Read O Debleskro Drom - I Bibla an o Romano Rakepen 2021 Sacharja 9 Bible Online

Sacharja 9 - O Debleskro Drom - I Bibla an o Romano Rakepen 2021 bible

Sacharja 9

¹Kawa hi o lab, hoi rakras o baro Dewel; kau lab well an o them Hadrach un djal bis an o foro Damaskus. Tchatchepah, o baro Dewel dikell ap i tsele menshende, gar kokres ap i menshende an Israel.

²Job lell o them Hamat an i jak, hoi hi tchiddo ap i rig o forestar Damaskus. Ninna lell lo i forja Tirus un Sidon an i jak, kai i menshe jaake gosewo hi.

³I menshe an Tirus kran penge sorele massurja, un lan jaake bud rup un sonakai khetne har tchik ap o drom hi.

⁴O Dewel, maro rai, lell lenge krik, hoi len hi, un witsrell lengro brawlepen an o baro pani. Un o foro well tele chatchedo an i jag.

⁵I menshe an o foro Ashkelon shunenn kolestar un trashenna, un kolla an o foro Gaza lenn bari daar, ninna kolla an o foro Ekron. Len hi buder kek, kai rikrell peskro wast pral lende. An o foro Gaza dell buder kek baro rai, un an o foro Ashkelon djiwell buder kek Israelitari.

⁶Menshe dran wawar themma wenn an o foro Ashdod, te djiwenn le koi. O baro Dewel penell: “Kol pre-phurde Filistarjen krau me tikno.

⁷Lendar tserdau ko ratlo mass dran lengro mui win, un ko pale-tchiddo mass mank lengre danda krik.” Palle wenn kol Filistarja, kai pral atchenn, maro Debleskre menshe. Jon wenn har i familja dran o kheer Juda. Un i menshe dran Ekron djiwenn jaake mank lende har i Jebusarja an Jerusalem.

⁸“Me kokres dau garda ap miro them, te wenn kek lurde dran wawar themma dren. Kek baro rai i wawar themestar nai rikrell mire menshen tele. Mire jakentsa dikau kanna koi pre.”

⁹Ab bachtelo, tu foro Zion! Denn gole i bachtjatar, tumer menshe an Jerusalem! Dikenn, tumaro baro rai wella pash tumende! Job anell o tchatchepen, un well ap tumari rig. Job krell pes gar bares, un klissell ap i burika, awa, ap i terni burika.

¹⁰O baro Dewel penell: Me lau i kurepangre wurdja krik dran o them Israel[9], un i kurepangre graja dran Jerusalem. Un i kurepangre boge wenn phagedo. Tumaro baro rai lell o tchingepen krik mank i natsjone. Job hi o rai fun jek baro panjestar bis ap o wawar, fun o panjestar Eufrat bis an i dureder themma ap i tseli phub.

¹¹Shunenn, penell o baro Dewel, me anau tumare pandlen win dran o stilepen, win dran o them, hoi hi har i brunna, kai kek pani dren hi. Kowa well jaake tchatcho har koi sowel, hoi tumentsa dren djom, un hoi rateha tchatcho was.

¹²Tumer pandle, awenn pale khere an ko sorelo foro, tumer, kai djinenn: Mer atchah gar hako tsireske pandle. Kau diwes penau tumenge: Me dau tumende dui kope jaake bud latchepen har kol duka, hoi hunte lan ap tumende.

¹³Me kurau man i lurdentsa dran o grichtikro them. I menshe dran Juda hi miro kurepaskro bogo. I menshe dran Israel hi mire faile, un kol mursha dran Jerusalem hi miro charo, koleha len dau.

¹⁴O baro Dewel mukell pes te dikell pral peskre menshende, [te rikrell lo peskre wasta pral lende]. Leskro failo djal sik har o bolepaskri jag[10]. O baro Dewel, maro rai, mukell an i bari phurdepaskri[11] te phurdell. Job djal an o sorelo ducho, hoi well kotar, kai o kham pralstunes tardo hi.

¹⁵O baro Dewel, ko rai pral o bolepen un i phub, rikrell peskre wasta pral peskre menshende. Jon wenn i sorleder un stakrenn i barra tele, hoi ap lende witsedo wan. Jon pijenn un denn gole har te wans le mato i moljatar. Jon wenn jaake pherdo rat, har i tcharo pherdo viechengro rat hi, hoi well win tchoredo o Debleske ap leskri chatchepaskri, un hoi nashell pral i rigja tele.

¹⁶Ap ko diwes lell len lengro baro Dewel win dran i tchilatche wasta. Job hi lenge har i bakrengro, kai dell garda ap peskre bakren. Har i kutch barra ap i rajeskri stadi krenn le o them shukar.

¹⁷Awa, har railo un shukar well kowa! I tchawe wenn sorele terne mursha un djuwja, jaake bud djob un mool hi koi.