Read O Debleskro Drom - I Bibla an o Romano Rakepen 2021 Sacharja 7 Bible Online

Sacharja 7 - O Debleskro Drom - I Bibla an o Romano Rakepen 2021 bible

Sacharja 7

¹An o starto bersh har o Darius o baro rai his, ap o starto diwes an o enjato tchon — ko tchon kharell Kislew — rakras o baro Dewel ap o Sacharja.

²Glan kau tsiro bitchran i menshe an o foro Betel murshen pash o kheer o baro Deblestar, kai hi o rai pral o bolepen un i phub, te mangenn le lestar leskro latchepen. Kal mursha his o Sharezer un o Regem-Melech peskre murshentsa. Jon te putchenn kote ninna i rashajendar un o Debleskre rakepangrendar: “Hunte kras mer dureder, te chas tchi o Debleske un rowas an o pantchto tchon har kram jaake bud bersha?”

⁴Koi penas o baro Dewel, ko rai pral o bolepen un i phub, ap mande:

⁵“Pen i tsele menshenge an o them un kol rashajenge: Har chan tumer tchi un dan gole ropah an o pantchto tchon un an o eftato tchon an kal efta-deesh bersha, kran tumer kowa mange? Na-a!

⁶Un ninna har chan un pijan, kran tumer kowa tumenge un gar mange!”

⁷Kawa hi kowa, hoi o baro Dewel mukas te penell dran o mui leskre rakepangre, kai glan mande koi his, har o foro Jerusalem brawelo his, un bud menshe kote djiwan, ninna an i forja trujel un an ko mulo them, hoi kharell Negev, un an o telstuno them.

⁸Kau lab penas o baro Dewel ap o Sacharja:

⁹Me, o baro Dewel, ko rai pral o bolepen un i phub, penom glan bud bersha mire menshenge: “Tumer hunte denn jak, te well o tchatchepen kerdo. Un hakeno hunte krell peskro dji pre peskro phraleske un well leske latches.

¹⁰Ma krenn tchilatchepen kol romjenge, kolengro rom meras, un kol tchawenge, kolen kek dad buder hi, witar gar kolenge, kai wi-themarja hi un kol tchorwelenge! Ma lenn tumenge glan an tumare djia, te dukrenn tumaro phrales!”

¹¹Mire menshe kaman gar jak te dell ap mire laba, un rissran mange pengro dumo, un pandan pengre kanda, te shunenn le gar, hoi me lenge penom.

¹²Lengre djia kran le har bar, te shunenn le gar ap mire laba, hoi sikrenn har te djan le miro drom. Kal laba penan lenge mire rakepangre, kai djiwan glan bud bersha. Doleske was miri bari choli ap lende.

¹³Un djas jaake: Jon shunan gar, hoi lenge penlo was. Doleske kamom witar gar te shunell, har jon gole dan, penas o baro Dewel, ko rai pral o bolepen un i phub.

¹⁴Doleske tradom len an wawar themma, hoi prindjran le gar. Un lengro them was muklo. Kek budras un djiwas buder gar koi. Jaake kran le dran kau latcho them i mulo them.