Read O Debleskro Drom - I Bibla an o Romano Rakepen 2021 Sacharja 6 Bible Online

Sacharja 6 - O Debleskro Drom - I Bibla an o Romano Rakepen 2021 bible

Sacharja 6

¹Un me dikom pale pre un dikom star wurdja. Kolla wan mank dui berge win. Kol berge his dran lolo saster.

²Glan o ersto wurdin his lole graja, glan o duito kale graja,

³glan o triinto parne graja un glan o starto wurdin his kalo-parne graja. Jon halauter his sorelo.

⁴Un me penom ap o bolepaskro, kai mantsa rakrell: “Miro rai, koon hi kalla?”

⁵Un o bolepaskro penas: “Kolla hi kol star duche[6] tel o bolepen, kolla his tardo glan o rajeste pral i tseli phub, un wenn kanna win.”

⁶I kale graja djan ap i serwi rig[7], i parne graja djan ap i rig, kai o kham tele djal, un i kalo-parne graja djan ap i tchatchi rig[8].

⁷Kol sorele graja wan sik win, te djan le an i themma trujel. Un o bolepaskro penas lenge: “Djan koi un dikenn tumen trujel ap i phub!” Un jon djan an i themma trujel.

⁸Palle das o bolepaskro gole ap mande: “Kol graja, kai djan ap o serwo drom, hoi djal an o them Babilonia, kolla kran, hoi o baro Dewel kote kamas te krell.”

⁹O baro Dewel penas mange:

¹⁰“Kol mursha, o Heldai, o Tobija un o Jedaja, wan khere dran o them Babilonia. Le lendar rup un sonakai, un dja kau diwes an o kheer o murshestar Josia, koleskro dad o Zefanja hi. Un kre i stadi dran o rup un o sonakai un tchip kowa ap o shero o baro rashajestar Jeshua, koleskro dad o Jozadak hi.

¹²Un pen leske: Kowa penell o baro Dewel, ko rai pral o bolepen un i phub: Ko mursh, kai well kharedo ‘newo ruk’, well baro ap peskri platsa. Un job krell o baro Debleske i newo kheer.

¹³Job hi kowa, kai krell o baro Debleske i kheer, un job well sharedo har i baro rai. Job hi beshdo ap peskri raili beshepaskri un hi o rai pral peskre menshende. Un i rashai hi tardo ap peskri tchatchi rig. Un kol dui djiwenn latches khetne.

¹⁴Un o baro rajeskri stadi atchell an o baro Debleskro kheer, te wenn kol mursha Heldai, Tobija, Jedaja un Josia gar bistedo.”

¹⁵Dran dur themma wenna kolla, kai krenn o baro Debleskro kheer. Un palle dikenn tumer, kai o baro Dewel, ko rai pral o bolepen un i phub, kowa hi, kai bitchras man pash tumende. Te krenn tumer kowa, hoi tumaro baro Dewel tumenge penell, wella kowa halauter jaake.