Read O Debleskro Drom - I Bibla an o Romano Rakepen 2021 Sacharja 3 Bible Online

Sacharja 3 - O Debleskro Drom - I Bibla an o Romano Rakepen 2021 bible

Sacharja 3

¹Un o baro Dewel mukas man te dikell o baro rashajes Jeshua. Kowa his tardo glan o bolepaskro o baro Deblestar. Un ap leskri tchatchi rig his o beng tardo, te tchiwell lo i doosh ap o Jeshua.

²Un o bolepaskro o baro Deblestar penas ap o bengeste: “O baro Dewel te tchingrell ap tute, tu beng! O baro Dewel, kai rodas o Jerusalem win, mu tchingrell ap tute! Kau mursh hi har i kasht, win tserdedo dran i jag.”

³O Jeshua his koi tardo, an-rido an tchikle koola.

⁴Un o bolepaskro penas ap kolende, kai glan leste tardo hi: “Lenn kol tchikle koola lestar!” Un ap o Jeshua penas lo: “Me lom tiri doosh tutar, un mukau tuke newe koola te riwell.”

⁵Un job penas: “Tchiwenn i djudjo shereskro pandepen ap leskro shero!” Un jon tchiwan i djudjo shereskro pandepen ap leskro shero, un riwan leske djudje koola an. Un o bolepaskro o baro Deblestar his koi pashel tardo.

⁶Un o bolepaskro das peskro wast koi pre, har penas lo:

⁷Kowa penell o baro Dewel, ko rai pral o bolepen un i phub: Te djah tu ap mire dromma, un kreh koi budi mishto, hoi dom tute, palle wess o pralstuno pral miro kheer un kol glanstune platse. Un tu nai weh glan mande khetne kolentsa, kai kate tardo hi.

⁸Shun kanna, Jeshua, tu baro rashai: Tu un tire phrala, kai glan tute beshdo hi, tumer han i sikepen, hoi o baro Dewel kamell te krell an o tsiro, hoi wella: Me bitchrau miro budepaskres, kai kharell ‘newo ruk’.

⁹Dikenn ko jek bar, hoi tchiwom glan o Jeshua, ap leste hi efta jaka. Un me tchinau laba an ko bar, penell o baro Dewel, ko rai pral o bolepen un i phub. Me lau i doosh ko themestar krik ap jek diwes.

¹⁰An ko emligo tsiro, mukell jek o wawares te penell: Am pash mande, te was mer bachtelo tel i drakengre ruka un tel i faigetikre ruka. Kowa penell o baro Dewel, ko rai pral o bolepen un i phub.