Read O Debleskro Drom - I Bibla an o Romano Rakepen 2021 Habakuk 1 Bible Online

Habakuk 1 - O Debleskro Drom - I Bibla an o Romano Rakepen 2021 bible

Habakuk 1

¹Kawa hi kowa, hoi mukas o Dewel peskro rakepaskres, o Habakuk, te dikell.

²Baro Dewel, har rah hunte dap gole, un tu kameh man gar te shunell? Har rah hunte dap gole glan tute: “Dik, hawo tchilatchepen hi kate!” Un tu kameh menge gar ap i rig te well?

³Hoske mukeh tu man sawo tchilatchepen te dikell? Hoske dikeh tu, har i menshe dukedo wenna, un kreh tchi? Kai dikau, dikau tchorepen un djungelo koowa, kurepen un tchingepen.

⁴O tchatchepen nashrell peskri soor, un well buder gar win rakedo. Kowa hoi i tchatchepangre mursha penenn, dell i tchilatchenge tchatcho un gar i latchenge. Jaake well dran o tchatchepen chochepen.

⁵[O Dewel penell:] Dikenn tumen trujel pash i menshende an wawar themma! Tumer krenn bare jaka, hoi dikenna! Me krau tchomone an tumare tsirja, hoi tumer gar patsenna, te wals tumenge kowa penlo.

⁶Me krau te wenn i Babilonarja soreles, kol tchilatche un sik kurepangre. Pral i tseli phub wenn le, de lenn le penge wawar themma dren hoi gar lengro his.

⁷Daar un traash krenn le. Jon krenn penge pengro tchatchepen, un krenn jaake har jon kamenn.

⁸Lengre graja hi sikeder har i bare diwje margodje. Un jon dandrenn sikeder har i diwje djukle an i rati. Lengre bud lurde wenna dran i dur them, un klissenna jaake sik har i adlari tele djal, te taprell lo i vieches.

⁹Jon wenna halauter, te kurenn le pen bari un tchilatchi sorjah. Kek lendar dikell pale. Jon lenn jaake bud pandle, te nai penell kek, kitse jon hi.

¹⁰Jon sanenn pral i bare rajende un pralstunende an wawar themma. Kol tsele forja, kai sorele massurja trul lende tardo hi, hi lenge har tchitcheske; jon tchiwenn tchik pre glan i massurja, un djan pral wergel, un lenn kol forja dren.

¹¹Palle djan le dureder jaake sik har i sorelo phurdepen, un nashrenn kek tsiro; dran pengri soor krenn jon pengro dewel.

¹²[Me penom:] Tu, miro baro Dewel, hal kokres o tchatcho Dewel, un hal hako tsireske koi! Muk men gar te merell! Baro Dewel, pash tute khatrah men, tu dal len gole, te denn le menge i phagi, awa, tu bitchral len, te denn le men dawa.

¹³Tire jaka hi jaake djudjo, te nai dikeh kek tchilatchepen. Tu nai dikeh gar har i menshe dukedo wenna. Hoske kreh tu tchi, te dikeh kol chochene phukepangren, un peneh kek lab, te chal o tchilatcho koles pre, kai hi latcheder un tchatcheder har job?

¹⁴Tu kral, te djan le i menshentsa trujel, har te wans le matche an o baro pani, un kirme, kolen kek rai hi,

¹⁵kolen jon win tserdenn pengre ranjentsa un pengre matchengre gonentsa, un khetne tchiwenn an pengre netse. Palle sal lengro dji, un jon denn gole i bachtjatar.

¹⁶Lengre matchengre gone un lengre netse hi lenge har debla. Lenge chatchrenn le viechen un sungepaskro koowa, te parkrenn len pen, kai jon lenge jaake bud brawlepen un latcho chapen anan.

¹⁷Mukeh tu len pale te pale wawar themma dren te lell? Kameh tu, te marenn le kol tsele menshen koi, un sikrenn lenge kek kamlepen?