Read O Debleskro Drom - I Bibla an o Romano Rakepen 2021 Habakuk 3 Bible Online

Habakuk 3 - O Debleskro Drom - I Bibla an o Romano Rakepen 2021 bible

Habakuk 3

¹Kawa hi ko mangepen, hoi o Debleskro rakepaskro, o Habakuk, o Deblestar mangas.[1]

²Baro Dewel, me shunom, hoi tu lauter kral, Har baro hal tu, baro Dewel! Kre sawo koowa pale an maro tsiro, sawo baro koowa, muk les men ninna te dikell an maro tsiro! An tiri choli biste gar tiro kamlepen!

³O Dewel well dran o them Teman, dran kol berge, hoi kharenn Paran.[2] O bolepen hi pherdo leskro railepen. Un ap i tseli phub sharenn les i menshe.

⁴Leskro shukapen hi har o kham, hoi pre djal. Har khameskri momeli djal dran leskre wasta win. Kote dren hi leskri soor khatedo.

⁵I djungelo nasslepen djal glan leste. Un pal leste well wawar i nasslepen, hoi chal i menshen pre.

⁶Tchiwell job peskro piro ap i phub, palle trissell li. Lell job i wawar themma an o jak, trashenn i tsele menshe. Kol bare phure berge phagenn an kotja, un kol tikne phure berge perenn khetne, te nashell job — har an o phuro tsiro — pral i phub.

⁷Me dikom, har daran kol menshe, kai djiwenn an plachtene khera an o them Kushan, un har trissan i menshe an o them Midian.

⁸Baro Dewel, his tut i choli ap i sorele panja? Wal tu chojedo pral o baro pani, har klissal tu win tire grajentsa, un tire kurepangre wurdja sorleder his har hake wawar?

⁹Tu lal tiro bogo win, un lal tire faile dran lengri possita. Tu phagal i phub pre, un lengste panja nashan win.

¹⁰I berge dikan tut un trissan. Sorelo brishin peras tele dran o bolepen. O baro pani das bari gole. O kham bistras te djal lo pre.

¹¹Un o tchon atchas tardo, har dal tire faile karje. Tiri sasterno witsepaskro tchuri was diklo har i jag.

¹²I choljah stakral tu ap i phub, an tiri choli dal tu i menshen an wawar themma.

¹³Tu djal win, te wess ap i rig tire menshenge, un o rajeske, koles tu win rodal. I dacha ap o kheer o tchilatchestar dal tu khetne. Un leskro kheer rissral trujel bis ap i telstune barra.

¹⁴Tu dal leskre faile an leskro shero. Leskre tsele lurde nashan penge kate te kote. An pengro pre-phurdepen kaman le men krik te tradell. Kolen kai kek soor hi, kaman le pre te chal an pengro khatepen.

¹⁵Tu stakral ap o baro pani tire grajentsa, un o pani hadas pes sorjah.

¹⁶Har sikras man o Dewel kowa lauter, trissom me. Har shunom leskro rakepen, trissas miro mui. I traash djas mange an i kokale, un nashte homs buder gar ap mire herja tardo. Me kamau ap ko diwes te dikell, kai well koi bibacht pral kol menshende, kai djan ap mende pre.

¹⁷O faigetikro ruk hi gomme gar senelo, un ap i drakengre ruka hi kek drake. O djeteskro ruk hidjrell kek djeteskre drake. un ap i hachetikri phub well kek djob baro. Kek bakre hi win, un kek grumja hi tarde an i stanja[3].

¹⁸Miro dji hi bachtelo pral o baro Debleste, Miro dji giwell un djinell: Miro Dewel lell man win dran o merepen.

¹⁹O baro Dewel krell man soreles. Job krell mire pire har i pire o tserfestar[4], te nai stap pral i berge un perau gar. Pash kai gili well bashedo ap dorjengre bashepangre.