Read O Debleskro Drom - I Bibla an o Romano Rakepen 2021 Sacharja 4 Bible Online

Sacharja 4 - O Debleskro Drom - I Bibla an o Romano Rakepen 2021 bible

Sacharja 4

¹Un o bolepaskro, kai mantsa rakras, was pale un djangras man pre har dran o sopen,

²un penas ap mande: “Hoi dikeh?” Me penom: “Me dikau i momelengri kerdi dran sonakai. Ap late hi i tcharo. Koi pre hi efta momlia, hakeni i mujeha.

³Un dui djeteskre ruka hi koi tardo, jek ap lakri tchatchi rig un jek ap lakri serwi rig.”

⁴Un me penom ap o bolepaskro, kai mantsa rakrell: “Miro rai, hoi hi kowa?”

⁵“Djineh gar, hoi kowa hi”, putchas lo mandar. “Na-a, miro rai”, penom me.

⁶“Kol efta momlia hi o baro Debleskre jaka, hoi lauter dikenn, hoi ap i phub djala.”

⁷“Un hoi hi kol dui djeteskre ruka”, penom me, “hoi tchatches un serwes pash i momelengri tardo hi, un hoi hi lengre dui kashta[3], kolengro djet an kol dui sonakangre koola[4] nashell?”

⁹Un job putchas: “Djineh gar, hoi kolla hi?” Me penom: “Na-a, miro rai.”

¹⁰Job penas: “Kolla hi kol dui wi-rodede mursha, kolen o rai pral i tseli phub o djeteha dren makas, te krenn le leskri budi.”

¹¹Un o bolepaskro rakras pale ap mande un penas: O baro Dewel penell ap o Serubbabel: Kowa, hoi kameh te krell, nai kreh gar lurdentsa, witar gar dran tiri soor. Kowa krell miro ducho. Kowa penell o baro Dewel, ko rai pral o bolepen un i phub.

¹²Hadell pes tchomone bares har i berga glan tute, Serubbabel? Kowa hunte perella an peste khetne. Tu tchiweh miro kheer pale pre. Un ap ko tsiro, kai tchiweh o pralstuno bar pre, denn i menshe gole: Shukar, kowa hi shukar!

¹³Un o baro Dewel penas mange: O Serubbabel tchiwas i telstune barra miro kherestar jek ap o wawar. Un leskre wastentsa tchiwell lo i pralstune barra pre, te well o kheer kerdo. Ap ko tsiro, kai well kau lab tchatcho, dikenn tumer: Kowa hi o baro Dewel, ko rai pral o bolepen un i phub, kai bitchras man pash tumende.

¹⁴Koon dikas o ropah tele ap o tikno koowa, kowa dikell bachteles ap o pralstuno bar, har hidjrell les o Serubbabel an peskro wast.