut o baro Dewel bacht un soor, un dell garda ap tute!

²⁵O baro Dewel dikell latches ap tumende un krell peskro dji tumenge pre!

²⁶O baro Dewel dikell kamles ap tumende un dell tumen shukapen an o dji!

²⁷Tumer te rakrenn jaake miro lab pral i Israelitarja win, dau me len bacht un soor.”