Read O Debleskro Drom - I Bibla an o Romano Rakepen 2021 Nahum 2 Bible Online

Nahum 2 - O Debleskro Drom - I Bibla an o Romano Rakepen 2021 bible

Nahum 2

¹Tumer menshe an Juda, dikenn: Pral i berge well i mursh, kai anell i latcho lab. Job penell: O kurepaskro tsiro hi trujel! Rikrenn pale tumare bare diwessa un awenn bachtelo koi dren! Denn o Debleske kowa, koleske tumen sowel dan. Ko tchilatcho, kai halauter paash das, well buder gar an tumaro them. Job hi buder gar koi.

²Tumer menshe an o foro Ninive, kurepangre wenna, te krenn le tumaro foro paash. Denn garda ap o foreskri massuri! Rikrenn i dromma an i jak! Lenn i chare an o wast! Anenn tumare tsele lurden khetne!

³O Israel his har i shukar drakengro them, hoi i randepangre khetne stakran, un lengre drakengre kashta tele dan. Kanna dell o baro Dewel o Jakobeskre tchawende pengro barepen pale pale.

⁴Kol lurde wenna, te kurenn le pen tuha, Ninive! I kurepangre hidjrenn lole shilte un lole gada. O saster ap i kurepangre wurdja dikell win har jag. Un i graja nashenn sik.

⁵Har diwjes ulerenn i wurdja ap i dromma! Jek hi sikeder har o wawar. Jon dikenn win har jag, un hi sik har koi jag, hoi har i karepen ap o bolepen pre un tele djal.

⁶I pralstune lurde wenn khetne gole dino. Jaake sik nashenn le, te perenn le pral pengre pire. Pash o foreskri massuri nashenn le, un tchiwenn pengro sorelo khatepen pre.

⁷Kol wudja pash i panja wenn pre kerdo. Un i daar taprell halauteren an o baro rajeskro kheer.

⁸Koi rani well pandles krik anlo. Lakre djuwjengre budepangre rowenn har i taube, un denn penge ap pengro betch.

⁹Halauter nashenn dran o foro Ninive har pani, hoi dre-pandlo his, win nashell, te well o wudar pre kerdo. Atchenn tardo! Atchenn tardo! denn le gole pal lende. Kek rissrell pes!

¹⁰Tumer lurde, randenn rup, randenn sonakai! O foro hi pherdo brawlepen, pherdo kutch koowa!

¹¹Khetne stakedo un wi-tchoredo well o foro. Halauteren hi darene djia, lengre herja trissenn i darjatar. Jon djan bango i dukatar, lenge muja hi parno.

¹²Hoi was kanna dran o foro Ninive? O foro his har i khatepen, kai o lewo un i lewetsa pengre ternentsa trujel nashan, un kek koi his, kai lenge kote nai daar krals.

¹³O lewo randas un tapras jaake bud viechen, te wan leskre tchawe un leskre romja tchalo. Leskro khatepen kras lo pherdo koleha, hoi lo randas un maras.

¹⁴Dik, penell o baro Dewel, ko rai pral o bolepen un i phub, me djau ap tute, un chatchrau tire kurepangre wurdja. Un o charo marell tire tchawen. Tu aneh buder gar randedo koowa khere. An kek tsiro bitchreh tu buder bitchepangren win, kai penenn i menshende an wawar themma, hoi te krenn le.