Read O Debleskro Drom - I Bibla an o Romano Rakepen 2021 4. Mose 9 Bible Online

4. Mose 9 - O Debleskro Drom - I Bibla an o Romano Rakepen 2021 bible

4. Mose 9

¹Un o baro Dewel rakras o Moseha an o mulo tato them Sinai, an o duito bersh, har jon dran o them Egiptia win djan, an o ersto tchon, un penas:

²“I Israelitarja hunte rikrenn o baro diwes, hoi kharella Passa[15] ap o tchatcho tsiro:

³Ap o deesh-te-starto diwes, an kai tchon, ap i rati, ap i tchatcho tsiro hunte chan le ko chapen Passa jaake har tumenge penom, un hunte krenn pal mire tsele laba.”

⁴Un o Mose penas lenge kal laba.

⁵Un jon kran ko chapen, hoi kharella Passa, ap o deesh-te-starto diwes, an ko ersto tchon, ap i rati, an o mulo tato them Sinai. Jaake har o baro Dewel o Moseske penas, jaake kran i Israelitarja.

⁶Koi his mursha, kai tapran i mules an, un wan pale-tchiddo. Kolla nai wan gar glan o Debleste ap ko diwes, te chan le ko Passa. Jon wan glan o Moseste un glan o Aroneste,

⁷un penan ap lende: “Mer tapram i mules an un wam pale-tchiddo. Hunte rikras men pale un nai wah gar glan o baro Debleste, te anas leske i bakro khetne i wawar Israelitarja?”

⁸Un o Mose penas ap lende: “Atchenn kate. Me kamau te shunell, hoi o baro Dewel tumenge penell.”

⁹Un o baro Dewel rakras o Moseha un penas:

¹⁰Pen ap i Israelitarja: Te was jek tumendar, ninna tumare tchawendar, pale-tchiddo ap i muleste, nai chal lo ko chapen gar ap kau diwes. Kowa hi ninna jaake kolenge, kai hi ap o drom.

¹¹Jon hunte chan ko chapen an o duito tchon ap o deesh-te-starto diwes, ap i rati, un hunte chan koi pashel ko maro, kai kek shutlo jarro dren hi, ninna shutlo senlepen.

¹²Un jon hunte mukenn tchi tchiddo pral i rat. Witar kek kokalo hunte well phagedo. Un halauter hunte well jaake kerdo har pash o Passa, hoi chan le ap o tchatcho tsiro.

¹³Koon gar pale-tchiddo hi un gar ap o drom hi, kowa hunte rikrell o Passa ap o tchatcho diwes. Te krell lo kowa gar, hunte well lo infam un atchell buder gar pash peskre menshende. Koi phagi lell lo doleske, kai was lo gar ap o tchatcho tsiro glan o baro Debleste, te anell lo leske i bakro. Leskri doosh atchell ap leste.

¹⁴Un te hi jek mank tumende, kai gar tumendar hi, un kowa kamell ninna o baro Debleske o diwes Passa te rikrell, jaake nai krell job kowa jaake, har tumenge penom, pal mire tsele laba. Kol laba hi leske har tumenge.

¹⁵Un ap ko diwes, kai was o Debleskro kheer pre-tchiddo, ko kheer, kai o Debleskre deesh laba dren hi, was i wolka tele pral o kheer. Un an i rati his i jag an late.

¹⁶Jaake his kowa o tselo tsiro: ap o diwes his koi wolka pral ko kheer tardo. Un ap i rati dikas li win har i jag.

¹⁷Hako kopo, kai hadas pes koi wolka, djan i Israelitarja dureder. Un kote, kai koi wolka tardo atchas, koi atchan i Israelitarja ninna tardo.

¹⁸O baro Dewel te penas ‘Djan!’, palle djan jon. Un o baro Dewel te penas, te atchenn jon, palle atchan jon un tchiwan pengre plachtene khera pre. Jaake rah, har koi wolka pral o kheer tardo atchas, jaake rah atchan jon.

¹⁹Un ninna te atchas koi wolka bud diwessa pral o kheer tardo, shunan i Israelitarja ap o baro Debleste, un djan gar dureder.

²⁰Un te atchas koi wolka i tikno tsiro un gar bud diwessa pral o kheer tardo, atchan le i tikno tsiro koi, un palle djan le dureder, hako kopo jaake har o baro Dewel penas.

²¹Te his koi wolka jek rat koi, un palle hadas li pes, djan jon dureder. Un ap ko tsiro, kai hadas pes koi wolka, nai well ap o diwes, nai well ap i rati, palle djan jon ninna dureder.

²²Te atchas koi wolka dui diwessa, jek tchon, ninna budeder tsiro pral o kheer tardo, jaake atchan i Israelitarja, un djan gar dureder. Un te hadas pes koi wolka, djan jon dureder.

²³Un te penas o baro Dewel, te atchenn jon, tchiwan jon pengre plachtene khera pre, un te penas job, te djan jon, jaake djan jon. Un jaake shunan jon ap o baro Debleste un kran halauter jaake, har job ap o Moseste penas.