Read O Debleskro Drom - I Bibla an o Romano Rakepen 2021 Haggai 2 Bible Online

Haggai 2 - O Debleskro Drom - I Bibla an o Romano Rakepen 2021 bible

Haggai 2

¹Ap o 21. (biish-te-jekto) diwes an o eftato tchon penas o baro Dewel ap peskro rakepaskro, o Haggai:

²Pen ap o Serubbabel, ko pralstuneste pral o them Juda, koleskro dad o Shealtijel hi, un ap o baro rashajeste, o Jeshua, koleskro dad o Jozadak hi, un ap i tsele menshende, kai pral atchan an o them:

³Koon tumendar hi gomme koi, kai dikas kau kheer, har lo an peskro shukester tsiro win dikas? Un har dikenn les tumer kanna? Hi tchi leskro shukapen pral!

⁴Kanna penell tumenge o baro Dewel: Awenn soreles, tu, Serubbabel, un tu Jeshua, un tumer halauter, un budrenn! Me hom tumentsa, penell o baro Dewel, ko rai pral o bolepen un i phub.

⁵Me dom tumen miro lab, har tserdan win dran o them Egiptia. Me atchau pash tumende. Ma darenn!

⁶Doleske penell o baro Dewel, ko rai pral o bolepen un i phub: An i tikno tsiro krau me, te trissenn o bolepen un i phub, o baro pani un o truk them.

⁷Awa, i menshenge an i tsele themma lau i soor krik. Un lengro kutch koowa well kate anlo, un me krau miro kheer pherdo railepen. Ko penell o baro Dewel, ko rai pral o bolepen un i phub.

⁸Ko tselo rup, miro hi lo, ko tselo sonakai — halauter hi miro, penell o baro Dewel, ko rai pral o bolepen un i phub.

⁹Kau kheer te well shukeder har miro ersto kheer his. Un me kamau tumen bacht te dell an kau foro, penell o baro Dewel, ko rai pral o bolepen un i phub.

¹⁰Ap o 24. (biish-te-starto) diwes an o enjato tchon an o duito bersh, har o Darius o baro rai his, penas o baro Dewel ap peskro rakepaskro, o Haggai:

¹¹Kowa penell o baro Dewel, ko rai pral o bolepen un i phub: Putch i rashajen, hoi jon penenn an kau koowa:

¹²“Te hidjrals jek an peskro ripen mass, hoi o Debleske hi, un taprals kau ripeha maro an, keredo chapen, mool, un djet, wals ko koowa palle ninna o Debleske?” Un i rashaja rakran pale pale, un penan “Na-a.”

¹³O Haggai putchas pale: “Te taprals jek i mules an un wals jaake pale-tchiddo, un palle taprals lo o chapen an, wals ko chapen ninna pale-tchiddo?” “Awa”, penan i rashaja, “ko chapen wals pale-tchiddo.”

¹⁴Koi penas o Haggai: Jaake hi ninna kal menshentsa an kau them. An mire jaka hi le pale-tchidde. Un lauter, hoi krenn le pengre wastentsa, hi pale-tchiddo, ninna ko koowa, hoi le mange anenn.

¹⁵Un kanna denn garda, har djal tumenge kau diwes, un an ko tsiro, hoi wella! Glan kau diwes kai tchiwan tumer jek bar ap o wawar ap o baro Debleskro kheer, his jaake:

¹⁶Te was jek tumendar kote, kai i djob tchiddo hi, un kamas dui-sheel kilogramme te lell, hatsas job gar budeder har jek sheel kilogramme. Te was jek tumendar kote, kai i mool garedo well, un kamas sheel litarja te lell, hatsas lo gar budeder har star-deesh litarja.

¹⁷Me rikrom o brishin pale, tumaro djob meras tele, brishineskre barra mukom ap tumari hachetikri phub te perell. Pal ko tselo koowa wan tumer gar pale pash mande, un mangan tumen gar tele pash mande.

¹⁸Kau diwes hi o 24. (biish-te-starto) diwes an o enjato tchon. Kau diwes tchiwan tumer i telstune barra miro khereske jek ap o wawar. Kanna denn garda, har tumenge kau diwesseha djala!

¹⁹An tumare djobengre khera atchell doha djob. I drakengre ruka hidjrenn pale drake, i faigetikre ruka hidjrenn faige, i granatikre phabjengre ruka hidjrenn phabja, un i djeteskre ruka hidjrenn djeteskre drake. Kau diwesseha tchiwau miri bacht un miri soor ap tumaro them.

²⁰Ap o 24. (biish-te-starto) diwes an ko tchon rakras o baro Dewel i duito kopo ap o Haggai:

²¹Pen ap o Serubbabel, ko pralstuneste pral o them Juda: Me krau, te trissell o bolepen un i phub.

²²Un me witsrau i beshepangre kol themengre rajendar trujel un lau lengri soor krik. Lengre kurepangre wurdja witsrau trujel khetne kolentsa, kai koi pre beshenna. I graja un i klissepangre merenna. Jek dell o wawares mulo.

²³O baro Dewel, ko rai pral o bolepen un i phub penell: Ap ko diwes dau me tut, Serubbabel, miro tchatcho wast. Tu hal miro bitchepaskro. Tu hal mange jaake kutch har i gustri, koleha miro lab ap i liil tchiwau. Tut rodom win, te budress mange. Kowa penell o baro Dewel, ko rai pral o bolepen un i phub.