Read O Debleskro Drom - I Bibla an o Romano Rakepen 2021 Sacharja 5 Bible Online

Sacharja 5 - O Debleskro Drom - I Bibla an o Romano Rakepen 2021 bible

Sacharja 5

¹Me dikom pale pre un dikom i liil, hoi djas an i lufta.

²Un o bolepaskro putchas mandar: “Hoi dikeh?” Me penom: “I liil, hoi djal an i lufta. Ko liil hi enja metarja lengsto un star-te-paash metarja buchlo.”

³Un job penas ap mande: “Kowa hi o praassepen, hoi djal win pral o tselo them Juda. Kau liil penell: Hakeno, kai chochell, well win tradedo dran o them. Ninna hakeno, kai dell i chocheno sowel, well krik lino.

⁴O baro Dewel, ko rai pral o bolepen un i phub, penell, ko praassepen te well pral o tchorepaskro kheer un an o kheer kolestar, kai dell pes i chocheno sowel an o lab o baro Deblestar. Ko liil atchell an lengre khera, un chal len pre, ninna lengro kasht un lengre barra.”

⁵Un ko bolepaskro, kai mantsa rakrell, was glan un penas ap mande: “Dik! Hoi well kote?”

⁶Un me putchom: “Hoi hi kowa?” Job penas: “Kowa hi i korba, hoi kote win well. Kai korba hi o tchilatchepen o tselo themestar.”

⁷Pral ap koi korba his i pharo saster, te tchakrell lo koi korba. Un ko saster hadas pes. Un koi his i djuwel, beshdo an koi korba.

⁸Un o bolepaskro penas: “Koja hi o tchilatchepen.” Un job das lake i ladini, te perell li pale an i korba, un witsras o saster pale ap i korba.

⁹Un me dikom pre un dikom dui djuwjen, kai wan pash mande. Kolen his mussja har kol bare tchirkle, hoi kharenn ‘storche’. Un o ducho djas an lengre mussja un tradas len glan. Un kal djuwja hidjran koi korba mank i phub un o bolepen krik.

¹⁰Un me penom ap o bolepaskro, kai mantsa rakrell: “Kai hidjrenn le koi korba?”

¹¹Job penas: “An o them Shinar[5], te well lake kote i kheer kerdo. Kote well koi korba pre tardo un an-mangedo.”