Read O Debleskro Drom - I Bibla an o Romano Rakepen 2021 Maleachi 1 Bible Online

Maleachi 1 - O Debleskro Drom - I Bibla an o Romano Rakepen 2021 bible

Maleachi 1

¹Kawa hi o lab, hoi penas o baro Dewel ap peskro rakepaskro, o Maleachi, te penell job kowa dureder ap i Israelitarja.

²“Me kamau tumen o djijestar”, penell o baro Dewel. Tumer penenn mange koi pre pale: “Har dikah mer kowa, kai tu kameh men?” “Hi gar o Esau un o Jakob phrala?” penell o baro Dewel. “Un me kamau o Jakobes,

³o Esaes kamau me gar. Un krom, te was leskro them, kai bud berge hi, har i mulo them, kai i diwje djukle djiwenn.

⁴Te penenn ninna leskre tchawe, kol Edomarja: ‘Ninna te wan mare forja paash dino, mer tchiwah len newes pre’, palle penau me, o baro Dewel, ko rai pral o bolepen un i phub: ‘Ninna te tchiwenn le kol forja pale pre, me dau halauter pale paash.’ Un wawar menshe penenn pral lende ‘tchilatcho them’ un ‘kalla hi menshe, pral kolende o baro Dewel pes choirella an hako tsiro’.

⁵Ko tsiro wella sik, kai dikenn kowa tumare jakentsa, un palle penenn tumer: ‘O baro Dewel hi sorelo pral o them Israel un dureder win.’”

⁶O baro Dewel, ko rai pral o bolepen un i phub, penell: I tchawo hunte hadell peskro dades, un i budepaskro hunte dikell pre ap peskro rajeste. Me hom tumaro dad — hoske hadenn man gar? Me hom tumaro rai — hoske dikenn gar pre ap mande? Tumer rashaja, tumer dikenn tele ap mande. Un tumer putchenn: Hoi kram, kai peneh ‘tumer dikan tele ap mande?’

⁷Koi pre penau me: ‘Tumer anan ap o Debleskri chatchepaskri pale-tchiddo mass’, un putchenn: ‘Hoi anam tuke, hoi pale-tchiddo his?’ Tumer krenn har te wals miri chatchepaskri tchi moldo.

⁸Un anenn mange i viecho, hoi korelo, bango oder nasselo hi, un penenn tumenge: ‘Kowa hi kek djungelo koowa.’ Me penau tumenge: ‘Anenn sau viecho tumaro themeskro rajeske, un dikenn, hoi lo krell! Patsenn tumer, te dikell lo latches ap tumende?’ Ko penell o baro Dewel, ko rai pral o bolepen un i phub.

⁹Kanna nai mangenn lestar, tumer rashaja, — jaake bud har kamenn, te well lo menge latches! Hoi djal an tumaro shero glan? Sau koowa kran, un tumer patsenn, te well lo tumenge latches! ‘Na-a’, penell o baro Dewel, ko rai pral o bolepen un i phub.

¹⁰‘Kamaus, te wals jek tumendar koi, kai krals o wudja an miro kheer pandles, te krenn tumer gar tchitcheske i jag ap miri chatchepaskri! Man hi doha tumendar’, penell o baro Dewel, ko rai pral o bolepen un i phub. ‘Un kol marede vieche, hoi mange anenn, hi mange gar mishto.’

¹¹O baro Dewel, ko rai pral o bolepen un i phub, penell: Fun kotar, kai o kham pre djala, bis kote kai o kham tele djal, well miro lab sharedo pash kolende an i wawar themma. An bud gaba un forja chatchrenn le mange sungepaskro koowa un viechen, hoi hi latcho an mire jaka. Kolla lauter sharenn miro lab.

¹²Tumenge hom tchi moldo, te penenn tumer: ‘Koi chatchepaskri o baro Deblestar hi tchi moldo. Anas leske tchomone, hoi ninna tchi moldo hi!’

¹³Un tumer penenn: ‘Dikenn, hawi budi hi men koleha! Ko well menge dran o nak win.’ Tumer anenn mange viechen, kai hi tchoredo, bango un nasselo. Penap me koi pre: ‘Kowa hi shukar, hoi tumer mange krenn’, penell o baro Dewel.

¹⁴‘Praassedo te well hakeno, kai pes sowel das, te dell lo man i latcho mursh viecho. Un palle chochell lo man un anell mange i nasselo vieches. Me hom o pralstuno rai, un i menshe dran wawar themma sharenn man’, penell o baro Dewel, ko rai pral o bolepen un i phub.