Read O Debleskro Drom - I Bibla an o Romano Rakepen 2021 Nahum 3 Bible Online

Nahum 3 - O Debleskro Drom - I Bibla an o Romano Rakepen 2021 bible

Nahum 3

¹Har djungeles djal tuke, tu foro, kai jaake bud rat nashas! Tu hal pherdo chochepen un tchoredo brawlepen, un nai mukeh tiro randepen gar.

²I klissepangre wenna! Shunenn, har denn le pengre tchupjentsa! Jaake sik har djala nashenn i graja. I wurdja ulerenn, te krenn i rade bari gole. I klissepangre hadenn pengre sasterne chare un witsepaskre tchurja. Koi hi le tchiddo — bud bud marede menshe, jaake bud, te perenn i djide pral lende. Jaake bud mule, te nai djinell kek, har bud jon hi.

⁴Kowa hi i phagi o foreske Ninive. O foro his har i shukar djuwel, kolat bud mursha hi, un o bengeskro koweha trujel djal, un jaake i menshen an wawar themma ap peste pandas.

⁵Dik, penell o baro Dewel, ko rai pral o bolepen un i phub, kanna dau tut tiri phagi. Me tchakrau tiro ripen pre, hadau les pral tiro shero, te hal win rido tardo glan i menshende an i wawar themma, un hunte ladjess tut glan lende.

⁶Me witsrau tchik ap tute un praassau tut, un sikrau halauterenge tiri ladj.

⁷Hakeno, kai tut palle dikell, nashell tutar un penell: Ninive hi paash dino! Kekes khaitell ko foro. Kekes hi latche laba ko foreske.

⁸Hal tu feteder har ko foro Theben, hoi pash o pani Nil tchiddo his? Ko pani trul ko foro his har i massuri trul leste.

⁹Bud bud Egiptarja un lurde dran Etiopia kuran pen kau foreske. Koi pashel wan lurde dran i themma Put un Libia ap lengri rig.

¹⁰Ninna kau foro was dren lino, un leskre menshe pandles anlo an i wawar them. Lengre tchawe wan mulo dino ap hako drom. Pral lengre pralstunende witsran le kashta, koon kones lella. I tsele pralstunen pandan le sasterne shellentsa.

¹¹Ninna tu, Ninive, weh mato i dukatar un dinelo an o shero. Ninna tu rodeh, kai tut nai khatress kolendar, kai kamenn tut te marell.

¹²Tire sorele barrengre khera hi har faige ap i ruk. Well ko ruk trisslemen, perenn kol faige koleske an o mui, kai les trisslell. Jaake sik perell ninna tiro foro an i wasta kolendar, kai kurenn pen leha.

¹³Tire kurepangre — har djuwja wan le! I wudja glan tiro them hi dur pre, te nai djan kolla dren, kai kamenn tut te marell. I jag chatchrell kol sorele kashta, kolentsa i bare wudja pandle hi.

¹⁴Hidjenn tumenge pani khetne ko tsireske, kai tchiwenn pen i lurde trul tumaro foro tardo, un tumer jaake dren pandlo han. Dikenn pal tumare massurja, krenn len sorleder! Stakrenn koi tchik, kolatar tumer barra chatchenn! Krenn sorele barra!

¹⁵Ninna te krenn kowa lauter, well i jag un chal tumen, un i lurde pengre charentsa marenn tumen. Ninna te han tumer jaake bud har stepangre, tumendar atchell gar budeder pral har i hachetikri phubjatar, kai chan i stepangre o djob pre.

¹⁶Tumen hi budeder parepangre har momlia ap o bolepen! Sik hi le krik — har i stepaskro win well dran peskro jaro — un sik hi lo krik!

¹⁷Tumare raja hi har sawe stepangre, tumare pralstune har bud sawe stepangre, kai beshenn pen khetne ap i massuri ap i shila diwes. Un har o kham palle pre djal, hi le pale krik, Kek djinell, kai le hi.

¹⁸Tu, o baro rai pral o them Assur, djiness, i pralstune pral tiro them sowenn hako tsireske, un tire sorele mursha stenn buder gar pre. I menshe an tiro them hi kate te kote tradedo ap i berge. Un kek dell len khetne gole.

¹⁹Tchi hi, hoi tiro dukepen sasto nai krell! Ko dukepen, hoi tu lal, ap koleste hunte meress. Lauter kolla, kai tutar shunenn, denn i wasta pral o shero khetne. Kek hi koi, ap koleste gar pale te pale tchilatcho hals.