Read O Debleskro Drom - I Bibla an o Romano Rakepen 2021 Sacharja 11 Bible Online

Sacharja 11 - O Debleskro Drom - I Bibla an o Romano Rakepen 2021 bible

Sacharja 11

¹Tu Libanon, kre tire wudja pre, te chatchrell i jag tire zedertikre ruka.

²Rowenn, tumer wawar senele ruka! Kol raile zedertikre ruka peran, hi buder gar koi. Rowenn, tumer eichtikre ruka an o them Bashan! O pesso weesh hi tele dino.

³I pralstune pral i themma denn gole i dukatar, lengro railepen hi buder gar. Shunenn i gole i lewendar! O weesh, kai le khere his, pash o pani Jordan, hi khetne stakedo.

⁴Miro baro Dewel penas ap mande: “Ab o bakrengro kol bakrenge, kai djan koi, te wenn le maredo!

⁵Lengre raja marenn len, un kowa djal lenge gar an o dji. Jon bikrenn len un penenn: ‘Sharedo well o baro Dewel! Mer ham brawelo.’ Ninna kol murshen, kai ap i bakre jak denn, hi kek dji lenge.”

⁶O baro Dewel penell: “Kanna khaitenn man buder gar i menshe an kau them. Me mukau i menshen te perell jek an o wast o wawarestar, un dau len ninna lengre pralstunenge an i wasta. Kolla denn o them paash, un me lau len gar win dran lengre wasta.”

⁷Un kol parepangre, kai ginan un bikran i bakre, dan man koi budi, te dap jak ap kol bakre, kai maredo wenn. Un me lom dui kashta: Ko jekes kharom ‘latchepen’ un ko wawar ‘harmenatsjona’. Un me dom garda ap kol bakre.

⁸Un an jek tchon krom me, te hunte djan penge kol triin wawar bakrengre. Me nai dikom len buder gar glan i jaka. Un jon his chojedo ap mande.

⁹Doleske penom: “Kamau buder gar te atchap i bakrengro tumenge. Kol bakre, kai merenna, mu merenn! Kolla, kai nashrenn pen, mu nashrenn le pen! Un kolla, kai djido atchenn, mu chan le jek o wawares!”

¹⁰Me lom miro kasht, hoi kharom ‘latchepen’ un phagom les. Jaake sikrom, kai phagom koi sowel, hoi o baro Dewel dren djas i tsele menshentsa Israel,

¹¹Un koi sowel was phagedo ap kau diwes. Kol parepangre, kai i bakre bikran un ginan, dikan, hoi krom, un haiwan, o baro Dewel rakras dran kowa, hoi krom.

¹²Un me penom ap lende: “Hi tumenge mishto, te denn man lowe miri budjake, palle denn man miro plaissepen. Hi kowa tumenge gar mishto, mukenn les!” Un jon dan man trijanda rupene beme, te plaissrenn le man.

¹³Un o baro Dewel penas mange: “Hawo shukar plaissepen! Lenge hom gar budeder moldo har kawa! Tchip ko rup an o kheer, kai o brawlepen garedo well.” Un me lom kol trijanda rupene beme, un hidjrom len an o baro Debleskro kheer, un tchiwom len kote an o kheer, kai o brawlepen garedo well.

¹⁴Palle phagom miro kasht, hoi kharom ‘harmenatsjona’. Jaake sikrom, kai i menshe an o them Juda un an o them Israel buder gar phrala hi.

¹⁵O baro Dewel penas mange palle: “Le tuke pale o bakrengro koowa, te wess kanna i bakrengro, kai tchi moldo hi!

¹⁶Tchatchepah, me bitchrau i bakrengro an o them, kai dikell gar pal i bakre, kai hi nashedo. Witar gar rodell lo kolen, kai nashran pen. Kolenge, kai dukran pen, well lo gar ap i rig. Un leske hi jek, te well i sasten doha te chal un te pijell. I thulle bakren marell lo peske, un tserdell lenge ninna i pire win.

¹⁷Djungeles djal koleske, kai hi i tchi-moldo bakrengro un mukell i bakren kokres! Mu tchinell o charo leskri mussi tele, un leskro tchatcho jak win! Leskri mussjatar te atchell tchi har i tikno kotar, un leskro tchatcho jakeha dikell lo buder tchi!”