Read O Debleskro Drom - I Bibla an o Romano Rakepen 2021 Haggai 1 Bible Online

Haggai 1 - O Debleskro Drom - I Bibla an o Romano Rakepen 2021 bible

Haggai 1

¹An o duito bersh, har o Darius o baro rai his, ap o ersto diwes an o shobto tchon, penas o baro Dewel laba ap peskro rakepaskro, o Haggai, te penell job kal laba dureder ap o Serubbabel, koleskro dad o Shealtijel his, un ap o Jeshua, koleskro dad o Jozadak his. O Serubbabel his o pralstuno pral o them Juda, un o Jeshua his o baro rashai.

²O Haggai penas: Kowa penell o baro Dewel, ko rai pral o bolepen un i phub: Kal menshe penenn: O tsiro hi gomme gar kai, te budras ap o kheer maro baro Deblestar.

³Koi pre penell o baro Dewel:

⁴Hi ko tsiro kai, te beshenn tumer an shukar kerde khera, un miro kheer hi paash dino un tchiddo an kotja?

⁵Doleske penell o baro Dewel, ko rai pral o bolepen un i phub: Denn garda har tumenge djala:

⁶Tumer budrenna ap tumari phub, un anenn gar bud dren. Tumer chan un wenn gar tchalo; tumer pijenn un tumari trush atchella; tumer riwenn tumen latches an, un tumenge well gar tates. Un kones lowe hi, kowa tchiwell len an i possita, kai i cheb dren hi.

⁷Kawa penell o baro Dewel, ko rai pral o bolepen un i phub: Haiwenn, hoske tumenge jaake djala!

⁸Djan ap i berge un lenn kasht, un krenn miro kheer shukar! Kowa hi mange mishto, un jaake wau sharedo, penell o baro Dewel.

⁹Tumer kamenn bud, un gar bud hi, hoi lenn tumer. Un te kamenn kowa khere te anell, lau les tumendar. Hoske kowa? penell o baro Dewel, ko rai pral o bolepen un i phub. Miro kheer hi paash dino un tchiddo an kotja. Un hakeno tumendar dikell kokres ap peskro kheer.

¹⁰Doleske well dran o bolepen kek pani, un dran i phub well kek senlepen.

¹¹Doleske penom, te well kek brishin pral tumaro them, pral i berge, pral o them, kai o djob, i drake un i djeteskre ruka bares wenna, un pral halauter, hoi dran i phub well, ninna pral i menshende un i viechende. Kowa, hoi tumare wastentsa krenn, djal tumenge buder gar mishto.

¹²Un o pralstuno, o Serubbabel, koleskro dad o Shealtijel his, un o baro rashai, o Jeshua, koleskro dad o Jozadak his, kolla shunan kol laba. Ninna shunan len kol tsele menshe, kai his gar pandles krik anlo[1]. Kol laba penas lenge o Debleskro rakepaskro, o Haggai, koles lengro baro Dewel pash lende bitchras. Un i menshe lan kol laba an o dji, un trashan o baro Deblestar.

¹³Kote penas o Debleskro rakepaskro, o Haggai, koles o baro Dewel bitchras, te anell lo kol laba o baro Deblestar i menshenge an o tselo them: ‘Me hom tumentsa’, penell o baro Dewel.

¹⁴Un o baro Dewel tchiwas lenge an o dji, te budrenn le ap o baro Debleskro kheer. Un jaake was o Serubbabel, ko pralstuno pral o them Juda, koleskro dad o Shealtijel his, un o Jeshua, ko rashai, koleskro dad o Jozadak his, un kol tsele menshe, kai gar pandles krik anlo wan, te budrenn le ap o kheer o baro Deblestar, ko rajestar pral o bolepen un i phub.

¹⁵Kowa his ap o 24. (biish-te-starto) diwes an o shobto tchon an o duito bersh, har o Darius o baro rai his.