Read O Debleskro Drom - I Bibla an o Romano Rakepen 2021 Sacharja 14 Bible Online

Sacharja 14 - O Debleskro Drom - I Bibla an o Romano Rakepen 2021 bible

Sacharja 14

¹I diwes o baro Debleske wella: Kolla, kai kuran pen tuha, Jerusalem, tchorenn ap ko diwes tiro brawlepen. Un glan tumare jaka denn le hakenes pendar peskro kotar.

²Me lau i lurden dran i tsele themma khetne, te kurenn le pen o foreha Jerusalem. Jon lenn o fores dren, tchorenn i khera win, un taprenn sorjah i djuwjenge an. Kol menshendar an o foro well i paash pandles krik anlo. Kolla, kai pral atchan, atchenn nai an o foro.

³Palle djal o baro Dewel win, te kurell job pes jaake kol lurdentsa dran i wawar themma, har kuras lo pes peskre menshenge an i phure tsirja.

⁴Job hi tardo ap o djeteskri berga, hoi glan o foro Jerusalem tchiddo hi, kote kai o kham pre djala. Un koi berga phagell mashkral an dui kotja, fun kotar kai o kham pre djal bis kote, kai o kham tele djal. Jek kotar djal ap i serwi rig[14], o wawar kotar ap i tchatchi rig[15]. Un mank kol dui berge hi i buchli tala.

⁵Koi tala djal jaake dur har Azel. An koi tala mank o baro Debleskre berge nashenn tumer tumenge jaake, har tumare phure nashan penge, har i berge trissan an ko tsiro, kai o Usija o baro rai pral o them Juda his. Un palle well miro baro Dewel. Un leskre tsele bolepangre wenn khetne leha.

⁶Ap ko diwes dell buder kek shilapen un kek djajepen[16].

⁷Hi jek diwes, — o baro Dewel prindjrell les. Pal o diwes well kek rat. An ko tsiro, kai rati hunte wals, well gar tamlo.

⁸An ko tsiro nashenn djide panja dran o foro Jerusalem win. Ko jek paash nashell an o baro pani, hoi kote hi, kai o kham pre djal. Ko wawar paash nashell an o baro pani, hoi kote hi, kai o kham tele djal. Ko pani nashell an i nijal har an o wend.

⁹Palle hi o baro Dewel o rai pral i tsele themma ap i phub. An ko tsiro hi job kokres o Dewel. Les kokres mangenn le an.

¹⁰O tselo them Juda well i buchlo telstuno them mank o foro Geba un o foro Rimmon, hoi tchatches[17] o forestar Jerusalem tchiddo hi. O foro Jerusalem atchell pralstunes tchiddo, un djal o wudarestar Benjamin bis kote, kai o ersto wudar his, un kotar dureder bis pash o wudar, kai i rigja khetne wenna, un fun o turmo Hananel bis kote, kai i mool dran i drake o baro rajeske kerdo was.

¹¹Kote, an o foro Jerusalem djiwenn bud menshe. Kek wella, te dell lo o foro paash. I menshe kote nai djiwenn kek darjah.

¹²Un kowa hi ko pharo nasslepen, hoi o baro Dewel ap kolende tchiwell, kai djan an o kurepen o foreha Jerusalem: Lengro mass merell tele, har le gomme ap lengre pire tardo hi, lengre jaka an o shero un lengri tchip an o mui merenn tele un perenn win.

¹³An ko diwes krell len o baro Dewel jaake daar, te djinenn le buder gar, hoi le krenn. Hakeno taprell o wawares. Un jon djan jek ap o wawareste pre.

¹⁴Ninna i menshe dran Juda djan ap kolende an Jerusalem pre. Palle lenn i menshe dran Jerusalem ko kutch koowa khetne, hoi kol wawar menshen dran i themma trul lende trujel pash pende hi: Kowa hi bud sonakai, rup un kutch ripja.

¹⁵Un kau pharo nasslepen, hoi was ap i menshende, well ninna ap i graja, i maultikre burike, khamele, burike un pral i tsele viechende, kai pash i lurdende hi.

¹⁶Un kolla, kai djides atchan kol menshendar dran i themma, kai his an o kurepen o foreha Jerusalem, kolla wenna hako bersh an Jerusalem, te sharenn le o baro rajes an Jerusalem. Job hi o baro Dewel, ko rai pral o bolepen un i phub. Kote an Jerusalem kamenn le ninna kol bare diwessa te rikrell, kai i menshe an patjengre khera djiwenn.

¹⁷Te hi jek them ap kai phub, dran koleste wenn le gar an Jerusalem, te sharenn le o baro Debles, ko rajes pral o bolepen un i phub, palle dell kek brishin ap ko them.

¹⁸Ninna te hi kolla i Egiptarja, kai djan gar pre an Jerusalem glan o baro Debleste, lenn le koi phagi, hoi dell o baro Dewel i menshenge an i tsele themma, kai wenn gar pre an Jerusalem, te rikrenn le kol bare diwessa, kai i menshe an patjengre khera djiwenna.

¹⁹Te rikrenn le gar kal diwessa, kol Egiptarja un kol tsele wawar menshe, lenn le pengri phagi.

²⁰An ko tsiro hi tchinlo ap i tikne bashepangre, hoi hi pandlo trul i grajengre menja: o baro Debleske! I pirja an o Debleskro kheer hi o Debleske jaake bud moldo har i bare tchare glan o Debleskri chatchepaskri[18].

²¹I tsele pirja an Jerusalem un an o them Juda hi o Debleste dino; i menshe, kai an o Debleskro baro kheer wenna, nai lenn len un nai kerenn o mass koi dren. Un an ko tsiro dell buder kek parepaskro an o kheer o baro Deblestar, ko rajestar pral o bolepen un i phub.